ED : లిక్కర్‌ స్కాం నిందితుల జాబితాలో ‘ఆప్‌’ను చేర్చుతాం
ABN, Publish Date - May 15 , 2024 | 03:35 AM
ఢిల్లీ మద్యం విధానం కుంభకోణం కేసులోని నిందితుల జాబితాలో ఆమ్‌ ఆద్మీ పార్టీని కూడా చేర్చుతామని ఈడీ మంగళవారం హైకోర్టుకు తెలిపింది.
ఢిల్లీ హైకోర్టుకు తెలిపిన ఈడీ
న్యూఢిల్లీ, మే 14 (ఆంధ్రజ్యోతి): ఢిల్లీ మద్యం విధానం కుంభకోణం కేసులోని నిందితుల జాబితాలో ఆమ్‌ ఆద్మీ పార్టీని కూడా చేర్చుతామని ఈడీ మంగళవారం హైకోర్టుకు తెలిపింది. త్వరలో దాఖలు చేయనున్న మరో ఛార్జిషీటులో ఈ విషయాన్ని ప్రస్తావిస్తామని పేర్కొంది. అదే జరిగితే మనీలాండరింగ్‌ కేసులో నిందితునిగా ఓ రాజకీయ పార్టీని పేర్కొనడం ఇదే మొదటిసారి అవుతుంది.
ఈ కేసులో ఆప్‌ సీనియర్‌ నేత సిసోడియా దాఖలు చేసుకున్న బెయిల్‌ పిటిషన్‌పై విచారణ సందర్భంగా ఈడీ తరఫు న్యాయవాది జోహెబ్‌ హుస్సేన్‌ ఈ విషయాన్ని వెల్లడించారు. ఈ కుంభకోణం ద్వారా లభించిన సొమ్ము అంతా ఆప్‌కు వెళ్లినట్టు చెబుతున్నా ఆ విషయాన్ని ఛార్జిషీటులో ఎందుకు పేర్కొనలేదని బెయిల్‌ పిటిషన్‌పై విచారణ జరిపిన న్యాయమూర్తి జస్టిస్‌ స్వర్ణ కాంత శర్మ ప్రశ్నించారు. ఇందుకు న్యాయవాది హుస్సేన్‌ సమాధానమిస్తూ రానున్న ఛార్జిషీటులో ఆ పార్టీ పేరును ప్రస్తావిస్తామని తెలిపారు. కాగా, సిసోడియా బెయిల్‌ పిటిషన్‌పై తీర్పును న్యాయమూర్తి రిజర్వు చేశారు.
Updated Date - May 15 , 2024 | 06:22 AM
