North East Discovery: సెవెన్ సిస్టర్స్ అద్భుతాల్ని తరిస్తారా.. లక్కీ ఛాన్స్

IRCTC's 15-day 'North East Discovery' Tour: ఇండియన్ రైల్వే క్యాటరింగ్ అండ్ టూరిజం కార్పొరేషన్ లిమిటెడ్ (IRCTC) ప్రకృతి సౌందర్యాలకు నెలవైన ఈశాన్య రాష్ట్రాల సందర్శనకు అవకాశం కల్పిస్తోంది. "నార్త్ ఈస్ట్ డిస్కవరీ" పేరిట జరిగే ఈ రైలు ప్రయాణంలో ఏడు ఈశాన్య రాష్ట్రాల్లోని అద్భుతమైన ప్రదేశాల్ని చూపిస్తారు. ఏప్రిల్ 22, 2025న ఢిల్లీలోని సఫ్దర్‌జంగ్ రైల్వే స్టేషన్ నుండి 'భారత్ గౌరవ్ డీలక్స్ AC టూరిస్ట్ ట్రైన్' ప్రారంభమవుతుంది. ఈ 15 రోజుల పర్యటనలో వివిధ ఈశాన్య రాష్ట్రాల సహజ సౌందర్యం, సాంస్కృతిక వారసత్వం ప్రత్యక్షంగా చూపిస్తారు.

ఢిల్లీతో పాటు ఘజియాబాద్, అలీఘర్, తుండ్లా, ఎటావా ఇంకా కాన్పూర్ వంటి అదనపు బోర్డింగ్ ప్రదేశాల నుండి కూడా ఆసక్తిగల ప్రయాణికులు తమ జర్నీ స్టార్ట్ చేసే అవకాశ ఉంది. ఈ 15-రోజుల టూర్ ప్యాకేజీ ప్రయాణంలో అస్సాంలోని గౌహతి, శివసాగర్, జోర్హాట్, కజిరంగలోని ప్రసిద్ధ ప్రదేశాల్ని చూపిస్తారు. తర్వాత అరుణాచల్ ప్రదేశ్‌లోని ఇటానగర్, త్రిపురలోని ఉనకోటి, ఉదయపూర్ లోని టూరిస్ట్ ప్లేసెస్ తర్వాత దిమాపూర్, కోహిమా, మేఘాలయలోని షిల్లాంగ్, చిరపుంజిలను కవర్ చేస్తారు.

ఈ రైలు మొదటి స్టాప్ గౌహతి, ఇక్కడ పర్యాటకులు కామాఖ్య ఆలయాన్ని సందర్శిస్తారు. తరువాత వారు ఉమానంద ఆలయాన్ని సందర్శించి బ్రహ్మపుత్రలో సూర్యాస్తమయాన్ని సందర్శిస్తారు. ఆ తర్వాత రైలు అరుణాచల్ ప్రదేశ్ రాజధాని ఇటానగర్ నుండి 30 కి.మీ దూరంలో ఉన్న నహర్లగున్ రైల్వే స్టేషన్‌కు రాత్రిపూట ప్రయాణంలో బయలుదేరుతుంది. తదుపరి అస్సాం తూర్పు భాగంలో ఉన్న అహోం రాజ్యం యొక్క పాత రాజధాని శివసాగర్ చేరుకుంటుంది. శివసాగర్‌లోని ప్రసిద్ధ శివాలయం(శివడోల్‌), తలాతల్, రంగ్ ఘర్ వంటి ఇతర వారసత్వ ప్రదేశాలు తీసుకెళ్తారు.

తర్వాత జోర్హాట్‌లోని టీ తోటలు చూపించి కరాంగ్‌లో రాత్రి బస చేస్తారు. తరువాత కాజిరంగ జాతీయ ఉద్యానవనంలో తెల్లవారుజామున అడవి సఫారీ ఉంటుంది. తదుపరి రైలు త్రిపుర రాష్ట్రానికి చెందిన ఫుర్కేటింగ్ రైల్వే స్టేషన్ నుండి బయలుదేరుతుంది. కుమార్‌ఘాట్ రైల్వే స్టేషన్‌లో దిగిన తర్వాత, ఉనకోటి (అంగ్కోర్ వాట్) వారసత్వ ప్రదేశాన్ని సందర్శిస్తారు. తరువాత అగర్తలా వెళతారు.

