Harry Brook: చరిత్ర సృష్టించిన సన్‌రైజర్స్ హైదరాబాద్ ఆటగాడు
ABN, First Publish Date - 2023-08-23T19:15:16+05:30
ప్రపంచంలోనే మూడు లీగ్‌లలో సెంచరీ చేసిన ఏకైక ఆటగాడిగా ఇంగ్లండ్ యువ ఆటగాడు హ్యారీ బ్రూక్ రికార్డు కైవసం చేసుకున్నాడు. ఇండియన్ ప్రీమియర్ లీగ్, పాకిస్థాన్ సూపర్ లీగ్, ది హండ్రెడ్ లీగ్‌లలో హ్యారీ బ్రూక్ శతకం సాధించాడు.
24 ఏళ్ల ఇంగ్లండ్ యువ క్రికెటర్, ఐపీఎల్‌లో సన్‌రైజర్స్ హైదరాబాద్ కీలక ఆటగాడు హ్యారీ బ్రూక్ చరిత్ర సృష్టించాడు. ప్రపంచంలోనే మూడు లీగ్‌లలో సెంచరీ చేసిన ఏకైక ఆటగాడిగా రికార్డు కైవసం చేసుకున్నాడు. ఇండియన్ ప్రీమియర్ లీగ్, పాకిస్థాన్ సూపర్ లీగ్, ది హండ్రెడ్ లీగ్‌లలో హ్యారీ బ్రూక్ శతకం సాధించాడు. గత ఏడాది పీఎస్‌ఎల్‌లో సెంచరీ చేసిన అతడు ఐపీఎల్‌లో ఈ ఏడాదే అడుగుపెట్టాడు. తొలి ఏడాది భారీ అంచనాల కారణంగా అతడు విఫలమైనా ఓ మ్యాచ్‌లో సెంచరీ చేసి సత్తా చాటాడు. ఇప్పుడు హండ్రెడ్ లీగ్‌లో సూపర్ ఫామ్‌తో రెచ్చిపోతున్నాడు. నార్త్రన్ సూపర్ ఛార్జర్స్‌కు ప్రాతినిధ్యం వహిస్తున్న హ్యారీ బ్రూక్ వెల్ష్ ఫైర్‌తో జరిగిన మ్యాచ్‌లో 41 బాల్స్‌లో 11 ఫోర్లు, 7 సిక్సర్లతో శతకం సాధించాడు. హండ్రెడ్ లీగ్‌లో ఇదే వేగవంతమైన సెంచరీ కావడం మరో విశేషం.
ఈ మ్యాచ్‌లో హ్యారీ బ్రూక్ 20 బాల్స్ దగ్గర బరిలోకి దిగాడు. అప్పటికి అతడి టీమ్ స్కోరు 10/3. దీంతో బ్రూక్ తొలుత క్రీజులో నిలదొక్కుకుని ఆ తర్వాత దుమ్ముదులిపాడు. నార్త్రన్ సూపర్ ఛార్జర్స్‌ 100 బాల్స్‌లో ఏడు వికెట్ల నష్టానికి 158 రన్స్ చేసింది. టీమ్ చేసిన చివరి 130 రన్స్‌లో బ్రూక్‌వే 101 రన్స్ ఉన్నాయి. ఈ మ్యాచ్‌లో వెల్ష్ ఫైర్ విజయం సాధించినా సెంచరీతో రాణించిన బ్రూక్‌కు మ్యాన్ ఆఫ్ ది మ్యాచ్ అవార్డు దక్కింది.
కాగా 2022 జనవరిలో వెస్టిండీస్‌తో జరిగిన టీ20తో హ్యారీ బ్రూక్ అంతర్జాతీయ క్రికెట్‌లోకి ప్రవేశించాడు. ఇప్పటివరకు 12 టెస్టుల్లో 4 సెంచరీలు, 7 అర్ధసెంచరీలతో 1181 పరుగులు చేశాడు. వన్డేల విషయానికి వస్తే మూడు వన్డేల్లో ఒక హాఫ్ సెంచరీ సాయంతో 86 పరుగులు సాధించాడు. 20 టీ20ల్లో ఒక హాఫ్ సెంచరీ సాయంతో 372 పరుగులు చేశాడు. బ్రూక్‌‌ను ఐపీఎల్‌ 2023 వేలంలో సన్‌రైజర్స్ హైదరాబాద్ రూ.13.25 కోట్లకు కొనుగోలు చేసింది. దీంతో అతడు 11 మ్యాచ్‌లు ఆడి ఒక సెంచరీ సాయంతో 190 పరుగులు చేశాడు.
అయితే ఈ ఏడాది భారత్ వేదికగా జరగనున్న వన్డే ప్రపంచకప్ కోసం ఇంగ్లండ్ ప్రకటించిన జట్టులో హ్యారీ బ్రూక్ లేడు. అయితే టీమ్ ప్రకటన వచ్చిన వారం లోపే హ్యారీ బ్రూక్ సెంచరీతో సత్తా చాటడం విశేషం. బ్రూక్ కేవలం మూడు అంతర్జాతీయ వన్డేలు మాత్రమే ఆడటంతో అతడిని పరిగణనలోకి తీసుకోలేదని ఇంగ్లండ్ టీమ్ మేనేజ్‌మెంట్ వివరణ ఇచ్చింది. హ్యారీ బ్రూక్, జోఫ్రా ఆర్చర్ వంటి ఆటగాళ్లను ప్రపంచకప్ టీమ్‌కు తీసుకోకపోవడంపై మాజీ ఆటగాడు కెవిన్ పీటర్సన్ కూడా ఆశ్చర్యం వ్యక్తం చేశాడు.
Updated Date - 2023-08-23T19:15:16+05:30 IST