Ayyappa Swamy: వైభవంగా ప్రారంభమైన అయ్యప్పస్వామి ద్వితీయ పుష్కర కుంభాభిషేకం

హైదరాబాద్‌: భూతనాథ సదానందాః సర్వభూత దయాపర రక్షరక్ష మహాబాహో.. శాస్తేతుభ్యం నమోనమః...

పిలిస్తే పలికే కలియుగ వరదుడు, శ్రీ హరిహరపుత్రుడు అయ్యప్పస్వామి కుంభాభిషేకం బుధవారం అత్యంత వైభవంగా ప్రారంభమైంది. హైదరాబాద్‌లోని శ్రీనగర్‌ కాలనీ శ్రీవేంకటేశ్వరస్వామి దేవాలయ సమూహంలో వేంచేసి ఉన్న అయ్యప్ప స్వామి ద్వితీయ పుష్కర కుంభాభిషేక మహోత్సవానికి వేదపండితుల మంత్రోచ్ఛరణ నడుమ అంకురార్పణ జరిగింది. సూరపనేని సునంద్‌ – పద్మప్రియ దంపతులచే అతి సుందరంగా పునర్నవీకరించిన దేవాలయంలో తుని తపోవన పీఠాధ్వీరులు శ్రీశ్రీశ్రీ సద్గురు సచ్చిదానంద సరస్వతీ మహాస్వామివారి కరకమలములచే పూజా కార్యక్రమాలు ప్రారంభించారు. ఐదు రోజులపాటు జరిగే ఈ కార్యక్రమాల్లో మొదటి రోజులో భాగంగా గోపూజ, ఆలయ ప్రదక్షణ, యాగశాల ప్రదక్షణ, శాలాంగ బలి, గణపతి పూజ, పుణ్యాహవచనము, పంచగవ్య ప్రాశన, ఋత్విక్‌వరుణలు, దీక్షా వస్త్రములు, ఆఖండ స్థాపన, నవగ్రహ మండపారాధన, గణపతి హోమాది కార్యక్రమాలను ఘనంగా నిర్వహించారు. అనంతరం అయ్యప్పస్వాములకు, భక్తులకు తీర్థ ప్రసాద వితరణ జరిగింది. ఈ కార్యక్రమంలో దేవాలయ ఛైర్మన్‌, సిహెచ్‌ రామయ్య, ఈఓ శీమతి ఎన్‌. లావణ్య, అయ్యప్పస్వామి దేవాలయ ప్రధాన అర్చకులు జొన్నలగడ్డ శ్రీనివాస్‌ శర్మ, రామకృష్ణ శర్మ, దేవాలయ కమిటీ మరియు అర్చకులు సిబ్బంది పాల్గొన్నారు.

కార్యక్రమాల వివరాలు 

నవంబర్ 2 (గురువారం)

గోపూజ, గవ్యాంత పూజలు, మార్జనము, వాస్తు పూజ, వాస్తు హోమం, వాస్తు బలి, పర్యగ్నికరణ, రక్షకోద్ధారణ, నిత్యోపాసన, నిత్య బలిహరణ, తీర్థ ప్రసాద వితరణ.

ఉ 10 గం.లకు మహా సుదర్శన హోమం, వేద పారాయణ.

సా. 5 గం.లకు దేవాలయ ప్రదక్షిణ, బలిహరణ, జలాధివాసం, తదంగ హోమములు, కలశస్థాపన, నిత్యోపాసన, నిత్య బలిహరణ, తీర్థ ప్రసాద వితరణ.

6 గంలకు శంకరరామం వారి బృందంచే భజన.

నవంబర్ 3 (శుక్రవారం)

ఉదయం 9 గంటలకు గోపూజ, గవ్యాంత పూజలు, మార్జనము, అష్టోత్తర కలశస్థాపన, ‘క్షీరాధివాసము’, హోమములు, మండపారాధన, హారతి తీర్థ ప్రసాద వితరణ

ఉదయం 10.00 గంటలకు చండీ హోమం, వేద పారాయణ

సా.5గం.లకు ధాన్యాధివాసము, శాంతి కుంభ స్థాపనలు, కుంభాభిషేక కలశస్థాపనలు, తదంగ హోమములు, నిత్యోపాసన, నిత్య బలిహరణ, తీర్థ ప్రసాద వితరణ.

5.00 గంటలకు భగవతీ సేవ, బ్రహ్మశ్రీ కృష్ణ నంబూద్రి (శబరిమల మాజీ మేల్‌శాంతి) వారి బృందంచే నిర్వహించబడును.

6.00 గం.లకు వీరమణిగారి బృందంచే భజన కార్యక్రమం.

నవంబర్ 4 (శనివారం)

ఉ. 9.00 గం. లకు గోపూజ, ద్రవ్యాంగ పూజలు, మార్జనము మండప పూజలు, సుగంధ ద్రవ్యాలు, నదీ జలాలతో ‘జలాధివాసము’, హోమములు, నిత్యోపాసన, నిత్య బలిహరణ, హారతి, తీర్థ ప్రసాద వితరణ.

ఉ. 10 గం.లకు ‘శ్రీ రుద్ర సహిత మహా మృత్యుంజయ హోమం’, వేద పారాయణ.

సా. 5 గం.లకు పంచ శయ్యాధివాసము, శాలాంగ దేవతా పూజ, పుష్పాధివాసము, వస్త్రాధివాసము, ఫలాధివాసము, అంగ ప్రత్యంగ శాలాంగ దేవాతాహోమం, నిత్యోపాసన, బలిహరణ, హారతి, ప్రసాద వితరణ.

మధ్యాహ్నం 3.00 గం.లకు ‘శ్రీచక్ర నవావరణ పూజ’, బ్రహ్మశ్రీ మనోజ్‌ నంబూద్రి (శబరిమల మాజీ మేల్‌శాంతి) వారి బృందంచే నిర్వహించబడును.

నవంబర్ 5 (ఆదివారం)

ఉ. 4.30 ని. లకు మహా గణపతి హోమం, గవ్యాంత పూజలు, మార్జనము, బలిపీఠ పూజలు, ధాతు నిక్షేపణ,

ఉ.7.27 ని.లకు బలిపీఠములు, ధ్వజస్తంభము, చండీశ్వరుడు, ఆలయ శిఖర, యంత్ర ప్రతిష్ఠ.

ఉ.9.00 గం.లకు అష్టోత్తర కలాశాభిషేక సహిత మహా కుంభాభిషేకము, జీవన్యాసము, మహా పూర్ణాహుతి, అవబృదము.

ఉ. 11.00 గంటలకు మహాపడి పూజ, బ్రహ్మశ్రీ కంఠరారు మహేష్‌ మోహన్‌ తంత్రి (శబరిమల ఆలయ ప్రధాన అర్చకులు) గారిచే నిర్వహించబడును.

12.30ని.లకు అన్నసమారాధన

సా.7.00 గం.టలకు పల్లకి సేవ,

రాత్రి 9.00 హారతి, హరివరాసనము, తీర్థ ప్రసాద వితరణ.