MLC Kavitha: బీఆర్ఎస్ లీగల్ సెల్ ప్రతినిధులతో కవిత భేటీ.. ఆ వెంటనే... సోదరితో కేటీఆర్ కీలక సమావేశం
ABN, First Publish Date - 2023-03-10T22:23:14+05:30
బీఆర్ఎస్ ఎమ్మెల్సీ కవిత (BRS MLC Kavitha) ఢిల్లీలోని కేసీఆర్ నివాసంలో బీఆర్ఎస్ లీగల్ సెల్ ప్రతినిధులతో సమావేశమయ్యారు.
న్యూఢిల్లీ: దేశ వ్యాప్తంగా ప్రకంపనలు రేపుతోన్న ఢిల్లీ లిక్కర్ స్కామ్‌ కేసులో (Delhi liquor Scam Case) బీఆర్ఎస్ ఎమ్మెల్సీ కవిత (BRS MLC Kavitha) ఢిల్లీలోని కేసీఆర్ నివాసంలో బీఆర్ఎస్ లీగల్ సెల్ ప్రతినిధులతో సమావేశమయ్యారు. శనివారం నాడు కవిత ఈడీ (ED) ఎదుట హాజరుకానుండటంతో ఎలా వ్యవహరించాలనే విషయంపై ఆమె న్యాయనిపుణుల సలహాలు తీసుకున్నారు. బీఆర్ఎస్ విస్తృతస్థాయి సమావేశం తర్వాత హుటాహుటిన ఢిల్లీ చేరుకున్న సోదరుడు కేటీఆర్‌తో కవిత భేటీ అయ్యారు. కేటీఆర్ కూడా న్యాయనిపుణులతో చర్చలు జరుపుతున్నారు. కవిత కోసం కేటీఆర్ రేపు, ఎల్లుండి కూడా ఢిల్లీలోనే ఉండనున్నారు. మంత్రులు హరీశ్ రావు, శ్రీనివాస్ గౌడ్ కూడా ఢిల్లీకి చేరుకున్నారు. ఇప్పటికే ఢిల్లీలో కవితతో పాటు మహిళా మంత్రులు సబితా ఇంద్రారెడ్డి (Sabitha Indra Reddy), సత్యవతి రాథోడ్‌లు (Satyavathi Rathod) ఉన్నారు. మరికొందరు బీఆర్ఎస్ పెద్దలు ఢిల్లీకి చేరుకోనున్నారు.
కవిత ఢిల్లీ బయల్దేరి వెళ్లే ముందు సుమారు 15 నిమిషాల పాటు కేసీఆర్ ఫోన్‌లో (Kavitha-KCR Phone) మాట్లాడారు. కవితకు ధైర్యం చెప్పి అన్ని విధాలా పార్టీ అండగా ఉంటుందని ఢిల్లీ పంపారు.
మరోవైపు ఢిల్లీ మద్యం కుంభకోణం(Delhi Liquor Scam Case) హైదరాబాద్‌లోనే జరిగిందని ఆమ్ ఆద్మీ పార్టీ(AAP) కీలక నేత, ఢిల్లీ మాజీ ఉప ముఖ్యమంత్రి ( former Delhi Deputy Chief Minister) మనీశ్‌ సిసోడియా(Manish Sisodia) కస్టడీ రిపోర్ట్‌లో ఈడీ వెల్లడించింది. ఐటీసీ కోహినూర్‌ హోటల్‌లోనే స్కామ్‌కు కుట్ర జరిగిందని తెలిపింది. సౌత్‌గ్రూప్‌ దినేష్‌ అరోరాను హైదరాబాద్‌కు పిలిచిందని, విజయ్నాయర్, అర్జున్‌ పాండే, అభిషేక్‌ బోయినపల్లి, కవిత ఆడిటర్‌ బుచ్చిబాబు(Kavithas auditor Butchibabu Gorantla), అరుణ్‌ పిళ్లై కలిసే కుట్ర చేశారని ఈడీ స్పష్టం చేసింది. ఢిల్లీ లిక్కర్ స్కామ్‌లో కవిత పేరును మరోసారి ప్రస్తావించింది. కేజ్రీవాల్‌తో కవితకు స్పష్టమైన రాజకీయ సంబంధాలున్నాయని, కవితకు ఆమ్ ఆద్మీ పార్టీకి ముడుపులపై స్పష్టమైన అవగాహన కుదిరిందని ఈడీ వెల్లడించింది. తమకు అనుకూలంగా లిక్కర్ పాలసీ ఉంటే ముడుపులు ఇస్తామని కవిత ఆప్ నేతలకు చెప్పారని ఈడీ తెలిపింది. 2021 మార్చిలో విజయ్‌నాయర్‌ను కవిత కలిశారని బుచ్చిబాబు చెప్పారని కస్టడీ రిపోర్ట్‌లో ఈడీ వెల్లడించింది. మాగుంట రాఘవకు 32.5శాతం, కవితకు 32.5శాతం... సమీర్ మహేంద్రుకు 35శాతం ఇండో స్పిరిట్స్‌లో వాటా కుదిరిందని, సౌత్ గ్రూప్ ద్వారా వందకోట్లు ఆప్‌కు చెల్లించారని ఈడీ తెలిపింది.
