పురిటిల్లు
ABN , Publish Date - Jul 08 , 2024 | 05:48 AM
చిన్నారి నవ్వింది బాంబు ఫ్యూజ్‌ మాడిపోయింది కొండ మీది సూర్యుడు కోటి చేతులతో మందుగుండు గుప్పిస్తున్నాడు పాల బువ్వతో...
చిన్నారి నవ్వింది
బాంబు ఫ్యూజ్‌ మాడిపోయింది
కొండ మీది సూర్యుడు
కోటి చేతులతో మందుగుండు గుప్పిస్తున్నాడు
పాల బువ్వతో తల్లి నిప్పును
నీరు గార్పించింది
నేల మాళిగలు
జన హృదయాలను
అస్త్రాలుగా మలుస్తున్నాయి
అవి తెల్ల మేడ గుండెల్లో పేలుతున్నాయి
చెట్లు ఆయుధాలను పూస్తున్నాయి
ఆత్మీయతలను కాస్తున్నాయి
సామూహిక బలిదానాలు
భూగర్భాన్ని మానవీకరిస్తున్నాయి
కలిసి బతికేచోట కలలు పూలవనాలవుతాయి
దాడులను దండలుగా ధరించిన నేలలో
ప్రాణాలు పోరు బాణాలవుతున్నాయి
నేటి నెత్తుటి మడుగులు
రేపటి రెక్కల వినువీధి విహారాలు
విశ్వం నిరంతర యుద్ధ భూమి
మానుష అమానుషాల సమర క్షేత్రం
ప్లస్‌ మైనస్సుల కదన సీమ
రక్త ప్రసవంలో మనిషిని కనే పురిటిల్లు
నిజం
