Windshield Twist: విండ్‌షీల్డ్‌ నిజంగా దెబ్బతిందా
ABN , Publish Date - Apr 16 , 2025 | 05:24 AM
జగన్‌ పర్యటనలో హెలికాప్టర్‌ విండ్‌షీల్డ్‌ దెబ్బతిందన్న అంశంపై పైలట్‌, కో-పైలట్లకు పోలీసులు నోటీసులు జారీ చేశారు. హెలికాప్టర్‌ టేకాఫ్‌కు ముందు భద్రతా నిబంధనలు పాటించలేదని అనుమానాలు వ్యక్తమవుతున్నాయి
కలెక్టరేట్‌కు, ఎస్పీకి చెప్పకుండా హెలికాప్టర్‌ను ఎలా తీసుకెళ్లారు?..
నేడు వచ్చి వివరణ ఇవ్వండి
జగన్‌ పర్యటించిన చాపర్‌ పైలట్లకు పోలీసుల నోటీసు
పుట్టపర్తి, ఏప్రిల్‌ 15 (ఆంధ్రజ్యోతి): శ్రీసత్యసాయి జిల్లా రామగిరి మండలంలోఓ మాజీ సీఎం వైఎస్‌ జగన్‌ పర్యటన సమయంలో, హెలిప్యాడ్‌ వద్ద జరిగిన ఘటనపై విచారణకు రావాలని ఆయన ప్రయాణించిన హెలికాప్టర్‌ పైలట్‌, కో-పైలట్‌కు పోలీసులు నోటీసులు జారీచేశారు. బుధవారం చెన్నేకొత్తపల్లిలోని రామగిరి సర్కిల్‌ కార్యాలయానికి రావాలని రామగిరి సర్కిల్‌ పోలీసులు ఈ నెల 12నే నోటీసులిచ్చారు. బెంగళూరు వైట్‌ఫీల్డ్‌లోని చిప్పర్‌ ఏవియేషన్‌ ప్రైవేట్‌ కంపెనీలో పనిచేస్తున్న పైలట్‌ కెప్టెన్‌ అనిల్‌కుమార్‌, కో-పైలట్‌ శ్రేయాజ్‌ జైన్‌కు సీఆర్‌పీసీ 161 కింద నోటీసులు జారీచేశారు. పాపిరెడ్డిపల్లిలో హత్యకు గురైన లింగమయ్య కుటుంబాన్ని పరామర్శించేందుకు జగన్‌ బెంగళూరు నుంచి ఈ నెల 8న వచ్చారు. కుంటిమద్ది గ్రామ సమీపంలో ఆయన హెలికాప్టర్‌ దిగింది. ఆ సమయంలో బారికేడ్లను తోసేసి.. పోలీసులు అడ్డగిస్తున్నా ఆగకుండా వైసీపీ శ్రేణులు హెలిప్యాడ్‌ వద్దకు దూసుకెళ్లాయి. ఈ క్రమంలో దాని విండ్‌షీల్డ్‌ దెబ్బతిందంటూ జగన్‌ను వదిలేసి పైలట్లు బెంగళూరు వెళ్లిపోయారు. దీంతో ఆయన రోడ్డు మార్గాన బెంగళూరు వెళ్లి హైడ్రామాకు తెరలేపారు.
ఈ ఘటనను భద్రతా వైఫల్యంగా చిత్రీరించాలని చూశారు. దీనిని తీవ్రంగా పరిగణించిన పోలీసులు.. వాస్తవాలను నిగ్గు తేల్చేందుకు విచారణ ప్రారంభించారు. ఆ రోజు ఏం జరిగిందో తేల్చేందుకు పలు కోణాల్లో దర్యాప్తు చేపట్టారు. హెలిప్యాడ్‌ వద్దకు ముందస్తు ప్రణాళికతోనే వైసీపీ కార్యకర్తలను భారీగా తరలించారని, బారికేడ్లు విరిచి, పోలీసులను పక్కకు నెట్టారని, వారి విధులకు ఆటంకం కలిగించారని తేల్చారు. ఈ క్రమంలో రాప్తాడు మాజీ ఎమ్మెల్యే తోపుదుర్తి ప్రకాశ్‌రెడ్డి, మరికొందరిపై ఐదు రోజుల కిందట కేసు నమోదు చేశారు. తాజాగా హెలికాప్టర్‌ నడిపిన పైలట్‌, కో-పైలట్‌కు నోటీసులు జారీ చేశారు. ‘హెలికాప్టర్‌ విండ్‌షీల్డ్‌ దెబ్బతిందని, వీవీఐపీని తీసుకెళ్లలేమని కలెక్టరేట్‌కు గానీ, ఎస్పీకి గానీ సమాచారం ఇవ్వకుండా ఏ విధంగా హెలికాప్టర్‌ను టేకాఫ్‌ చేశారు..? హెలికాప్టర్‌ విండ్‌షీల్డ్‌ దెబ్బతినడం నిజమేనా? మరమ్మతు చేయకుండా గాలిలోకి ఎలా ఎగిరింది? వైసీపీ నేతలు, కార్యకర్తలు హెలికాప్టర్‌ డోర్‌ లాగారా? పైలట్‌ బ్యాగ్‌ను తస్కరించారా?’ అన్న అంశాలపై వారిని ప్రశ్నించనున్నట్లు తెలిసింది.
