Mudragada Letter to Pawan : మీ వద్ద నేనేమి నౌకరీ చేయడం లేదే? మీకు తొత్తుగా ఉండాలా?
ABN, First Publish Date - 2023-06-23T10:18:02+05:30
జనసేన అధినేత పవన్ కళ్యాణ్‌కు కాపు ఉద్యమ నేత ముద్రగడ మరో లేఖ రాశారు. అభిమానులతో బండబూతులతో మెసేజ్‌లు పెట్టిస్తున్నారని.. అలా చేయడం వలన మీరు పెద్ద హీరో అనుకుంటున్నారేమోనని విమర్శించారు. ఆ మెసేజ్‌లకు భయపడి తాను లొంగిపోవడం ఈ జన్మకు జరగదన్నారు. పవన్ సినిమాలో హీరో తప్ప.. రాజకీయాలలో హీరో కాదన్నది గ్రహించాలన్నారు. తనను మీరు గాని, మీ అభిమానులు గాని తిట్టవలసిన అవసరం ఏమొచ్చిందని ప్రశ్నించారు.
కాకినాడ : జనసేన అధినేత పవన్ కళ్యాణ్‌కు కాపు ఉద్యమ నేత ముద్రగడ మరో లేఖ రాశారు. అభిమానులతో బండబూతులతో మెసేజ్‌లు పెట్టిస్తున్నారని.. అలా చేయడం వలన మీరు పెద్ద హీరో అనుకుంటున్నారేమోనని విమర్శించారు. ఆ మెసేజ్‌లకు భయపడి తాను లొంగిపోవడం ఈ జన్మకు జరగదన్నారు. పవన్ సినిమాలో హీరో తప్ప.. రాజకీయాలలో హీరో కాదన్నది గ్రహించాలన్నారు. తనను మీరు గాని, మీ అభిమానులు గాని తిట్టవలసిన అవసరం ఏమొచ్చిందని ప్రశ్నించారు.
ఇంకా ముద్రగడ తన లేఖలో.. ‘‘మీ వద్ద నేనేమి నౌకరీ చేయడం లేదే? నాకు ఏ రకంగాను స్వంత అభిప్రాయలు ఉండకూడదా? మీకు తొత్తుగా ఉండాలా? మీకు నాకు సంబంధం ఏమిటి? మీకు డబ్బు ఉంది కాబట్టి మీ అభిమానుల చేత నన్ను తిట్టిస్తారా? నా శరీరంలో చీము, నెత్తురు లేకపోవడం వలన పౌరుషం పూర్తిగా పోయింది నేనొక అనాథను, ఒంటరి వాడిని ఏమన్నా పడతాననే గర్వమా? 1988లో వంగవీటి రంగాని హత్య చేసిన తరువాత ఎంతో మందిని అమాయకులను జైలులో పెట్టినప్పుడు ఎప్పుడైనా తమరు వెళ్ళి చూసారా? జైలులో ఉన్న వారి కుటుంబాలకు ధైర్యం చెప్పడం కోసం ఏ రోజైనా పలకరించడానికి వారి గృహాలకు వెళ్ళారా?
జైలులో ఉన్న వారికి బెయిల్స్ తేవడం కోసం ఎప్పుడైనా అడ్వకేట్స్‌తో మాట్లాడారా? జైలులో ఉన్న వారి మీద టెర్రరిస్టుల కోసం తయారు చేసిన చట్టంలోని కొన్ని సెక్షన్లు వేసి కేసులు పెట్టిన సంగతి తమరెరుగుదురా?1988-89లో 3500 మంది అమాయకులపై పెట్టిన కేసులు తీసివేయమని ఎప్పుడైనా అప్పటి గౌరవ ముఖ్యమంత్రి మర్రి చెన్నారెడ్డి గారిని కలిసి కోరారా? 1993-94 లో రావులపాలెంలో అప్పటి ముఖ్యమంత్రి గారి సభలో కాపులను గొడ్డును బాధినట్లుగా బాదిన బాధితులను ఏరోజైనా పలకరించారా?1999 ఉద్యమ సందర్భముగా అప్పట్లో పెట్టిన కేసులు అప్పటి ముఖ్యమంత్రి గౌరవ చంద్రబాబునాయుడు గారిని తీసివేయమని అడిగారా?
కాకినాడ ఎమ్మెల్యేతో పాటు నన్ను తిట్టాలని ఎందుకు అనుకున్నారో సెలవివ్వాలి. ఆఖరిగా నా బలమైన కోరిక మీ ముందు పెడుతున్నాను. కాకినాడ ఎమ్మెల్యే గారు, నేను కోరినట్టుగా కాకినాడ నుండి పోటీ చేయడానికి మీరు నిర్ణయం తీసుకోండి. ఏ కారణం చేతనైనా తమరు తోక ముడిస్తే పిఠాపురం నుండి పోటీ చేయడానికి తమరు నిర్ణయం తీసుకుని నన్ను మీ మీదకు పోటీ చేయడానికి నాకు సవాలు విసరమని కోరుకుంటున్నానండి. “చెగువేరా” మీకు ఆదర్శం అని చెప్పుకుంటారు. గుండెలనిండా ధైర్యం ఉందని అంటారు కాబట్టి ఏదో ఒక కోరిక తప్పకుండా తీర్చే శక్తి పౌరుషం మీకు ఉన్నాయని నేను భావిస్తాను. ఎన్నికల బరిలో ఉండాలా లేదా అనుకుంటున్న సమయంలో మీరు, జనసైనికులు తిట్టడం వల్ల ఎక్కడా లేని ఉత్సాహాం నాలో వచ్చి యుద్ధానికి రెడీ అవ్వాలనే వాతావరణం కల్పించినందుకు చాలా సంతోషం. బంతిని ఎంత గట్టిగా కొడితే అంత ఎత్తుకు లేస్తుందనే సంగతి మరువవద్దు’’ పేర్కొన్నారు.
Updated Date - 2023-06-23T10:18:02+05:30 IST