Rajasthan: రాజస్థాన్ సీఎం ఎంపిక నేడే.. రేసులో ఎవరెవరు ఉన్నారంటే..?
ABN, First Publish Date - 2023-12-12T08:34:54+05:30
రాజస్థాన్ సీఎం ఎవరని వారం రోజులుగా కొనసాగుతున్న ఉత్కంఠకు నేడు తెరపడే అవకాశం ఉంది. కొత్తగా ఎన్నికైన భారతీయ జనతా పార్టీ (బీజేపీ) ఎమ్మెల్యేలు మంగళవారం సమావేశం కానున్నారు.
జైపూర్: రాజస్థాన్ సీఎం ఎవరని వారం రోజులుగా కొనసాగుతున్న ఉత్కంఠకు నేడు తెరపడే అవకాశం ఉంది. కొత్తగా ఎన్నికైన భారతీయ జనతా పార్టీ (బీజేపీ) ఎమ్మెల్యేలు మంగళవారం సమావేశం కానున్నారు. ఈ సమావేశంలో బీజేపీ శాసనసభా పక్ష నేతను ఎన్నుకుంటారని తెలుస్తోంది. దీంతో ముఖ్యమంత్రి ఎవరనే దానిపై స్పష్టత రానుంది. పార్టీ పరిశీలకులుగా నియమితులైన రక్షణ మంత్రి రాజ్‌నాథ్ సింగ్, వినోద్ తావ్డే, సరోజ్ పాండే కూడా ఈ సమావేశంలో పాల్గొంటారని సమాచారం అందింది. ఈ సమావేశం సాయంత్రం 4 గంటలకు బీజేపీ పార్టీ కార్యాలయంలో జరగనుంది. “బీజేపీ రాష్ట్ర కార్యాలయంలో మంగళవారం సాయంత్రం 4 గంటలకు బీజేపీ ఎమ్మెల్యేల సమావేశాన్ని ఏర్పాటుచేశారు. కొత్తగా ఎన్నికైన బీజేపీ ఎమ్మెల్యేలు ఈ సమావేశంలో పాల్గొంటారు. వారంతా ముఖ్యమంత్రిని ఎన్నుకుంటారు’’ అని బీజేపీ రాష్ట్ర ప్రధాన కార్యదర్శి, ఎమ్మెల్యే భజన్‌లాల్ శర్మ తెలిపారు.
కాగా రాజస్థాన్ సీఎం రేసులో వసుంధర రాజే, అశ్విని వైష్ణవ్, కిరోరి లాల్ మీనా, రాజ్యవర్ధన్ రాథోడ్, గజేంద్ర సింగ్ షెకావత్, ఓం బిర్లా, దియా కుమారి, అర్జున్రామ్ మేఘ్వాల్, సీపీ జోషి పేర్లు వినిపిస్తున్నాయి. మొదట బాబా బాలక్‌నాథ్ కూడా సీఎం రేసులో ఉన్నారనే వార్తలు వచ్చాయి. కానీ తాను సీఎం రేసు నుంచి తప్పుకుంటున్నట్టుగా స్వయంగా ఆయనే ప్రకటించారు. కాగా చత్తీస్‌గఢ్‌లో గిరిజన సామాజిక వర్గానికి చెందిన విష్ణు దేవ్‌సాయ్‌ని బీజేపీ అధిష్టానం సీఎంగా నియమించిన సంగతి తెలిసిందే. ఇక వరుసగా రెండోసారి అధికారంలోకి వచ్చిన మధ్యప్రదేశ్‌లో బీజేపీ సీఎంను మార్చింది. ఇప్పటివరకు సీఎంగా ఉన్న శివరాజ్‌సింగ్ చౌహాన్ స్థానంలో మోహన్‌యాదవ్‌ను నియమించింది. కాగా నవంబర్ 25న 199 అసెంబ్లీ స్థానాలకు రాజస్థాన్‌లో ఎన్నికలు జరిగాయి. డిసెంబర్ 3న వెల్లడైన ఫలితాల్లో 115 స్థానాలను గెలుచుకున్న బీజేపీ పార్టీ అధికారంలోకి వచ్చింది.
Updated Date - 2023-12-12T08:37:05+05:30 IST