1. • Home » Andhra Pradesh » Chittoor » New proposals worth Rs. 669 crore for ‘Althurupadu’

‘ఆల్తూరుపాడు’కు రూ.669 కోట్లతో కొత్త ప్రతిపాదనలు

డక్కిలి మండలం ఆల్తూరుపాడులో 1.4 టీఎంసీల నీటిని నిల్వచేసే సామర్థ్యంతో రిజర్వాయరు నిర్మాణానికి కొత్తగా రూ.669 కోట్లతో ప్రతిపాదనలు సిద్ధం అయ్యాయి.

వెంకటగిరి, ఏప్రిల్‌ 7(ఆంధ్రజ్యోతి): డక్కిలి మండలం ఆల్తూరుపాడులో 1.4 టీఎంసీల నీటిని నిల్వచేసే సామర్థ్యంతో రిజర్వాయరు నిర్మాణానికి కొత్తగా రూ.669 కోట్లతో ప్రతిపాదనలు సిద్ధం అయ్యాయి. త్వరలోనే టెండర్లు పిలవనున్నారు. సోమశిల-స్వర్ణముఖి కాలువ నిర్మాణంలో భాగంగా ఆల్తూరుపాడు రిజర్వాయరు పనులను 2019లో అప్పటి టీడీపీ ప్రభుత్వం రూ.310 కోట్లతో మొదలు పెట్టింది. వైసీపీ అధికారంలోకి వచ్చాక రీ టెండరు పిలిచారు. 26 శాతం లెస్‌కు కాంట్రాక్టు దక్కించుకున్న కడపకు చెందిన ఓ కాంట్రాక్టరు పనులు మొదలు పెట్టలేదు. దీంతో ఈ రిజర్వాయరును వైసీపీ ప్రభుత్వం రద్దు చేసింది. చంద్రబాబు సీఎం కాగానే.. ఈ ప్రాజెక్టుకు కొత్తగా ప్రతిపాదనలు సిద్ధం చేయాఆలని ఆదేశించారు. ఈ కొత్త ప్రతిపాదనలను ఒకట్రెండు రోజుల్లో ప్రభుత్వానికి పంపనున్నారు. వచ్చే నెలలో టెండర్లు పిలిచే అవకాశం ఉంది. ఈ రిజర్వాయరు పూర్తయితే వెంకటగిరి, శ్రీకాళహస్తి నియోజకవర్గాల్లో 97 వేల ఎకరాలకు సాగు నీరు.. శ్రీకాళహస్తి, తిరుపతి, తిరుమలకు తాగునీటి అవసరాలు తీరనున్నాయి. ఈ కొత్త ప్రతిపాదనలను సోమవారం వెంకటగిరిలో ఎమ్మెల్యే కురుగొండ్ల రాధాకృష్ణకు తెలుగుగంగ ఈఈ రాధాకృష్ణ అందజేశారు. ఈ సందర్భంగా ఎమ్మెల్యే మాట్లాడుతూ.. ఈ రిజర్వాయరును జగన్‌ ప్రభుత్వం అడ్డుకోవడంతో నిర్మాణ వ్యయం పెరిగిందన్నారు. మట్టికట్టకు అవసరమైన 50 లక్షల క్యూబిక్‌ మీటర్ల మట్టిని డక్కిలి, బాలాయపల్లి, వెంకటగిరి మండలాల్లోని చెరువుల్లో తీసుకుంటామన్నారు. ఈ సమావేశంలో తెలుగుగంగ డీఈ విజయరామిరెడ్డి, ఏఈ తిరుమలయ్య తదితరులున్నారు.