Viral News: బస్సు ఆపలేదని డ్రైవర్‌పై పాము విసిరిన వృద్ధురాలు.. హైదరాబాద్‌లో విస్తుపోయే ఘటన

హైదరాబాద్: మహానగరం హైదరాబాద్‌లోని నల్లకుంట విద్యానగర్‌లో షాకింగ్ ఘటన వెలుగుచూసింది. చెయ్యెత్తినా ఆర్టీసీ బస్సును ఆపకపోవడంతో ఓ వృద్ధురాలు తీవ్ర ఆగ్రహంతో బస్సు డ్రైవర్‌పై పాముని విసిరింది. నల్లకుంట పోలీస్ స్టేషన్ పరిధిలోని విద్యానగర్ వద్ద ఈ ఘటన జరిగింది. మద్యం మత్తులో ఉన్న సదరు వృద్ధురాలు ఆర్టీసీ బస్సు ఆపే ప్రయత్నం చేసింది. అయితే డ్రైవర్ బస్సు ఆపకుండా వెళ్లాడు. ఆగ్రహంతో తన వద్ద ఉన్న బీర్ బాటిల్‌తో బస్సుపై దాడి చేసింది. దీంతో బస్సు వెనుక భాగంలోని అద్దం ధ్వంసమైంది. అది గమనించిన డ్రైవర్ వెంటనే బస్సు ఆపాడు. బీర్ బాటిల్‌తో కొట్టిన ఆమెను పట్టుకునేందుకు ప్రయత్నించాడు. అయితే సీన్ రివర్స్ అయ్యింది.

తీవ్ర ఆగ్రహానికి పెద్దావిడ తన వద్ద ఉన్న పాముని బస్సు డ్రైవర్‌పై విసిరింది. భయభ్రాంతులకు గురైన బస్సు డ్రైవర్ అక్కడి నుంచి పారిపోయాడు. ఘటనపై పోలీసులకు ఫిర్యాదు చేశాడు. దీంతో ఫిర్యాదు మేరకు నల్లకుంట పోలీసులు రంగంలోకి దిగారు. స్థానికులు ఆమెను పోలీసులకు అప్పగించారు. కాగా డ్రైవర్‌పైకి పాము విసిరిన వృద్ధురాలి బ్యాగులో మరో రెండు పాములు ఉన్నట్టు పోలీసులు గుర్తించారు.

మల్లారెడ్డి యూనివర్సిటీలో విద్యార్థి మృతి

మేడ్చల్ జిల్లా పేట్ బషీరాబాద్ పోలీస్ స్టేషన్ పరిధిలోని మైసమ్మగూడలో ఉన్న మల్లారెడ్డి యూనివర్సిటీలో అరుణ్ కుమార్ అనే 19 ఏళ్ల విద్యార్థి మృతి చెందాడు. బీఎస్సీ అగ్రికల్చర్ ఫస్ట్ ఇయర్ చదువుతున్నాడు. క్లాసులో సృహతప్పి పడిపోవడంతో అతడిని ఆసుపత్రికి తరలించారు. అయితే విద్యార్థి అప్పటికే చనిపోయాడని వైద్యులు నిర్ధారించారు. అంబులెన్స్ ఆలస్యంగా రావడంతోనే విద్యార్థి మృతి చెందాడంటూ విద్యార్థుల ఆందోళన చేపట్టారు.