Mohammed Shami: అర్జున అవార్డు రేసులో మహ్మద్ షమీ
ABN, Publish Date - Dec 14 , 2023 | 10:46 AM
టీమిండియా సీనియర్ పేసర్ మహ్మద్ షమీ ప్రస్తుతం సూపర్ ఫామ్‌లో ఉన్నాడు. గత నెలలో ముగిసిన వన్డే ప్రపంచకప్‌లో అయితే విశ్వరూపం చూపించాడు. ఒక ఫైనల్ మ్యాచ్ మినహా మిగతా మ్యాచ్‌ల్లో బంతి వేస్తే వికెట్ అన్నట్టుగా సాగింది షమీ బౌలింగ్.
టీమిండియా సీనియర్ పేసర్ మహ్మద్ షమీ ప్రస్తుతం సూపర్ ఫామ్‌లో ఉన్నాడు. గత నెలలో ముగిసిన వన్డే ప్రపంచకప్‌లో అయితే విశ్వరూపం చూపించాడు. ఒక ఫైనల్ మ్యాచ్ మినహా మిగతా మ్యాచ్‌ల్లో బంతి వేస్తే వికెట్ అన్నట్టుగా సాగింది షమీ బౌలింగ్. మొదటి 4 మ్యాచ్‌లకు దూరంగా పెట్టిన ఏ మాత్రం నిరాశ చెందని షమీ అవకాశం వచ్చిన వెంటనే తన సత్తా ఏంటో చూపించాడు. టోర్నీ మొత్తంలో మిగతా బౌలర్ల కంటే తక్కువగా 7 మ్యాచ్‌లే ఆడాడు. అయినప్పటికీ ఈ సీజన్‌లో అత్యధిక వికెట్లు తీసిన బౌలర్‌గా నిలిచాడు. ఆడిన 7 మ్యాచ్‌ల్లో షమీ 24 వికెట్లు పడగొట్టాడు. టీమిండియా ఫైనల్ చేరడంలో కీలకపాత్ర పోషించిన షమీపై అంతా ప్రశంసలు కురిశాయి. అయితే షమీ అత్యుత్తమ ప్రదర్శనకు మెచ్చిన బీసీసీఐ ఈ ఏడాది అర్జున అవార్డుకు అతని పేరును సిఫారసు చేసినట్టు సమాచారం. కేంద్ర క్రీడా మంత్రిత్వ శాఖ వర్గాల నుంచి అందిన సమాచారం ప్రకారం షమీ పేరును దేశ రెండో అత్యున్నత క్రీడా పురస్కారమైన అర్జున అవార్డు జాబితాలో చేర్చాలని బీసీసీఐ కోరింది.
కాగా మేజర్ ధ్యాన్ చందర్ ఖేల్‌రత్న, అర్జున అవార్డులతో సహా ఈ సంవత్సరం క్రీడా పురస్కారాల విజేతలను నిర్ణయించడానికి కేంద్ర మంత్రిత్వ శాఖ 12 మంది సభ్యుల కమిటీని ఏర్పాటుచేసింది. ఈ కమిటీకి సుప్రీంకోర్టు రిటైర్డ్ జస్టిస్ ఏఎం ఖాన్విల్కర్ నేతృత్వం వహించనున్నారు. ఈ కమిటీలో ఆరుగురు మాజీ అంతర్జాతీయ అథ్లెట్లు కూడా ఉన్నారు. హాకీ ప్లేయర్ ధనరాజ్ పిళ్లే, మాజీ పాడ్లర్ కమలేష్ మెహతా, మాజీ బాక్సర్ అఖిల్ కుమార్, మహిళా షూటర్, ప్రస్తుత జాతీయ కోచ్ షుమా షిరూర్, మాజీ క్రికెటర్ అంజుమ్ చోప్రా, బ్యాడ్మింటన్ ప్లేయర్ త్రిప్తి ముర్గుండే, పవర్‌లిఫ్టర్ ఫర్మాన్ పాషా కూడా ప్యానెల్‌లో ఉన్నారు. ఇక ప్రస్తుతం విశ్రాంతిలో ఉన్న మహ్మద్ షమీ సౌతాఫ్రికా పర్యటనలో జరుగుతున్న వైట్ బాల్ సిరీస్‌కు దూరంగా ఉన్నాడు. ఈ గ్యాప్‌లో గతంలో అయిన చీలమండ గాయానికి షమీ చికిత్స కూడా తీసుకుంటున్నాడు. ఈ నెల 26 నుంచి సౌతాఫ్రికాతో రెండు మ్యాచ్‌ల టెస్టు సిరీస్ ప్రారంభంకానుంది. అప్పటివరకు షమీ కోలుకుంటే భారత జట్టులో చేరనున్నాడు. లేదంటో మళ్లీ ఇంగ్లండ్‌తో సిరీస్‌కే షమీ జట్టులోకి రానున్నాడు.
Updated Date - Dec 14 , 2023 | 10:46 AM
