NTA : యూజీసీ-నెట్‌ పరీక్ష రద్దు
ABN, Publish Date - Jun 20 , 2024 | 03:44 AM
నీట్‌ పరీక్ష ర్యాంకింగ్‌లు, గ్రేస్‌ మార్కుల వ్యవహారంతో అబాసుపాలై.. సుప్రీంకోర్టు ఆగ్రహానికి గురవుతున్న జాతీయ పరీక్షల నిర్వహణ సంస్థ(ఎన్‌టీఏ) తాజాగా మరో అపవాదును మూటగట్టుకుంది.
పరీక్ష సమగ్రతపై ఐ4సీ హెచ్చరికలు.. రద్దు చేస్తున్నట్లు ప్రకటించిన కేంద్రం
తదుపరి పరీక్ష తేదీ త్వరలో ప్రకటన.. బీజేపీపై ప్రియాంక గాంధీ ఫైర్‌
న్యూఢిల్లీ, జూన్‌ 19: నీట్‌ పరీక్ష ర్యాంకింగ్‌లు, గ్రేస్‌ మార్కుల వ్యవహారంతో అబాసుపాలై.. సుప్రీంకోర్టు ఆగ్రహానికి గురవుతున్న జాతీయ పరీక్షల నిర్వహణ సంస్థ(ఎన్‌టీఏ) తాజాగా మరో అపవాదును మూటగట్టుకుంది. ఆ సంస్థ దేశవ్యాప్తంగా నిర్వహించిన యూజీసీ-నెట్‌ పరీక్షను రద్దు చేస్తున్నట్లు కేంద్ర విద్యాశాఖ బుధవారం రాత్రి ప్రకటించింది. దేశంలోని విశ్వవిద్యాలయాలు, కళాశాలల్లో జూనియర్‌ రిసెర్చ్‌ ఫెలో(జేఆర్‌ఎఫ్‌), పీహెచ్‌డీ ప్రవేశాలు, అసిస్టెంట్‌ ప్రొఫెసర్‌ కొలువులకు అర్హతకు ఎన్‌టీఏ ఏటా జూన్‌, డిసెంబరు సెషన్లలో జాతీయ అర్హత పరీక్ష(యూజీసీ-నెట్‌)ను నిర్వహిస్తున్న విషయం తెలిసిందే..! జూన్‌ సెషన్‌కు సంబంధించి దేశవ్యాప్తంగా మంగళవారం రెండు షిఫ్టుల్లో పరీక్షలు జరిగాయి.
11 లక్షల మంది అభ్యర్థులు ఈ సెషన్‌కు దరఖాస్తు చేసుకోగా.. తొమ్మిది లక్షల మంది పరీక్ష రాశారు. అయితే.. కేంద్ర హోంమంత్రిత్వ శాఖ పరిధిలో పనిచేసే సైబర్‌ క్రైమ్ హెచ్చరికల విశ్లేషణ యూనిట్‌-- ఇండియన్‌ సైబర్‌ క్రైమ్ కోఆర్డినేషన్‌ సెంటర్‌(ఐ4సీ) యూజీసీ-నెట్‌ పరీక్ష సమగ్రతకు భంగం(లీకేజీ అనుమానాలు!) వాటిల్లినట్లు బుధవారం కేంద్ర ప్రభుత్వానికి సమాచారమిచ్చింది. దీంతో.. ఆ పరీక్షను రద్దు చేస్తున్నట్లు కేంద్రం ప్రకటించింది. ‘‘యూజీసీ-నెట్‌లో అత్యున్నత స్థాయి పారదర్శకత, ప్రమాణాలకు.. పరీక్ష పవిత్రతను కాపాడేందుకే ఈ నిర్ణయం తీసుకున్నాం’’ అని ఓ ప్రకటనలో పేర్కొంది. తదుపరి పరీక్ష తేదీని త్వరలో వెల్లడిస్తామని స్పష్టం చేసింది.
నిజానికి యూజీసీ-నెట్‌ను ఇప్పటి వరకు కంప్యూటర్‌ బేస్డ్‌ టెస్ట్‌(సీబీటీ)గా నిర్వహించేవారు. ఎన్‌టీఏ మొదటిసారి పేపర్‌/పెన్‌/ఓఎంఆర్‌ షీట్‌ రూపంలో మంగళవారం పరీక్ష నిర్వహించింది. ఈ విధానంలో పరీక్షను నిర్వహించడం వల్ల ప్రశ్నపత్రం లీకై ఉండొచ్చనే అనుమానాలు వ్యక్తమవుతున్నాయి. కాగా, ‘‘బీజేపీ ప్రభుత్వం నిర్లక్ష్యం, అవినీతితో యువత జీవితాలతో చెలగాటమాడుతోంది’’ అని ప్రియాంక గాంధీ అన్నారు.
Updated Date - Jun 20 , 2024 | 03:44 AM
