Chennai police : నటి కస్తూరి అరెస్టు
ABN, Publish Date - Nov 17 , 2024 | 03:15 AM
ఇటీవల తెలుగువారిపై వివాదాస్పద వ్యాఖ్యలు చేసిన సినీ నటి కస్తూరిని చెన్నై పోలీసులు హైదరాబాద్‌లో శనివారం సాయంత్రం అరెస్టు చేశారు.
అదుపులోకి తీసుకున్న చెన్నై పోలీసులు
తెలుగువారిపై తీవ్ర వ్యాఖ్యలతో కేసు
అప్పట్నుంచి అజ్ఞాతంలో ఉన్న నటి
హైదరాబాద్‌లో ఉన్నట్లు గుర్తించి అరెస్టు
హైదరాబాద్‌ సిటీ, నవంబరు 16(ఆంధ్రజ్యోతి): ఇటీవల తెలుగువారిపై వివాదాస్పద వ్యాఖ్యలు చేసిన సినీ నటి కస్తూరిని చెన్నై పోలీసులు హైదరాబాద్‌లో శనివారం సాయంత్రం అరెస్టు చేశారు. ఆమె పుప్పాలగూడలో బీఆర్‌సీ అపార్టుమెంట్‌లో ఉన్నట్లు గుర్తించి.. సైబరాబాద్‌ పోలీసుల సహకారంతో అదుపులోకి తీసుకుని చెన్నై తరలించారు. ఇటీవల చెన్నైలో బ్రాహ్మణ సమాజం సమ్మేళనంలో పాల్గొన్న కస్తూరి తమిళనాడులో స్థిరపడ్డ తెలుగువారిపై అభ్యంతరకర వ్యాఖ్యలు చేశారు. ‘తమిళనాడులోని తెలుగువారు ఊడిగం చేసుకోవడానికి ఉండిపోయారా.. తెలుగువారంటే అంత చిన్నచూపా’ అంటూ పలు తెలుగు సంఘాలు కస్తూరిపై తీవ్రస్థాయిలో మండిపడ్డాయి. ఆందోళనలు చేపట్టాయి. దీంతో ప్రభుత్వంపై ఒత్తిడి పెరగింది. మహాజన సంఘం రాష్ట్ర సభ్యుల ఫిర్యాదు మేరకు చెన్నై పోలీసులు ఆమెపై కేసు నమోదు చేశారు. ఆమె అప్పటి నుంచి అజ్ఞాతంలోకి వెళ్లారు. ఆమె ముందస్తు బెయిల్‌ పిటిషన్‌ను మద్రాసు హైకోర్టు కొట్టివేసింది.
Updated Date - Nov 17 , 2024 | 03:17 AM
