Navya : పిల్లల దంతారోగ్యం

కౌన్సెలింగ్‌

డాక్టర్‌! మా అబ్బాయి వయసు ఆరేళ్లు. పిల్లల దంతాలు ఆరోగ్యంగా ఉండడం కోసం ఎలాంటి జాగ్రత్తలు పాటించాలి? ఎత్తు పళ్లు రాకుండా ఉండాలంటే ఏం చేయాలి?

- ఓ సోదరి, హైదరాబాద్‌.

• పిల్లలు నోట్లో వేలు పెట్టుకునే అలవాటు వల్ల దంతాలు, దవడల నిర్మాణంలో పొరపాట్లు చోటుచేసుకుంటాయి. కాబట్టి ఆ అలవాటును మాన్పించాలి.

• కొంతమంది పిల్లలకు నాలుకతో దంతాలను నెట్టే అలవాటు ఉంటుంది. ఈ అలవాటును కూడా మాన్పించాలి.

• పాల దంతాలు సమయానికి ఊడకపోవడం వల్ల, ఆ ప్రదేశంలో వచ్చే శాశ్వత దంతాలు వంకరగా పెరుగుతాయి. ఇలా జరగకుండా ఉండాలంటే పాల దంతాలు సరైన సమయంలో ఊడిపోయేలా చూసుకోవాలి. ఇందుకోసం పిల్లలను దంత వైద్యుల చేత పరీక్ష చేయిస్తూ ఉండాలి.

• వంకర పళ్లను సరిచేయించుకోకపోతే, భవిష్యత్తులో వాటిలో ప్లేక్‌ పేరుకుని పుచ్చిపోవడం లాంటి ఇబ్బందులు తలెత్తుతాయి.

ఓరల్‌ హెల్త్‌ ఇలా క్షేమం

• పిల్లలకు చిన్నప్పటి నుంచే పండ్లు, కూరగాయలు తినడం అలవాటు చేయాలి. యాపిల్‌ లాంటి పండ్లతో దంతాలు, చిగుళ్లు శుభ్రపడతాయి.

• క్యాల్షియం సప్లిమెంట్లతో దంతాలు దృఢంగా ఉంటాయి.

• తీపి పదార్థాలను తగ్గించాలి. తిన్న వెంటనే దంతాలు శుభ్రం చేసుకోవాలి.

• శీతల పానీయాలకు దూరంగా ఉండాలి.

• రోజుకు రెండు సార్లు బ్రష్‌ చేసుకోవాలి.

• మెత్తని బ్రిసిల్స్‌ బ్రష్‌నే దంత ధావనానికి ఉపయోగించాలి.

• ప్రతి మూడు నెలలకోసారి టూత్‌బ్రష్‌ను మారుస్తూ ఉండాలి.

• ప్రతి ఆరు నెలలకోసారి దంత వైద్యుల చేత దంతాల ఆరోగ్యాన్ని పరీక్షించుకుంటూ ఉండాలి.

డాక్టర్‌ కడియాల రాజేంద్ర,

ఓరల్‌ అండ్‌ మ్యాక్సిలోఫేసియల్‌ సర్జన్‌,

హైదరాబాద్‌.