Exams: నవంబరు 17 నుంచి గ్రూపు-3 పరీక్షలు

• 10 నుంచి అభ్యర్థులకు హాల్‌టికెట్లు

హైదరాబాద్‌, అక్టోబరు 30 (ఆంధ్రజ్యోతి) : గ్రూపు-3 పోస్టుల భర్తీకి సంబంధించిన పరీక్షలను నవంబరు 17వ తేదీ నుంచి నిర్వహించనున్నారు. రెండు రోజుల పాటు జరుగనున్న ఈ పరీక్షల ఏర్పాట్లపై అధికారులు దృష్టి సారించారు. అభ్యర్థులు తమ హాల్‌టికెట్లను నవంబరు 10వ తేదీ నుంచి వెబ్‌సైట్‌ నుంచి డౌన్‌లోడ్‌ చేసుకోవచ్చని పబ్లిక్‌ సర్వీసు కమిషన్‌ అధికారులు వెల్లడించారు. రాష్ట్రంలో సుమారు 1365 గ్రూపు-3 పోస్టుల భర్తీకి ప్రభుత్వం నోటిఫికేషన్‌ను జారీ చేసిన విషయం తెలిసిందే. నవంబరు 17, 18వ తేదీల్లో అభ్యర్థులకు ఈ పరీక్షలను నిర్వహించనున్నారు. మొత్తం మూడు పేపర్లకు సంబంధించిన పరీక్షలను అభ్యర్థులు రాయాల్సి ఉంటుంది. 17వ తేదీన మొదటి సెషన్‌లో భాగంగా పేపర్‌-1 పరీక్షను ఉదయం 10 నుంచి 12.30 గంటల వరకు, రెండవ సెషన్‌లో పేపర్‌-2 పరీక్షను మధ్యాహ్నం 3 నుంచి సాయంత్రం 5.30 గంటల వరకు నిర్వహించనున్నారు.

తర్వాత 18వ తేదీన పేపర్‌-3 పరీక్షను ఉదయం 10 నుంచి 12.30 గంటల వరకు నిర్వహిస్తారు. పరీక్ష మొదలయ్యే సమయానికి 30 నిమిషాల ముందుగానే గేట్లను మూసివేస్తారు. అంటే.. ఉదయం సెషన్‌ పరీక్షలకు 9.30 గంటల లోపు, మధ్యాహ్నం సెషన్‌ పరీక్షకు 2.30 గంటలలోపు అభ్యర్థులు పరీక్ష కేంద్రానికి చేరుకోవాల్సి ఉంటుందని అధికారులు స్పష్టం చేశారు. అభ్యర్థులు తమ హాల్‌టికెట్‌ను ఒకసారి డౌన్‌లోడ్‌ చేసుకున్న తర్వాత దాన్నే అన్ని పరీక్షలకు ఉపయోగించుకోవాల్సి ఉంటుంది. ఈ పరీక్షలపై అభ్యర్థులకు ఏమైనా అనుమానాలు ఉన్నా, సమాచారం కావాలన్నా... 040-23542185, 040-23542187 అనే ఫోన్‌ నంబర్లలో సంప్రదించవచ్చని అధికారులు సూచించారు.