1. • Home » Andhra Pradesh » Chandrababu angry with Jagan bbr

Chandrababu: చెత్త సీఎం.. చెత్త వ్యవస్థ: చంద్రబాబు

ఈ చేత కాని దద్దమ్మ పాలనలో రైతులకు గోడు పట్టించుకోవడం లేదు. ఈ చెత్త సీఎం, ఒక చెత్త వ్యవస్థను తీసుకువచ్చాడు.

ఏలూరు: ‘‘ఈ చేత కాని దద్దమ్మ పాలనలో రైతులకు గోడు పట్టించుకోవడం లేదు. ఈ చెత్త సీఎం, ఒక చెత్త వ్యవస్థను తీసుకువచ్చాడు. భరోసా కేంద్రం కాదది దగా కేంద్రం. కరోనా సమయంలో అందరూ ఇళ్ళల్లోనే ఉన్నా రైతు పొలంలో కాలు పెట్టబట్టే అందరికి అన్నం దక్కింది. రైతులకు ఇంతటి విపత్తు వస్తే అధికారంలో లేని నేనే వచ్చాను. మీరెందుకు రాలేదు. మాట్లాడితే బటన్‌ నొక్కుతా అంటావ్‌గా, ఇప్పుడొచ్చి నొక్కు. ఉత్తుత్తి బటన్‌ నొక్కడం కాదు.. సీఎం అంటే ఉపయోగపడేలా ఉండాలి. ఇప్పుడో ఇంకా సేపో నా దగ్గరికి పోలీసులు వస్తారు. మీ మీద కేసులు ఉన్నాయి సార్‌ అంటారు. నేనేం జడవను. ఏం పీక్కుంటాడో పీక్కోమని చెప్తా. ఈ సీఎంను, మంత్రులు ఎమ్మెల్యేలను తరిమి తరిమి కొట్టించుకోక ముందే రైతులకు న్యాయం చేయాలని డిమాండ్‌ చేస్తున్నాను. పది కిలోమీటర్లు రోడ్డు మీద వెళ్ళలేక ఈ సీఎం విమానం ఎక్కాడట. పాదయాత్రలో ఎలా తిరిగావ్‌ ? ఇప్పుడు వచ్చి పలకరించడానికి తీరికలేదా?’’ అంటూ సీఎం జగన్‌ (CM Jagan) తీరును, రాష్ట్ర ప్రభుత్వ వైఖరిని టీడీపీ అధినేత చంద్రబాబు (Chandrababu) తూర్పారబట్టారు. ఏలూరు జిల్లా (Eluru District) ఉంగుటూరు మండలం నాచుగుంటలో అకాల వర్షాలకు నష్టపోయిన కౌలు రైతులను ఆయన గురువారం పరామర్శించారు. అధికారుల లంచావతారాలు, కన్నెత్తి చూడని నాయకుల వ్యవహారాలు రైతుల కష్టాలు, తదితర వివరాలను ఆయన అడిగి తెలుసుకున్నారు.

అసమర్థ వ్యక్తి సీఎం అయితే

‘ధాన్యం మొత్తం మొలకలు వచ్చాయి. పంట అంతా తడిసి నాశనమైంది. దీనికి రైతు కారణమా ? అకాల వర్షాలు వరదలు అనేవి వాతావరణ శాఖ ద్వారా ముందుగానే తెలుసుకుని ఫోర్‌ కాస్ట్‌ చేయొచ్చు. వ్యవసాయశాఖ ద్వారా ఎక్కడెక్కడ ఏ ఏ పంటలు వేశారు ? ఎక్కడెక్కడ కోతలు జరుగుతున్నాయి ? అన్నది తెలుసుకోవచ్చు. ఇవన్ని అధికారులకు మంత్రులకు తెలిసే జరుగుతుంటాయి. అయినా ఈ ప్రభుత్వానికి ముందస్తు జాగ్రత్త తీసుకోవాలి అనిపించలేదు. హుద్‌హుద్‌ తుఫాన్‌ విషయంలో ముందస్తు సమాచారం తెలుసుకొని మరీ నేను స్పందిచాను. అందరికంటే ముందుగా నేనే విశాఖ కలెక్టరేట్‌లో అడుగుపెట్టాను. అప్పటి విశాఖను చక్కదిద్దే బాధ్యత తీసుకుంటుండగా జగన్‌ను విశాఖకు ఎందుకు రాలేదని కొందరడిగితే ఆయన విచిత్రమైన సమాధానం ఇచ్చారు. అధికారంలో ఉన్నది బాబు కదా ఆయనే చూసుకుంటారు, నేనేందుకు వెళ్ళడం అని మాట్లాడిన జగన్‌ను నేనిప్పుడు ప్రశ్నిస్తున్నాను. ఈ విపత్తు కాలంలో మీరెందుకు రాలేదు. ఆ బాధ్యత మీకు లేదా ? ఒక అసమర్థుడైన వ్యక్తి సీఎం అయితే ఎంతటి ప్రమాదమో అందరికి తెలుస్తుంది’ అని చంద్రబాబు అన్నారు.