Hyderabad: బాబోయ్.. మోషే పబ్బుల్లో అన్నీ మోసాలే..!

హైదరాబాద్, జూన్ 13: నగరంలోని మోషే పబ్బులో అన్నీ మోసాలే వెలుగు చూస్తున్నాయి. తాజాగా పోలీసుల విచారణలో పబ్బు అక్రమాలు ఒక్కొక్కటిగా బయటపడుతున్నాయి. పోలీసులు తెలిపిన వివరాల ప్రకారం.. పబ్బు యాజమాన్యంతో చేతులు కలిపిన ఓ యువతి.. ఒకే రోజు ముగ్గురు వ్యాపారవేత్తల్ని చీట్ చేసింది. వ్యాపారవేత్తలని ట్రాప్ చేసి మోషే పబ్‌కు తీసుకువచ్చిన యువతి.. వారిని మోసగించింది.

మోషే పబ్ మేనేజర్, యజమానితో కుమ్మక్కై డబ్బులు వసూలు చేసింది. లిక్కర్ తాగినట్లు నటించి ఏకంగా వేల రూపాయల బిల్లు వేయించింది. అందులోంచి తన కమిషన్‌ కొట్టేసింది యువతి. ఒకేరోజు ముగ్గురు వ్యాపారవేత్తలను మోసగించిన ఆ యువతి.. వారి నుంచి లక్షన్నర రూపాయలు కాజేసింది.

పదిమందిపై కేసు, ఆరుగురు అరెస్ట్..

కాగా, మోషే పబ్ వ్యవహారంలో ఇప్పటి వరకు 10 మందిపై పోలీసులు కేసు నమోదు చేశారు. ఈ కేసులో ఆరుగురిని అరెస్ట్ చేశారు. మోషే పబ్ ముగ్గురు యజమానులతో పాటు.. మేనేజర్‌పైనా కేసు నమోదు చేశారు పోలీసులు. టిండర్ యాప్ ద్వారా వ్యాపారవేత్తలను ట్రాప్ చేసి, వారిని మోసం చేస్తున్నారు. వీరంతా నాగపూర్‌కు చెందిన గ్యాంగ్‌గా తెలిపిన పోలీసులు.. వారిని అరెస్ట్ చేశారు. మోషే పబ్బుకు చెందిన ముగ్గురు యజమానులను అదుపులోకి తీసుకున్న పోలీసులు.. వారిని విచారిస్తున్నారు. విచారణలో షాకింగ్ విషయాలు వెలుగు చూస్తున్నాయి. ఇక వ్యాపారవేత్తలకు వలవేస్తున్న అమ్మాయిలను పట్టుకునేందుకు పోలీసులు గాలింపు చర్యలు చేపట్టారు.

For More Telangana News and Telugu News