CM Revanth Reddy: తెలంగాణ నిన్ను మర్చిపోయింది

• సంతోషంగా ఫామ్‌ హౌస్‌లోనే పండుకో.. పది నెలల్లో తెలంగాణ ఏమీ కోల్పోలేదు

• నీ ఇంట్లోనే నలుగురికి ఉద్యోగాలు పోయాయ్‌

• బడి దొంగలను విన్నాం.. అసెంబ్లీకి రానోళ్లను

• చూసినమా!?.. ఇదొక విచిత్ర పరిస్థితి

• అసెంబ్లీ జరుగుతుంటే విపక్షం వచ్చి అడగాలి..

• కడగాలి.. కానీ, తెలంగాణలో ఉల్టా అయింది

• కేసీఆర్‌పై ముఖ్యమంత్రి రేవంత్‌ రెడ్డి ధ్వజం

• ఏఎంవీఐలకు నియామక పత్రాలు అందజేత

• డ్రగ్స్‌ వాడేవాళ్లు చీడ పురుగులని, సామాజిక

• బహిష్కరణ చేయాలని సీఎం పిలుపు

• కొత్త ఉద్యోగులు ఎన్‌ఫోర్స్‌మెంట్‌లోకి: పొన్నం

హైదరాబాద్‌ సిటీ, నవంబరు 11 (ఆంధ్రజ్యోతి): ‘‘పది నెలల్లో తెలంగాణ ఏం కోల్పోయిందో తెలిసి వచ్చిందని నిన్న, మొన్న ఒక పెద్దాయన మాట్లాడుతున్నడు. ఏం కోల్పోయిందయా.. మీ ఇంట్లో నలుగురు ఉద్యోగాలు కోల్పోయారు. తెలంగాణలో వేలాది మందికి ఉద్యోగాలు వచ్చాయి. రైతులకు రుణ మాఫీ జరిగింది. మహిళలకు ఉచిత ఆర్టీసీ బస్సు ప్రయాణం, పేదలకు ఉచిత విద్యుత్తు, రూ.500లకే సిలిండర్‌ను ఈ ప్రభుత్వం ఇస్తోంది. రాష్ట్రానికి ఏమీ బాధ లేదు నాయనా.. నువ్వు సంతోషంగా అక్కడే పండుకో.. నీతో ఏం పని లేదు. తెలంగాణ సమాజం నిన్ను మరిచిపోయింది’’ అంటూ మాజీ సీఎం కేసీఆర్‌పై ముఖ్యమంత్రి రేవంత్‌ రెడ్డి మండిపడ్డారు. అసెంబ్లీ తర్వాత పార్లమెంటు ఎన్నికల్లో ప్రజలు గాడిద గుడ్డు ఇచ్చారని, అయినా, బుద్ధి మారలేదని విమర్శించారు. ఇప్పటికైనా మారాలని, ప్రభుత్వం చేపడుతున్న మంచి కార్యక్రమాలకు మద్దతు ఇవ్వాలని, నిర్ణయాల్లో లోపాలుంటే ప్రధాన ప్రతిపక్ష నాయకుడిగా సూచనలు చేయాలని కోరారు.

అసిస్టెంట్‌ మోటార్‌ వెహికిల్‌ ఇన్‌స్పెక్టర్లు (ఏఎంవీఐ)గా ఎంపికైన 96 మందికి ఉద్యోగ నియామక పత్రాలు ఇచ్చేందుకు ఖైరతాబాద్‌ రవాణా శాఖ కార్యాలయంలో నిర్వహించిన సమావేశానికి ఆయన ముఖ్య అతిథిగా హాజరయ్యారు. మంత్రి పొన్నం ప్రభాకర్‌, రవాణా శాఖ ప్రత్యేక ప్రధాన కార్యదర్శి వికా్‌సరాజ్‌, కలెక్టర్‌ అనుదీప్‌, జాయింట్‌ కమిషనర్‌ రమేశ్‌ చిదురతో కలిసి పది మందికి నియామక పత్రాలు అందజేశారు. ఈ సందర్భంగా.. ఈ పది నెలల్లో తెలంగాణలో అమలు చేసిన సంక్షేమ పథకాలను వివరించారు. టీచర్లకు పదోన్నతులు ఇచ్చామని, బదిలీలు చేశామని చెప్పారు. ఎన్ని అడ్డంకులు సృష్టించినా గ్రూప్‌ 1 పరీక్షలు నిర్వహించామని, త్వరలో 563 మంది అధికారులను తెలంగాణకు అందిస్తామని తెలిపారు. ‘‘బడి దొంగలను విన్నాం. కానీ.. అసెంబ్లీకి రానోళ్లను ఎప్పుడైనా చూశామా? శాసనసభ సమావేశాలు జరుగుతున్నాయంటే ప్రతిపక్షం పోటీ పడి వచ్చి ప్రభుత్వాన్ని నిలదీయాలి. అడగాలి. కడగాలి. ఆయన రానే రాడు. ఉల్టా అయిపోయింది. రమ్మని మేం అడుక్కోవాల్సి వస్తోంది. తెలంగాణలో విచిత్ర పరిస్థితి ఉంది’’ అని విమర్శించారు.