మరోవైపు సిసోడియా(Manish Sisodia)కు మరో ఎదురుదెబ్బ తగిలింది. సీబీఐ (CBI) రౌజ్ ఎవెన్యూ కోర్టు(Delhi Rouse Avenue Court) వారం రోజుల పాటు సిసోడియా ఈడీ కస్టడీ పొడిగించింది. అంతకు ముందు సిసోడియాను 10 రోజుల పాటు కస్టడీకి ఇవ్వాలని పిటిషన్‌‌లో ఈడీ కోరింది. ఇప్పటివరకూ ఆయన సీబీఐ రిమాండ్‌లో ఉన్నారు. సీబీఐ రిమాండ్‌పై విచారణ ఇప్పటికే ఈ నెల 21కి వాయిదా పడగా తాజాగా న్యాయస్థానం ఆయన్ను వారం రోజుల ఈడీ కస్టడీకి అప్పగించింది.
మనీశ్‌ సిసోడియాతో పాటు కలిపి విచారించేందుకు ఇప్పటికే ఏడుగురికి నోటీసులు జారీ చేశామని ఎన్‌ఫోర్స్‌మెంట్ డైరెక్టరేట్ (Enforcement Directorate) అధికారులు తెలిపారు. కవితకు, సిసోడియాకు ఉన్న వ్యాపార సంబంధాలపై ప్రశ్నిస్తామని సీబీఐ ప్రత్యేక కోర్టుకు ఎన్‌ఫోర్స్‌మెంట్ డైరెక్టరేట్ తెలిపింది. కవిత, సిసోడియా, విజయ్ నాయర్ కుట్రకు పాల్పడ్డారని, సౌత్ గ్రూప్ ద్వారా రూ. 100 కోట్లు ఆప్‌కి చెల్లించారని ఈడీ పేర్కొంది. సిసోడియా వాడిన ఫోన్లు, సిమ్ కార్డులు అతని పేరుపై లేవని.. తద్వారా సాక్ష్యాధారాలు లేకుండా చేయాలనుకున్నారని ఎన్‌ఫోర్స్‌మెంట్ డైరెక్టరేట్ అధికారులు సీబీఐ ప్రత్యేక కోర్టుకు వివరించారు.
మద్యం హోల్‌సేల్ వ్యాపారాన్ని కొందరికి మాత్రమే దక్కేలా కుట్రపూరితంగా లిక్కర్ పాలసీని అమలు చేశారని ఈడీ కోర్టుకు తెలిపింది. ఈ కుట్రను విజయ్నాయర్, సౌత్ గ్రూపు కలిసి కోఆర్డినేట్ చేశారని, హైదరాబాద్ నుంచి ఢిల్లీకి నగదు బదిలీ జరిగిందని ఈడీ పేర్కొంది. సిసోడియా తరపున విజయ్ నాయర్ ఈ వ్యవహారం నడిపారని.. ఈ వ్యవహారంపై కవిత, సిసోడియా మధ్య అవగాహన ఉందని ఎన్‌ఫోర్స్‌మెంట్ డైరెక్టరేట్ అధికారులు సీబీఐ ప్రత్యేక కోర్టుకు వివరించారు. 12 శాతం డీలర్ కమీషన్ అనే క్లాజ్‌ను పాలసీలో ఏకపక్షంగా చేర్చారని, ఇందులో మనీష్‌ సిసోడియా పాత్ర ప్రత్యక్షంగా ఉందని ఎన్‌ఫోర్స్‌మెంట్ డైరెక్టరేట్ అధికారులు కోర్టుకు స్పష్టం చేశారు.
Updated Date - 2023-03-10T22:32:19+05:30 IST