Dwane Bravo: మినీ ఐపీఎల్‌లో వెస్టిండీస్ స్టార్ భారీ సిక్సర్లు
ABN, First Publish Date - 2023-07-17T18:12:28+05:30
ఐపీఎల్ తరహాలో మేజర్ లీగ్ క్రికెట్ టోర్నీ కూడా అభిమానులకు కావాల్సినంత వినోదాన్ని అందిస్తోంది. ఈ నేపథ్యంలో ఆదివారం వాషింగ్టన్ ఫ్రీడమ్ జట్టుతో టెక్సాస్ సూపర్ కింగ్స్ తలపడ్డ మ్యాచ్‌లో కెప్టెన్ డ్వేన్ బ్రావో కొట్టిన ఓ సిక్సర్ మేజర్ లీగ్ క్రికెట్ టోర్నీలోనే భారీ షాట్‌గా నిలిచిపోయింది.
ఇండియన్ ప్రీమియర్ లీగ్(IPL)కు ప్రపంచ వ్యాప్తంగా ఎంత ఆదరణ ఉంటుందో ప్రత్యేకంగా చెప్పాల్సిన అవసరం లేదు. ఈ నేపథ్యంలో భారతీయులు అధికంగా నివసించే అమెరికా(USA) లాంటి అగ్రరాజ్యంలో కూడా టీ20 లీగ్‌ను నిర్వహిస్తున్నారు. ఈ టోర్నీ పేరు అధికారికంగా మేజర్ లీగ్ క్రికెట్ (Major League Cricket) టోర్నీ అయినా అందరూ మినీ ఐపీఎల్ అనే భావిస్తున్నారు. ఎందుకంటే ఐపీఎల్‌లో ఆడుతున్న చెన్నై సూపర్ కింగ్స్ (Chennai Super Kings), ముంబై ఇండియన్స్ (Mumbai Indians) ఫ్రాంచైజీలు మేజర్ లీగ్ క్రికెట్‌లోనూ ప్రాతినిధ్యం వహిస్తున్నాయి. టెక్సాస్ సూపర్ కింగ్స్ పేరుతో చెన్నై సూపర్ కింగ్స్, ఎంఐ న్యూయార్క్ పేరుతో ముంబై ఇండియన్స్ ఈ టోర్నీలో అడుగుపెట్టాయి. టెక్సాస్ సూపర్ కింగ్స్ టీమ్‌కు సీఎస్కే మాజీ ఆటగాడు డ్వేన్ బ్రావో (Dwane Bravo) నాయకత్వం వహిస్తున్నాడు.
ఐపీఎల్ తరహాలో మేజర్ లీగ్ క్రికెట్ టోర్నీ కూడా అభిమానులకు కావాల్సినంత వినోదాన్ని అందిస్తోంది. ఈ నేపథ్యంలో ఆదివారం వాషింగ్టన్ ఫ్రీడమ్ జట్టుతో టెక్సాస్ సూపర్ కింగ్స్ తలపడ్డ మ్యాచ్‌లో కెప్టెన్ డ్వేన్ బ్రావో అజేయ హాఫ్ సెంచరీతో అదరగొట్టాడు. 39 బంతుల్లో 5 ఫోర్లు, 6 సిక్సులతో 76 పరుగులు చేశాడు. ఈ మ్యాచ్‌లో అతడు కొట్టిన ఓ భారీ సిక్స్ మేజర్ లీగ్ క్రికెట్ టోర్నీలోనే భారీ షాట్‌గా నిలిచిపోయింది. వాషింగ్టన్ ఫ్రీడమ్ బౌలర్ అన్రిచ్ నోకియా వేసిన 18వ ఓవర్‌లో ఓ షార్ట్ పిచ్ బాల్‌ను బ్రావో తనదైన పుల్ షాట్‌తో భారీ సిక్సర్‌గా మలిచాడు. ఈ బాల్ 106 మీటర్ల దూరంలో పడింది. ఈ భారీ సిక్సర్‌‌కు క్రికెట్ అభిమానులు ఫిదా అవుతున్నారు. బ్రావో భారీ సిక్సర్ అదిరిపోయిందంటూ సోషల్ మీడియాలో కామెంట్ చేస్తున్నారు.
ఇది కూడా చదవండి: ఐర్లాండ్ పర్యటనకు రాహుల్ ద్రావిడ్ దూరం.. మరి టీమిండియా హెడ్ కోచ్ ఎవరంటే..?
కాగా ఈ మ్యాచ్‌లో టాస్ గెలిచి బ్యాటింగ్ ఎంచుకున్న వాషింగ్టన్ ఫ్రీడమ్ టీమ్ నిర్ణీత 20 ఓవర్లలో 5 వికెట్లకు 163 పరుగులు చేసింది. మాథ్యూ షార్ట్ (50 బాల్స్‌లో 10 ఫోర్లు, 3 సిక్స్‌లతో 80) హాఫ్ సెంచరీతో చెలరేగాడు. టెక్సాస్ బౌలర్లలో గెరాల్డ్ కోయిట్జీ రెండు వికెట్లు తీయగా.. మిచెల్ సాంట్నర్, డ్వేన్ బ్రావో, మహమ్మద్ మోషీన్ తలో వికెట్ సాధించారు. అనంతరం లక్ష్యచేధనకు దిగిన టెక్సాస్ సూపర్ కింగ్స్ నిర్ణీత ఓవర్లలో 8 వికెట్లకు 157 పరుగులే చేసింది. డ్వేన్ బ్రావో మినహా ఇతర ఆటగాళ్లు రాణించలేదు. డుప్లెసిస్ (14), డేవిడ్ మిల్లర్ (14) విఫలమయ్యారు. వాషింగ్టన్ ఫ్రీడమ్ బౌలర్లలో మార్కో ఎన్‌సన్, అకీల్ హుస్సేన్ రెండేసి వికెట్లు తీయగా.. సౌరభ్, హెన్రీక్స్, డేన్ తలో వికెట్ పడగొట్టారు.
Updated Date - 2023-07-17T18:13:19+05:30 IST