Old City Murder Case: డాన్ అయ్యేందుకు మర్డర్.. రౌడీషీటర్ రియాజ్ హత్య కేసులో ట్విస్ట్

హైదరాబాద్, ఆగస్ట్ 14: బాలాపూర్‌లో జరిగిన గ్యాంగ్ స్టర్ రియాజ్ హత్య కేసును ఛేదించామని రాచకొండ పోలీస్ కమిషనర్ సుధీర్ బాబు వెల్లడించారు. బుధవారం ఎల్బీ నగర్‌లోని రాచకొండ పోలీస్ కమిషనర్ క్యాంప్ కార్యాలయంలో ఏర్పాటు చేసిన విలేకర్ల సమావేశంలో సీపీ సుధీర్ బాబు మాట్లాడారు.

8 మంది అరెస్ట్.. పరారీలో ప్రధాన నిందితుడు..

ఈ కేసుకు సంబంధించి ఎనిమిది మంది నిందితులను అరెస్ట్ చేశామన్నారు. ప్రధాన నిందితుడు హమీద్ ప్రస్తుతం పరారీలో ఉన్నాడని తెలిపారు. ఈ రియాజ్ హత్య కోసం రూ.13 లక్షల సుపారీ తీసుకున్నట్లు నిందితులు తమ విచారణలో వెల్లడించారన్నారు. అలాగే నిందితుల నుంచి కంట్రీ మేడ్ గన్, రెండు బుల్లెట్స్, రెండు గొడ్డళ్లుతోపాటు ఓ కత్తిని సైతం స్వాధీనం చేసుకున్నామని తెలిపారు.

Also Read: Kolkata RG Kar Hospital: ట్రైయినీ వైద్యురాలి పోస్ట్‌మార్టం నివేదికలో సంచలన విషయాలు

వివాదానికి మూల కారణం ఇదే..

మీర్‌పేటలో వాటర్ ట్యాంక్ నిర్మించిన స్థల వివాదం వీరి మధ్య ఘర్షణకు అసలు మూల కారణమని వివరించారు. అలా ఈ హత్య కేసులో ప్రధాన నిందితుడు, మృతుని మధ్య గొడవలు రోజురోజుకు పెరిగి పోయాయన్నారు. ఇక మృతుడు రౌడీ షీటర్ రియాజ్.. మీర్‌పేటలో భూ వివాదంపై ఒకరిపై ఒకరు కేసులు సైతం పెట్టుకున్నా విషయాన్ని ఈ సందర్భంగా రాచకొండ సీపీ సుధీర్ బాబు గుర్తు చేశారు.

Also Read: Jammu Kashmir Encounter: ఆర్మీ అధికారి మృతి, నలుగురు ఉగ్రవాదులు హతం..!

ఈ హత్యకు రూ. 13 లక్షల సుపారీ..

ప్రధాన నిందితుడు హమీద్.. గోల్కొండకు చెందిన సలీంకు రూ.13 లక్షల సుపారీ ఇచ్చేందుకు అంగీకరించారన్నారు. ఆ క్రమంలో అడ్వాన్స్‌గా రూ. 2.50 లక్షలు ఇచ్చారని తెలిపారు. ముందుగా హత్యకు పథక రచన చేసి హమీద్.. దుబాయ్‌ వెళ్ళి పోయాడన్నారు. అంతకుముందు సలీం, హమీద్ ఉత్తరప్రదేశ్‌ వెళ్లి.. కంట్రీ మేడ్ గన్‌ కొనుగోలు చేశారని చెప్పారు. ఆ తర్వాత మొయినాబాద్ వద్ద గొడ్డళ్లు, కత్తులు కొనుగోలు చేశారని వివరించారు.

అనంతరం రియాజ్‌ను హత్య చేసేందుకు ముందే రెక్కీ సైతం నిర్వహించారన్నారు. అలా కంచన్‌బాగ్‌లోని ఓ వైన్స్ షాపులో రియాజ్ మద్యం తాగి బైక్‌పై వస్తుండగా... అతడిని కార్‌తో డీకొట్టారని చెప్పారు. ఆ తర్వాత అతడు కింద పడగానే కళ్లలో కారం చల్లి.. అతడిపై కత్తితో పాటు గొడ్డళ్ళతో దాడి చేశారని వివరించారు. అనంతరం గన్‌తో సలీం షూట్ చేయడంతో.. రియాజ్ మరణించాడని తెలిపారు.

ఈ హత్య తర్వాత విజయవాడ.. అటు నుంచి విశాఖ మీదగా భువనేశ్వర్...

ఈ హత్య అనంతరం నిందితులు విజయవాడ చేరుకున్నారని... అక్కడ వారు కారును వదిలి వేసి వైజాగ్‌కు బస్‌లో వెళ్లారని తెలిపారు. అక్కడి నుంచి ఒడిశా రాజధాని భువనేశ్వర్ చేరుకున్నారని.. అక్కడ వారిని వలపన్నీ అరెస్ట్ చేశామని రాచకొండ సీపీ సుధీర్ బాబు వెల్లడించారు. ఈ కేసులో A7గా ఉన్న నిందితుడు ఇనాయత్ ఈ మర్డర్ ప్లాన్‌కి నగదు సమకూర్చినట్లు తమ విచారణలో తేలిందన్నారు. అయితే రియాజ్‌ను హత్య చేస్తే.. తాను డాన్ అవుతానని నిందితుడు హమీద్ భావించాడని సీపీ సుధీర్ బాబు వివరించారు.

Read More National News and Latest Telugu News