Heart Attack: వీటిని తీసుకున్నారో.. గుండెపోటు వచ్చే అవకాశం 2 రెట్లు పెరుగుతుంది.. మీ ఇష్టం మరి.
ABN, First Publish Date - 2023-03-02T10:08:26+05:30
ఈమధ్యకాలంలో చిన్నా, పెద్దా అనే భేధం లేకుండా అందరినీ తీసుకుపోతున్న మహమ్మారి గుండెపోటు.
ఎరిథ్రిటాల్ అని పిలువబడే షుగర్ రీప్లేస్‌మెంట్ అంటే అచ్చంగా షుగర్ లాగే ఉంటుంది కానీ షుగర్ చేసే చేటు శరీరానికి చేయదని మనలో చాలామంది అభిప్రాయం. దీనిని వాడటం వల్ల షుగర్ వాడినట్టే రుచి ఉంటుందని ఈమధ్య కాలంలో చాలావరకూ షుగర్‌కు ప్రత్యామ్నాయంగా తెగ వాడేస్తున్నారు. అయితే ఎరిథ్రిటాల్ అని పిలవబడే ఈ షుగర్‌లో స్టెవియా, మాంక్‌ఫ్రూట్, కీటో తగ్గిన చక్కెరను స్వీట్ చేయడానికి ఉపయోగిస్తారు. ఓ అధ్యయనం ప్రకారం, ఇలా తయారైన షుగర్‌తో రక్తం గడ్డకట్టడం, స్ట్రోక్, గుండెపోటు, మరణం కూడా సంభవించే ప్రమాదం ఉందంటున్నారు వైద్య నిపుణులు.
నేచర్ మెడిసిన్ జర్నల్‌ అధ్యయనం ప్రకారం, మధుమేహం వంటి గుండె జబ్బులకు ఇప్పటికే ఉన్న ప్రమాదానికి తోడు, రక్తంలో అత్యధిక స్థాయిలో ఎరిథ్రిటాల్ కలిగి ఉంటే గుండెపోటు లేదా స్ట్రోక్ వచ్చే అవకాశం రెండు రెట్లు ఎక్కువగా ఉందట. అంతే కాదు రక్తంలో ఎరిథ్రిటాల్ స్థాయి దిగువన ఉన్న 25%తో పోలిస్తే టాప్‌లో 25%లో ఉంటే, గుండెపోటు, స్ట్రోక్ వచ్చే ప్రమాదం రెండు రెట్లు ఎక్కువగా ఉంటుంది. ఇది మధుమేహం వంటి బలమైన కార్డియాక్ రిస్క్‌కు కూడా కారణం అవుతుంది.
ఈ పరిశోధన ఎరిథ్రిటాల్ సులభంగా రక్తం గడ్డకట్టడానికి కారణమవుతుందని వెల్లడించింది. ఈ గడ్డకట్టడం లక్షణాలతోనే, గుండెపోటు, మెదడుకు స్ట్రోక్‌ను కలిగిస్తుంది.
ఎరిథ్రిటాల్ అంటే ఏమిటి?
సార్బిటాల్, జిలిటాల్ లాగా, ఎరిథ్రిటాల్ ఒక చక్కెర ఆల్కహాల్, పండ్లు, కూరగాయలలో సహజంగా కనిపించే కార్బ్. ఇది చక్కెరలో 70% తీపిని కలిగి ఉంటుంది. నిపుణుల అభిప్రాయం ప్రకారం, ఇది జీరో క్యాలరీగా పరిగణించబడుతుంది. కృత్రిమంగా భారీ పరిమాణంలో తయారయ్యే, ఎరిథ్రిటాల్‌కు శాశ్వతమైన రుచి ఉండదు, రక్తంలో చక్కెరను పెంచదు. కొన్ని ఇతర చక్కెర ఆల్కహాల్‌ల కంటే తక్కువ ప్రభావాన్ని కలిగి ఉంటుంది. ఎరిథ్రిటాల్ చక్కెరలా కనిపిస్తుంది, ఇది చక్కెరలాగా ఉంటుంది కూడా. అయితే వాడే మొతాదు పెరిగినా, అలవాటుగా మారినా కూడా ఎరిథ్రిటాల్ శరీరాన్ని ప్రమాదంలోకి నెట్టేస్తుందంటున్నారు.
ఈ పరిశోధనలో ఒక వ్యక్తి రక్తంలో తెలియని రసాయనాలు, సమ్మేళనాలను కనుగొనడం వలన వచ్చే మూడు సంవత్సరాలలో గుండెపోటు, స్ట్రోక్ లేదా మరణం సంభవించే ప్రమాదాన్ని అంచనా వేశారు. ఇందులో భాగంగానే 2004, 2011 మధ్య సేకరించిన గుండె జబ్బుల ప్రమాదం ఉన్న వ్యక్తులలో 1,157 రక్త నమూనాలను విశ్లేషించడం ప్రారంభించినపుడు, అందులో ఎక్కువగా కృత్రిమ షుగర్‌ను వాడుతున్నవారే ఎక్కువగా ప్రమాదం అంచున ఉన్నట్టు ఈ పరిశోధనలో తేలింది. కాబట్టి ఇక నుంచి ఈ అలవాటును మానేయండి మరి.
Updated Date - 2023-03-02T10:17:25+05:30 IST