Ahmedabad Test: మ్యాచ్ డ్రా.. కివీస్ పుణ్యమా అని గట్టెక్కిన భారత్!
ABN, First Publish Date - 2023-03-13T16:28:23+05:30
బోర్డర్-గవాస్కర్ ట్రోఫీ(Border-Gavaskar Trophy)లో భాగంగా అహ్మదాబాద్‌లో భారత్-ఆస్ట్రేలియా మధ్య
అహ్మదాబాద్: బోర్డర్-గవాస్కర్ ట్రోఫీ(Border-Gavaskar Trophy)లో భాగంగా అహ్మదాబాద్‌లో భారత్-ఆస్ట్రేలియా మధ్య జరిగిన చివరిదైన నాలుగో టెస్టు డ్రాగా ముగిసింది. ఫలితంగా టెస్టు సిరీస్ 2-1తో భారత్(Team India) సొంతమైంది. ఓవర్‌నైట్ స్కోరు 3/0తో చివరి రోజు రెండో ఇన్నింగ్స్ ప్రారంభించిన ఆసీస్(Australia) టీబ్రేక్ సమయానికి రెండు వికెట్ల నష్టానికి 158 పరుగులు చేసింది. చివరి సెషన్ ప్రారంభమయ్యాక మరో 17 పరుగులు జోడించిన తర్వాత మ్యాచ్ డ్రా అయినట్టు ప్రకటించారు. ఫలితం తేలే అవకాశం లేకపోవడంతో ఇరు జట్ల కెప్టెన్లు మాట్లాడుకుని మ్యాచ్‌ను ముగించాలని నిర్ణయిం తీసుకున్నారు. దీంతో అంపైర్లు మ్యాచ్ డ్రా అయినట్టు ప్రకటించారు. ఫలితంగా నాలుగు మ్యాచ్‌ల టెస్టు సిరీస్ 2-1తో భారత్ సొంతమైంది.
ఈ మ్యాచ్‌లో తొలుత బ్యాటింగ్ చేసిన ఆస్ట్రేలియా తొలి ఇన్నింగ్స్‌లో 480 పరుగులు చేసింది. ఓపెనర్ ఉస్మాన్ ఖావాజా (180), కామెరాన్ గ్రీన్ (114) సెంచరీలతో రాణించారు. ప్రతిగా టీమిండియా 571 పరుగులు చేసింది. ఓపెనర్ శుభమన్ గిల్ (128), విరాట్ కోహ్లీ (186) సెంచరీలు చేశారు. అనంతరం రెండో ఇన్నింగ్స్ ప్రారంభించిన కంగారూ జట్టు చివరి సెషన్ వరకు ఆడింది. అయితే ఫలితం తేలే అవకాశం లేకపోవడంతో మ్యాచ్ డ్రా అయినట్టు ప్రకటించారు.
డబ్ల్యూటీసీ ఫైనల్‌లో భారత్
ప్రపంచ టెస్టు చాంపియన్షిప్ ఫైనల్‌పై భారత జట్టు కన్నేసినప్పటికీ చివరి టెస్టు డ్రా ముగియడంతో టీమిండియా ఆశలు అడియాసలైనట్టేనని భావించారు. అయితే, న్యూజిలాండ్(New Zealand) జట్టు భారత్ నెత్తిన పాలుపోసింది. శ్రీలంక(Sri Lanka)తో క్రైస్ట్‌చర్చ్‌లో జరిగిన జరిగిన తొలి టెస్టులో రెండు వికెట్ల తేడాతో న్యూజిలాండ్ విజయం సాధించడంతో శ్రీలంక డబ్ల్యూటీసీ ఫైనల్ అవకాశాలు కనుమరుగయ్యాయి. ఫలితంగా రోహిత్ శర్మ సేన నేరుగా ఫైనల్‌లోకి దూసుకెళ్లింది. 2019 ప్రపంచకప్ సెమీ ఫైనల్, 2021 ప్రపంచ చాంపియన్షిప్ ఫైనల్‌లో భారత అభిమానుల హృదయాలను గాయపరిచిన న్యూజిలాండ్ ఈసారి మాత్రం వారి హృదయాలను గెలుచుకుంది.
శ్రీలంకతో జరిగిన తొలి టెస్టులో రెండు వికెట్ల తేడాతో విజయం సాధించిన న్యూజిలాండ్ రెండు మ్యాచ్‌ల టెస్టు సిరీస్‌లో 1-0తో ముందంజ వేసింది. శ్రీలంక నిర్దేశించిన 285 పరుగుల విజయ లక్ష్యాన్ని 8 వికెట్లు కోల్పోయి ఛేదించింది. కేన్ విలియమ్సన్ అజేయ సెంచరీ (121)కి తోడు డరిల్ మిచెల్ 81 పరుగులు చేసి జట్టుకు అద్భుత విజయాన్ని అందించారు. శ్రీలంకపై కూడా డబ్ల్యూటీసీ ఫైనల్‌పై కన్నేసినప్పటికీ న్యూజిలాండ్‌తో జరుగుతున్న రెండు మ్యాచ్‌ల టెస్టు సిరీస్‌ను క్లీన్ స్వీప్ చేయాల్సి ఉంటుంది. అయితే, తొలి టెస్టులో పరాజయం పాలవడంతో శ్రీలంక ఆసలు అడియాసలయ్యాయి.
Updated Date - 2023-03-13T16:28:23+05:30 IST