ODI World Cup: చెలరేగిన పసికూన ఆప్ఘనిస్తాన్.. టీమిండియా టార్గెట్ ఎంతంటే..?
ABN, First Publish Date - 2023-10-11T18:15:54+05:30
ఢిల్లీ వేదికగా జరుగుతున్న టీమిండియాతో జరుగుతున్న మ్యాచ్‌లో టాస్ గెలిచి బ్యాటింగ్ ఎంచుకున్న ఆప్ఘనిస్తాన్ నిర్ణీత 50 ఓవర్లలో 8 వికెట్ల నష్టానికి 272 పరుగులు చేసింది.
వన్డే ప్రపంచకప్‌లో విజయం కోసం ఆరాటపడుతున్న ఆప్ఘనిస్తాన్ టీమిండియాతో జరుగుతున్న మ్యాచ్‌లో మెరుగైన ప్రదర్శన చేసింది. ఢిల్లీ వేదికగా జరుగుతున్న ఈ మ్యాచ్‌లో టాస్ గెలిచి బ్యాటింగ్ ఎంచుకున్న ఆప్ఘనిస్తాన్ నిర్ణీత 50 ఓవర్లలో 8 వికెట్ల నష్టానికి 272 పరుగులు చేసింది. 63 పరుగులకే మూడు వికెట్లు కోల్పోయిన ఆప్ఘనిస్తాన్ తక్కువ స్కోరుకే ఆలౌట్ అవుతుందని అందరూ భావించారు. కానీ కెప్టెన్ హష్మతుల్లా షాహిదీ, అజ్మతుల్లా ఒమర్‌జాయ్ హాఫ్ సెంచరీలతో చెలరేగారు. దీంతో ఆప్ఘనిస్తాన్ నాలుగో వికెట్‌కు 121 పరుగుల భాగస్వామ్యం నెలకొల్పింది. ఒక దశలో ఆప్ఘనిస్తాన్ 300 స్కోరు చేసేలా కనిపించింది. అయితే టీమిండియా స్టార్ బౌలర్ బుమ్రా తన బౌలింగ్‌లో పదును చూపెట్టడంతో 272 పరుగులకే పరిమితమైంది.
ఇది కూడా చదవండి: IND vs AFG: వారెవ్వా.. ఈ వరల్డ్ కప్‌లోనే బెస్ట్ క్యాచ్ అందుకున్న టీమిండియా ప్లేయర్
కాగా ఢిల్లీలో పిచ్ బ్యాటింగ్‌కు అనుకూలంగా ఉండటంతో ఆప్ఘనిస్తాన్ బ్యాటర్లు సులువుగా పరుగులు రాబట్టారు. హష్మతుల్లా 88 బాల్స్‌లో 8 ఫోర్లు, ఒక సిక్సర్‌తో 80 పరుగులు చేయగా.. అజ్మతుల్లా ఒమర్‌జాయ్ 69 బాల్స్‌లో 2 ఫోర్లు, నాలుగు సిక్సర్లతో 62 పరుగులు చేశాడు. వీళ్లిద్దరూ కలిసి ఆప్ఘనిస్తాన్ సాధించిన స్కోరులో సగం పరుగులు సాధించడం గమనించాల్సిన విషయం. టీమిండియా బౌలర్లలో జస్‌ప్రీత్ బుమ్రా 4 వికెట్లు సాధించాడు. ఆల్‌రౌండర్ హార్దిక్ పాండ్య 2 వికెట్లు తీయగా.. శార్దూల్ ఠాకూర్, కుల్‌దీప్ యాదవ్ తలో వికెట్ పడగొట్టారు. మహ్మద్ సిరాజ్ 9 ఓవర్లలో 76 పరుగులు ఇచ్చి ఒక వికెట్ కూడా తీయలేకపోయాడు. అతడు దారుణంగా విఫలమయ్యాడు. ఆస్ట్రేలియాపై రాణించిన జడేజా తక్కువ పరుగులు ఇచ్చినా వికెట్లు మాత్రం పడగొట్టలేదు.
Updated Date - 2023-10-11T18:22:07+05:30 IST