• సారా బుడ్లతో దీపావళా..?

దీపావళికి చిచ్చు బుడ్లతో పండుగ చేసుకుంటామని, కానీ, కొంతమంది సారా బుడ్లతో దావత్‌ చేసుకున్నామని అంటున్నారని, ఆ దావత్‌లో డ్రగ్స్‌ తీసుకున్నోళ్లు దొరికితే వాళ్లను ఎలా పట్టుకుంటారని అడుగుతున్నారంటూ బీఆర్‌ఎస్‌ నాయకులపై సీఎం రేవంత్‌ రెడ్డి ధ్వజమెత్తారు. ఇలాంటి వాళ్లు సమాజానికి చీడ పురుగులని, వారిని సామాజిక బహిష్కరణ చేయాలని పిలుపునిచ్చారు. ఫామ్‌ హౌస్‌ల్లో డ్రగ్స్‌ తీసుకునే వాళ్లు మనకు ఆదర్శం కాదని స్పష్టం చేశారు. ‘‘మన పిల్లలు చెడిపోతే మనం ఎంత గొప్పవాళ్లమైనా.. ఎంత సంపాదించినా.. ఎంత ఉన్నత స్థాయికి ఎదిగినా వృథానే. మనం ఎంత సాధించినా నిష్ప్రయోజనమే. వ్యసనాలకు బానిసలైన పిల్లల వల్ల కుటుంబాలు కుప్పకూలుతయి. పిల్లలను నియంత్రించేలా మనం సామాజిక బాధ్యతగా సహకరించాలి. పక్క రాష్ట్రాలు, దేశాల నుంచి రోడ్డు మార్గంలో డ్రగ్స్‌ వస్తున్నాయి. రవాణా, పోలీస్‌ విభాగాలు కఠినంగా ఉండాలి. గంజాయి వాసన వచ్చిందంటే కూకటివేళ్లతో పెకిలించాలి. తెలంగాణ సరిహద్దులో ఎవడైనా డ్రగ్స్‌తో కాలు పెట్టాలంటే వారి వెన్నులో చలి జ్వరం రావాలి’’ అని దిశానిర్దేశం చేశారు. గంజాయి వ్యసనానికి బానిసలై ఇప్పుడు ఇంజనీరింగ్‌ గ్రాడ్యుయేట్లు, వైద్య విద్య చదివే పిల్లలు వాటిని అమ్మే దుస్థితికి దిగజారారని, ఈ పరిస్థితి మారాలని ఆకాంక్షించారు.

• నెలకొక్కసారైనా స్వగ్రామాలకు వెళ్లండి

ఉద్యోగ అవకాశాలు కల్పించే అవకాశమున్నా.. పరీక్షలు నిర్వహించకుండా నాటి పాలకులు బాధ్యతారహితంగా వ్యవహరించారని సీఎం రేవంత్‌ రెడ్డి మండిపడ్డారు. కోర్టులు, వివాదాల్లో ఉన్న ప్రభుత్వ ఉద్యోగాలకు సంబంధించి న్యాయ నిపుణులను సంప్రదించి.. న్యాయస్థానాల్లో బలంగా వాదనలు వినిపించి, చిక్కుముళ్లు విప్పి.. పది నెలల్లో 50 వేల మందికి నియామక పత్రాలు అందించడం గర్వంగా ఉందని సంతోషం వ్యక్తం చేశారు. కాంగ్రెస్‌ అధ్యక్షుడిగా ఆనాడు నిరుద్యోగులకు మాట ఇచ్చానని, మిమ్మల్ని నమ్మించి మోసం చేసిన వారి ఉద్యోగాలు ఊడగొడితే మీకు ఉద్యోగాలు వస్తాయని చెప్పానని, ఇప్పుడు అదే జరిగిందని, మీకు ఉద్యోగాలు వస్తున్నాయని స్పష్టం చేశారు. ‘‘గ్రామంలో ఎవరికైనా ఉద్యోగం వస్తే వారిని స్ఫూర్తిగా తీసుకొని మిగతా వాళ్లు చదువుతారు. మిమ్మల్ని చూసినప్పుడు ఇతర పిల్లల తల్లిదండ్రులకూ విశ్వాసం వస్తుంది. కుటుంబంలో ఒక్క ప్రభుత్వ ఉద్యోగం వస్తే ఆ కుటుంబ జీవన ప్రమాణాలు మారతాయి.