ఉదయపూర్‌లోని ప్రసిద్ధ ఉజ్జయంత ప్యాలెస్, నీర్మహల్ ప్యాలెస్, త్రిపుర సుందరి మందిర్ సదర్శన ఉంటుంది. త్రిపుర తర్వాత, రైలు.. నాగాలాండ్ కి వెళ్తుంది. దిమాపూర్‌ నుంచి బదర్‌పూర్ స్టేషన్, లుమ్డింగ్ జంక్షన్ మధ్య సుందరమైన రైలు ప్రయాణాన్ని తెల్లవారుజామున అతిథులు తమ సీట్ల నుండి వీక్షించవచ్చు. దిమాపూర్ స్టేషన్ నుండి, పర్యాటకులను స్థానిక ప్రదేశాలను సందర్శించడానికి బస్సులో కోహిమాకు తీసుకెళ్తారు. నాగ తెగల జీవన విధానాన్ని ప్రత్యక్షంగా చూపించేందుకు ఖోనోమా గ్రామ పర్యటన ఉంటుంది.

పర్యాటక రైలుకు తదుపరి హాల్ట్ గౌహతి. తరువాత, పర్యాటకులను రోడ్డు మార్గంలో మేఘాలయ రాజధాని నగరం షిల్లాంగ్‌కు తీసుకెళ్తారు. మార్గంలో గంభీరమైన ఉమియం సరస్సు వద్ద పిట్ స్టాప్ ఉంటుంది. మరుసటి రోజు తూర్పు ఖాసీ కొండలలో ఉన్న చిరాపుంజీకి విహారయాత్రతో డే ప్రారంభమవుతుంది. షిల్లాంగ్ కొండ, ఎలిఫెంట్ జలపాతం, నవ్‌ఖలికై జలపాతం, మావ్‌స్మై గుహలు సందర్శనతో ఆరోజు పూర్తవుతుంది. ఇక, చిరాపుంజీ నుండి, పర్యాటకులు ఢిల్లీకి తిరుగు ప్రయాణం కోసం రైలు ఎక్కడానికి గౌహతి స్టేషన్‌కు తిరిగి వెళతారు. రైలులో ఈ మొత్తం పర్యటనలో టూరిస్టులు దాదాపు 5,800 కి.మీ. ప్రయాణం చేస్తారు.

డీలక్స్ AC టూరిస్ట్ రైలు

ఆధునిక డీలక్స్ AC టూరిస్ట్ రైలులో రెండు ఫైన్-డైనింగ్ రెస్టారెంట్లు, సమకాలీన ఫైర్ లెస్ వంటగది, కోచ్‌లలో షవర్ క్యూబికల్స్, సెన్సార్ ఆధారిత వాష్‌రూమ్ ఫంక్షన్లు, ఫుట్ మసాజర్లు, ఒక మినీ లైబ్రరీ వంటి అద్భుతమైన సౌకర్యాలున్నాయి. పూర్తిగా ఎయిర్ కండిషన్డ్ రైలు AC I (సుపీరియర్), AC II (డీలక్స్), AC III (కంఫర్ట్) అనే మూడు రకాల వసతిని అందిస్తున్నారు. ఈ రైలు CCTV కెమెరాలు, ఎలక్ట్రానిక్ సేఫ్‌లు, ప్రతి కోచ్‌కు అంకితభావంతో కూడిన, నిరాయుధులైన సెక్యూరిటీ గార్డులు వంటి మెరుగైన భద్రతను ఇస్తారు. 'భారత్ గౌరవ్' టూరిస్ట్ రైలు.. దేశీయ పర్యాటకాన్ని ప్రోత్సహించడానికి భారత ప్రభుత్వం చేపట్టిన "ఏక్ భారత్ శ్రేష్ఠ భారత్", "దేఖో అప్నా దేశ్" కార్యక్రమాలకు అనుగుణంగా రూపొందించారు.

టికెట్ ధరలు

AC 1 (కపుల్)కి ఒక్కొక్కరికి ₹1,67,845, AC1 (క్యాబిన్)కి వ్యక్తికి ₹1,49,815, AC 2 టైర్‌లో వ్యక్తికి ₹1,29,915, AC III లో ఒక్కొక్కరికి 1,16,905 రూపాయలు. IRCTC టూరిస్ట్ రైలు 15 రోజుల ఖర్చులన్నీ కలిసి టూర్ ప్యాకేజీగా ఉంటుంది. ధర.. సంబంధిత తరగతిలో రైలు ప్రయాణం, AC హోటళ్లలో రాత్రి బస, అన్ని భోజనాలు (శాఖాహారం మాత్రమే), బస్సులలో సందర్శనా స్థలాల దర్శనం, ప్రయాణ బీమా, గైడ్ సేవలు మొదలైన సర్వ సౌకర్యాలు కల్పిస్తారు.

Read Also: AI Aadhaar card: బీ అలర్ట్.. AIతో నకిలీ ఆధార్ కార్డులు.. ఎలా గుర్తించాలంటే..

ఇది కదా టెక్నాలజీ అంటే.. 3Dతో 6 గంటల్లోనే రైల్వే స్టేషన్ కట్టేశారు..

AC Buying Tips: ఇన్వర్టర్ AC vs నాన్-ఇన్వర్టర్ AC.. రెండింటిలో ఏది బాగా కూల్ చేస్తుంది..