Apricot Benefits: ఆరోగ్యదాయిని ఆప్రికాట్‌

ఆప్రికాట్‌ తినడానికి రుచికరంగా ఉంటుంది. దీనితో తయారు చేసే తీపి పదార్థాలను పిల్లలు ఇష్టంగా తింటూ ఉంటారు. రెండు ఆప్రికాట్‌ పండ్లను రాత్రి నీళ్లలో నానబెట్టి రోజూ ఉదయాన్నే తినడంవల్ల అనారోగ్యం దరిచేరదు.

మలబద్దకానికి: ఆప్రికాట్‌లో పీచుపదార్థాలు అధికంగా ఉంటాయి. రోజూ ఈ పండు తినడంవల్ల మలబద్దకం దూరమవుతుంది. దీనిలోని కెరోటినా యిడ్స్‌ పెద్ద పేగు, చిన్న పేగుల్లో క్యాన్సర్‌ రాకుండా చేస్తాయి. జీర్ణాశయంలో సమస్యలను నివారించి జీర్ణక్రియకు సహకరిస్తాయి.

కంటిచూపుకి: ఈ పండులో ఉండే ఎ విటమిన్‌ కంటి సమస్యలను నివారిస్తుంది. రోజూ ఉదయాన్నే ఈ పండు తినడంవల్ల ఫ్రీ రాడికల్స్‌ నుంచి రెటీనాకు రక్షణ లభిస్తుంది. కళ్ల నుంచి నీరు కారడం, కళ్లలో పొరలు పెరగడం వంటి సమస్యలు తలెత్తవు.

గుండెకు: ఆప్రికాట్‌లోని పీచు పదార్థం రక్తంలో చేరిన కొలెస్ట్రాల్‌ను కరిగించి శరీరమంతా రక్తప్రసరణ జరిగేలా చూస్తుంది. దీనివల్ల గుండె జబ్బులు రావు. శరీరంలో మంచి కొలెస్ట్రాల్‌ స్థాయి పెరుగుతుంది. రక్తంలో చక్కెర స్థాయిని అదుపులో ఉంచి మధుమేహం రాకుండా కాపాడతాయి.

ఎముకలకు: తరచూ ఆప్రికాట్‌ను ఆహారంలో చేర్చుకోవడం వల్ల శరీరానికి కావాల్సిన కాల్షియం, మెగ్నీషియం, ఐరన్‌, మాంగనీస్‌, పాస్పరస్‌ లాంటి ఖనిజ లవణాలు అంది ఎముకలు దృఢంగా మారతాయి. కండరాలు పట్టేయడం, కీళ్లనొప్పులు వంటి సమస్యలను నివారిస్తాయి.

వాపులకు: ఆప్రికాట్‌లో యాంటీ ఇన్‌ఫ్లమేటరీ గుణాలు ఉంటాయి. ఇవి శరీర ఉష్ణోగ్రతను నియంత్రణలో ఉంచుతాయి. వెన్ను నొప్పి, మెడనొప్పి, కడుపులో మంట, అరికాలి మంటలు, తిమ్మిర్లు, మోకాళ్ల సమస్యలను నివారిస్తాయి.

చర్మానికి: ఆప్రికాట్‌ను తరచూ తింటూ ఉంటే చర్మం తేమతో నిండి కాంతివంతంగా మారుతుంది. దీనిలోని సి, ఎ, కె విటమిన్లు; ఫైటో న్యూట్రియెంట్స్‌ చర్మానికి పోషణను అందిస్తాయి. మొటిమలు, మచ్చలు రాకుండా చేస్తాయి.