Raghunandanrao: వాళ్ల కోసం కొట్లాడుతా.. పోరాడుతా.. సాధిస్తా
ABN, First Publish Date - 2023-06-10T12:39:20+05:30
దుబ్బాక పేరును విశ్వనగరంలో మారుమ్రోగించిన ఘనత జీనుప్యాంట్, రబ్బర్ చెప్పుల యువతదే అని ఎమ్మెల్యే రఘునందన్ రావు అన్నారు.
సిద్దిపేట: దుబ్బాక పేరును విశ్వనగరంలో మారుమ్రోగించిన ఘనత జీనుప్యాంట్, రబ్బర్ చెప్పుల యువతదే అని ఎమ్మెల్యే రఘునందన్ రావు (MLA Raghunandan Rao) అన్నారు. శనివారం దుబ్బాక పట్టణంలోని రజినీకర్ రెడ్డి ఫంక్షన్ హాల్ లో "సింధుభారతి ఫౌండేషన్" ఆధ్వర్యంలో మెగా జాబ్ మేళాను ఎమ్మెల్యే నిర్వహించారు. అధిక సంఖ్యలో నిరుద్యోగ యువతీయువకులు జాబ్ మేళాలో పాల్గొన్నారు. ఈ సందర్భంగా రఘునందన్ రావు మాట్లాడుతూ.. తన గెలుపుకు ఎలా సహకరించారో యువతను కూడా తన కాళ్లమీద నిలబెట్టడమే లక్ష్యమన్నారు. కోడి గుడ్డు మీద ఈకలు పీకే వారి మాటలు ఎవ్వరూ పట్టించుకోవద్దని వ్యాఖ్యలు చేశారు. 500 రూపాయలతో సిద్దిపేటలో ఉపాధ్యాయునిగా పనిచేసి ఈ రోజు ఎమ్మెల్యే స్థాయిలో ఉన్నానని.. యువత కూడా అలాగే ఎదగాలని ఆకాంక్షించారు. జాబ్ మేళాలో ఎక్కడ అవకాశం వస్తే అక్కడ మొదటి అడుగు వేయాలన్నారు. దుబ్బాక నియోజకవర్గంలో నిరుద్యోగాన్ని పారద్రోలడమే తన ప్రయత్నమని.. అందుకు అందరూ సహకరించాలని కోరారు. తనను గెలిపించిన నియోజకవర్గ ప్రజలకు తన శరీరంలో చివరి రక్తపు బొట్టు వరకు ప్రభుత్వంతో కొట్లాడుతా.. పోరాడుతా.. సాధిస్తా అని ఎమ్మెల్యే రఘునందన్ రావు స్పష్టం చేశారు.
Updated Date - 2023-06-10T12:39:20+05:30 IST