TSRTC: విజయవాడ-హైదరాబాద్ హైవేపై ప్రయాణించేవారికి టీఎస్‌ఆర్టీసీ అలర్ట్!
ABN, First Publish Date - 2023-07-28T17:30:16+05:30
ఆంధ్రప్రదేశ్ కృష్ణా జిల్లా కీసర టోల్‌గేట్‌ సమీపంలోని ఐతవరం దగ్గర మున్నేరు వాగు ఉధృతంగా ప్రవహించడంతో రహదారిపై రాకపోకలు స్తంభించాయి. ఈ నేపథ్యంలో హైదరాబాద్-విజయవాడ మార్గంలో తిరిగే రెగ్యులర్‌ సర్వీసులను టీఎస్‌ఆర్టీసీ (TSRTC) రద్దు చేసింది.
హైదరాబాద్: హైదరాబాద్-విజయవాడ జాతీయ రహదారిపై ప్రయాణించే ప్రయాణికుల కోసం టీఎస్‌ఆర్టీసీ కీలక ప్రకటన విడుదల చేసింది. తెలుగు రాష్ట్రాల్లో భారీ వర్షాల కారణంగా హైదరాబాద్-విజయవాడ జాతీయ రహదారిపై వరద ప్రవాహం కొనసాగుతోంది. దీంతో ఆంధ్రప్రదేశ్ కృష్ణా జిల్లా కీసర టోల్‌గేట్‌ సమీపంలోని ఐతవరం దగ్గర మున్నేరు వాగు ఉధృతంగా ప్రవహించడంతో రహదారిపై రాకపోకలు స్తంభించాయి. ఈ నేపథ్యంలో హైదరాబాద్-విజయవాడ మార్గంలో తిరిగే రెగ్యులర్‌ సర్వీసులను టీఎస్‌ఆర్టీసీ (TSRTC) రద్దు చేసింది. ఈ విషయాన్ని ప్రయాణికులు గమనించాలని తెలిపింది.
ప్రత్యామ్నాయంగా హైదరాబాద్ నుంచి మిర్యాలగూడ, పిడుగురాళ్ల, గుంటూరు మీదుగా విజయవాడకు బస్సులను నడపటం జరుగుతోందని ఆ సంస్థ తెలిపింది. ఈ మార్గంలో ప్రతి అరగంటకో బస్సు హైదరాబాద్‌లోని ఎంజీబీఎస్‌ నుంచి బయలుదేరుతుందని.. ప్రయాణికులు ఈ సదుపాయాన్ని వినియోగించుకోగలరని విజ్ఞప్తి చేసింది. మరింత సమాచారం కోసం టీఎస్‌ఆర్టీసీ కాల్‌ సెంటర్‌ నంబర్లు 040-69440000, 040-23450033ను సంప్రదించగలరని కోరింది. ఈ మేరకు ఆర్టీసీ ఎండీ ట్విట్టర్‌లో పేర్కొన్నారు.
Updated Date - 2023-07-28T18:02:39+05:30 IST