సామాజిక బాధ్యతగా భావించి నెలకు ఒక్కసారైనా స్వగ్రామాలకు వెళ్లండి. ప్రభుత్వ, రెసిడెన్షియల్‌ స్కూళ్లలో చదువుకునే విద్యార్థులతో మాట్లాడండి. వాళ్లకు ప్రభుత్వం పట్ల విశ్వాసం కల్పించండి. చదువు సమాజంలో గుర్తింపు, గౌరవాన్ని ఇస్తుందనే అవగాహన కల్పించండి’’ అని సూచించారు. ఉద్యోగం బాధ్యత కాదని, భావోద్వేగమని అన్నారు. పది కాలాలపాటు పేదల కష్టాలు తీర్చేందుకు సామాజిక బాధ్యతగా పని చేయాలని దిశానిర్దేశం చేశారు. మూడు వేల ఎలక్ట్రిక్‌ బస్సులను ప్రవేశపెట్టి నగరంలో కాలుష్యాన్ని తగ్గించనున్నామని, ఇక్కడి డీజిల్‌ బస్సులను గ్రామీణ ప్రాంతాలకు పంపుతామని చెప్పారు. హైదరాబాద్‌లో కాలుష్యం తగ్గించేందుకు ప్రత్యేక పాలసీ తీసుకు వస్తామని, ఇందుకు రవాణా శాఖ సహకరించాలని కోరారు. రెండో విడత అధికారంలోకి వచ్చిన వెంటనే జర్నలిస్టులకు రెండో విడత ఇళ్ల పట్టాలు ఇస్తామన్నారు. కొత్తగా నియమితులైన ఉద్యోగుల సేవలను చెక్‌ పోస్టుల్లో కాకుండా రవాణా శాఖ ఎన్‌ఫోర్స్‌మెంట్‌ విభాగంలో వినియోగిస్తామని మంత్రి పొన్నం ప్రభాకర్‌ చెప్పారు. తెలంగాణలో జరుగుతున్న రోడ్డు ప్రమాదాల్లో రోజూ సగటున 20 మంది మృతి చెందుతున్నారని, సురక్షిత ప్రయాణాలకు రవాణా శాఖ నిబంధనలను కఠినంగా అమలు చేస్తామని చెప్పారు.

• రైతులను ఇబ్బంది పెడితే ఎస్మా

• కొనుగోళ్లలో మోసాలకు పాల్పడినా, వేధించినా కఠినంగా వ్యవహరించండి

• అధికారులకు సీఎం రేవంత్‌ ఆదేశం

హైదరాబాద్‌, నవంబరు 11 (ఆంధ్రజ్యోతి): ధాన్యం కొనుగోళ్ల విషయంలో రైతులను ఇబ్బంది పెట్టే వారిపై కఠిన చర్యలు తీసుకోవాలని, అవసరమైతే వారిపై ‘ఎసెన్షియల్‌ సర్వీసెస్‌ మెయింటినెన్స్‌ యాక్టు (ఎస్మా)’ను ప్రయోగించాలని ముఖ్యమంత్రి రేవంత్‌ రెడ్డి ఆదేశించారు. రాష్ట్రంలో అక్కడక్కడ రైతులను ఇబ్బందులకు గురి చేస్తున్న సంఘటనలు తన దృష్టికి రావడంతో సోమవారం ఆయన అధికారులతో మాట్లాడారు. రైతులు పండించిన పంట ఉత్పత్తుల కొనుగోళ్లలో మోసాలకు పాల్పడినా, రైతులను గందరగోళానికి గురి చేసినా, వేధించినా కఠినంగా వ్యవహరించాలని నిర్దేశించారు. ధాన్యం కొనుగోళ్లు సాఫీగా జరిగేలా అన్ని జిల్లాల కలెక్టర్లు చర్యలు తీసుకోవాలని, ఎక్కడైనా ఇబ్బందులు ఎదురైతే వెంటనే ఉన్నతాధికారులతో మాట్లాడి పరిష్కరించాలని సూచించారు.