Viral Video: ఇంత జెలసీ ఎంట్రా బాబూ.. గజరాజుకు తోటి ఏనుగుల వేధింపులు!
ABN, Publish Date - Jun 03 , 2024 | 05:31 PM
ఓ ఏనుగుకు ఉన్న కళానైపుణ్యం చూసి ఓర్వ లేని తోటి ఏనుగులు వేధింపులకు దిగాయి. ఇందుకు సంబంధించిన వీడియో ప్రస్తుతం వైరల్ అవుతోంది.
ఇంటర్నెట్ డెస్క్: ఏనుగులకు చాలా తెలివితేటలు ఉంటాయని శాస్త్రవేత్తలు చెబుతున్నారు. బృందాలుగా జీవించే ఏనుగులు రకరకాల భావోద్వేగాలు వ్యక్తం చేస్తాయి. సాటి ఏనుగుల పట్ల జాలి, దయ, బాధలో ఉన్న వాటిని ఓదార్చడం వంటివి చేస్తుంటాయి. అంతేకాదు, బృందంలో ఏ ఏనుగైన మరణిస్తే మిగతా ఏనుగులన్నీ విచారంలో కూరుకుపోతాయి. అయితే, వీటి ఈర్ష్యా అసూయలు కూడా ఉంటాయనేందుకు తాజా ఉదాహరణగా మరో వీడియో వైరల్ (Viral) అవుతోంది.
వీడియోలో కనిపించిన దాని ప్రకారం, ఈ ఏనుగు గొప్ప ఆర్టిస్టు. కుంచె పట్టుకుని అనేక అద్భుత చిత్రాలు గీయగలదు. చెట్లు, చేమలు, జంతువులను అచ్చు మనుషుల్లాగా అద్భుతంగా గీస్తోంది. కానీ ఈ టాలెంట్ యే మిగతా ఏనుగులకు కంటకింపుగా మారింది. దీంతో, మిగతా ఏనుగులు ఆ ఆర్టిస్టు ఏనుగును వేధించడం ప్రారంభించాయి (Elephant with artistic skills ostracised by envious herd).
Viral: పెట్టెలో దొరికిన రూ.85 లక్షలు! పోలీసులకు అప్పగిస్తే.. ఊహించని విధంగా..
చీటికిమాటికీ గొడవపెట్టుకుంటూ టార్చర్ మొదలెట్టాయి. ఓ సందర్భంలో ఏనుగును నీటి కొలనులో తోసేశాయి, మరో సందర్భంలో కింద పడదోశాయి. దాన్ని బృందం నుంచి వెలివేసినంత పని చేశాయి. ఇదంతా చూసిన జూ సిబ్బంది పరిస్థితి మరింతగా దిగజారకముందే దిద్దుబాటు చర్యలకు దిగారు. ఆర్టిస్టు ఏనుగును మంద నుంచి వేరు చేసి మరో స్థలంలో పెట్టారు. దీంతో, దానికి ప్రశాంతత చిక్కి మళ్లీ బొమ్మలేయడంలో నిమగ్నమైపోయింది.
వీడియోలో ఇదంతా చూసిన నెటిజన్లు ఆశ్చర్యపోతున్నారు. జంతువుల మధ్య కూడా మరీ ఇలాంటి వివాదాలు ఉంటాయా అంటూ కొందరు ఆవేదన వ్యక్తం చేశారు. ఈర్ష్యాఅసూయలు లేని జంతువు అంటూ ఉండదేమో అంటూ మరికొందరు విచారం వ్యక్తం చేశారు. ఇలా రకరకాల కామెంట్స్ మధ్య వీడియో వైరల్ గా మారింది.
Updated Date - Jun 03 , 2024 | 06:38 PM
