Viral: బాబోయ్.. అది దెయ్యం ఇల్లా.. ఏలియన్స్ స్థావరమా? అంటార్కిటికా మంచులో భారీ తలుపు.. నెటిజన్ల కామెంట్లు..

ABN , Publish Date - Oct 18 , 2024 | 09:03 AM

అమెజాన్ అడవుల్లో ఏం జరుగుతోందో.. కొండ ఎక్కడుందో, నది ఎలా ప్రవహిస్తోందో.. ఇలా మనకు కావాల్సిన మ్యాపింగ్ సమాచారాన్ని గూగుల్ మ్యాప్స్ అందిస్తుంటాయి. తాజాగా గూగుల్ మ్యాప్స్ ద్వారా ఓ సంచలన విషయం బయటపడింది. మంచుతో కప్పి ఉండే అంటార్కిటికాలో వింతైన డోర్ వే ఒకటి కనిపించింది.

Viral: బాబోయ్.. అది దెయ్యం ఇల్లా.. ఏలియన్స్ స్థావరమా? అంటార్కిటికా మంచులో భారీ తలుపు.. నెటిజన్ల కామెంట్లు..

Mysterious door in Antarctica

టెక్నాలజీ అందుబాటులోకి వచ్చిన తర్వాత ఏ విషయాన్నైనా మనం ఇంట్లో కూర్చునే తెలుసుకోవచ్చు. గూగుల్ మ్యాప్స్ (Google Maps) అందుబాటులోకి వచ్చిన తర్వాత ఏ ప్రాంతం గురించిన సమాచారం అయినా లభ్యమవుతోంది. కొండ ఎక్కడుందో, నది ఎలా ప్రవహిస్తోందో.. అమెజాన్ అడవుల్లో ఏం జరుగుతోందో.. ఇలా మనకు కావాల్సిన మ్యాపింగ్ సమాచారాన్ని గూగుల్ మ్యాప్స్ అందిస్తుంటాయి. తాజాగా గూగుల్ మ్యాప్స్ ద్వారా ఓ సంచలన విషయం బయటపడింది. మంచుతో కప్పి ఉండే అంటార్కిటికా (Antarctica)లో వింతైన డోర్ వే ఒకటి కనిపించింది. ఆ ఫొటో సోషల్ మీడియాలో విపరీతంగా వైరల్ అవుతోంది. దానిపై నెటిజన్లు రకరకాల కామెంట్లు చేస్తున్నారు (Mysterious door in Antarctica).

తూర్పు అంటార్కిటికాలోని జపాన్‌కు చెందిన షోవా స్టేషన్ సమీపంలో దీన్ని గుర్తించారు. గూగుల్ మ్యాప్స్ కోఆర్డినేట్స్ ప్రకారం 69°00’50″S 39°36’22″E దగ్గర ఈ వింతైన ఆకారం కనిపించిందట. నిత్యం భారీ మంచుతో నిండే ఉండే అంటార్కిటికాలో అలాంటి వింత తలుపును చూసి చాలా మంది ఆశ్చర్యపోతున్నారు. ఆ ఫొటోపై నెటిజన్లు తమకు తోచిన కామెంట్లు చేస్తున్నారు. ``అది దెయ్యం ఇంటికి సంబంధించిన గేట్``, ``అది నాజీల స్థావరమా?``, ``అక్కడ ఏలియన్స్ ఉంటున్నాయేమో`` అంటూ నెటిజన్లు రకరకాల కామెంట్లు చేస్తున్నారు. మరొకరు అది బోయింగ్ విమానం డోర్ అని కామెంట్ చేస్తూ.. ఇటీవల జరిగిన విమానాన్ని ప్రమాదాన్ని గుర్తు చేశాడు. అయితే శాస్త్రవేత్తలు మాత్రం ఈ విషయం గురించి భిన్నంగా చర్చించుకుంటున్నారు.

న్యూకాజిల్ విశ్వవిద్యాలయంలో గ్లేషియాలజీ ప్రొఫెసర్ అయిన బెతాన్ డేవిస్.. అదొక మంచుకొండ అని, అది భూమిపైకి చేరి ఇప్పుడు కరిగిపోతోందని చెప్పారు. లండన్‌లోని ఇంపీరియల్ కాలేజ్‌కి చెందిన క్లైమేట్ చేంజ్ అండ్ ఎన్విరాన్‌మెంట్‌ కో-డైరెక్టర్, ప్రొఫెసర్ మార్టిన్ సీగెర్ట్ కూడా ఈ విషయంపై స్పందించారు. ఆ ప్రాంతంలో మంచు చాలా సన్నంగా ఉంటుందని, ఏదో ఒక ఘనపదార్థం చుట్టూ మంచు నిలిచిపోయి అలా కనబడుతోందని అన్నారు. ఆ ప్రాంతంలో మంచు చాలా త్వరగా కరిగిపోతోందని, బలమైన గాలులు వీచినప్పుడు మంచు కణాలు ఎగురుతున్నాయని పేర్కొన్నారు. ఏదేమైనా ప్రస్తుతం సోషల్ మీడియాలో మాత్రం ఈ వార్త చర్చనీయాంశంగా మారింది.