Rajinikanth: ఏపీలో రానున్న ఎన్నికలపై రజనీకాంత్ ఆసక్తికర వ్యాఖ్యలు !

విజయవాడ: 2024లో టీడీపీ అధినేత చంద్రబాబు (Chandrababu) గెలిస్తే దేశంలో ఏపీ నెంబర్ వన్ అవుతుందని సినీ నటుడు రజనీకాంత్ (Rajinikanth) జోస్యం చెప్పారు. ఎన్టీఆర్ శతజయంతి వేడుకల అంకురార్పణ సభలో రజనీకాంత్ మాట్లాడుతూ చంద్రబాబుపై ప్రశంసలు కురిపించారు. ఈ సభను చూస్తుంటే రాజకీయం మాట్లాడాలనిపిస్తుందన్నారు. కానీ.. రాజకీయం మాట్లాడవద్దని అనుభవం చెబుతోందని వ్యాఖ్యానించారు. ఎన్టీఆర్ (NTR) ఆత్మ చంద్రబాబును దీవిస్తుందన్నారు. చంద్రబాబు విజన్ ఉన్న నాయకుడని, ఆయన ఘనత దేశ విదేశీ నాయకులకు కూడా తెలుసని తెలిపారు. హైదరాబాద్‌ (Hyderabad)ను హైటెక్‌ నగరంగా చంద్రబాబు మార్చారని కొనియాడారు. ‘‘ఇటీవల చాలాకాలం తర్వాత హైదరాబాద్‌ను సందర్శించాను.. నేను హైదరాబాద్‌లో ఉన్నానా.. లేక న్యూయార్క్‌లో ఉన్నానా అనిపించింది’’ అని రజనీకాంత్ పేర్కొన్నారు.

హీరోగా నా తొలి సినిమా పేరు 'భైరవి‘

హీరోగా నా తొలి సినిమా పేరు 'భైరవి' అని రజనీకాంత్ గుర్తుచేశారు. పాతాళభైరవి సినిమా గుర్తుకొచ్చి హీరో పాత్రకు ఒప్పుకున్నానని తెలిపారు. ఎన్టీఆర్ దుర్యోదనుడి పాత్ర చూసి ఆశ్చర్యపోయానని పేర్కొన్నారు. ఎన్టీఆర్ ప్రభావం తనపై చాలా ఉందని, గద పట్టుకుని ఎన్టీఆర్‌ను అనుకరించేవాడినని తెలిపారు. ఎన్టీఆర్‌ను స్ఫూర్తిగా తీసుకుని సినిమాల్లోకి వచ్చానని, ఎన్టీఆర్ క్రమశిక్షణ పాటించేవారని కొనియాడారు. దానవీర శూరకర్ణలో ఎన్టీఆర్‌లా ఉండాలనుకున్నానని, ఆయనలా మేకప్ వేసుకుని ఫొటో దిగి తన స్నేహితుడికి చూపించానని గుర్తుచేశారు. తాను కోతిలా ఉన్నానని తన స్నేహితుడు అన్నాడని ఈ సందర్భంగా రాజనీకాంత్‌ గుర్తుచేసుకున్నారు.