NRI: తానా ఆధ్వర్యంలో అమెరికాలో రహదారుల దత్తత

ఇంటర్నెట్ డెస్క్: అమెరికాలోని పెన్సిల్వేనియా రాష్ట్ర రాజధాని హ్యారిస్ బర్గ్ నగరంలో మిడ్ అట్లాంటిక్ తానా విభాగం వారు సామాజిక భాద్యతపై అవగాహన కల్పిస్తూ "అడాప్ట్ ఏ హైవే" కార్యక్రమం నిర్వహించారు. కమ్యూనిటీ సర్వీస్‌లో భాగంగా, అత్యంత రద్దీ గల రహదారిని తానా ఆధ్వర్యంలో దత్తత తీసుకున్నారు. ఈ కార్యక్రమంలో భాగంగా మిడ్-అట్లాంటిక్ తానా బృందం రహదారి పరిసరాలు పరిశుభ్రం చేయడమే కాకుండా పచ్చదనాన్ని పరిరక్షించడం కోసం పలు కార్యక్రమాలు చేపట్టారు. హ్యారిస్ బర్గ్ తానా టీం ఆధ్వర్యంలో జరిగిన ఈ కార్యక్రమంలో పెద్దలతో పాటూ విద్యార్థులు చురుగ్గా పాల్గొని విజయవంతం చేశారు.

ఈ సందర్భంగా మిడ్ అట్లాంటిక్ తానా రీజినల్ కో-ఆర్డినేటర్ వెంకట్ సింగు మాట్లాడుతూ అమెరికా సమాజంతో మమేకమై సమాజ సేవ చేయాలనే సంకల్పం కలిగించడానికి ఉత్తర అమెరికా తెలుగు సంఘం (తానా) ఈ కార్యక్రమం చేపట్టింది అని తెలిపారు. ఇంత చక్కటి కార్యక్రమం చేపట్టి, విజయవంతం చేసిన హ్యారిస్ బర్గ్ తానా బృందానికి తానా బోర్డు ఆఫ్ డైరెక్టర్ రవి పొట్లూరి ధన్యవాదాలు తెలిపారు.

ఈ స్వచ్ఛంద కార్యక్రమంలో పాల్గొన్న పలువురు విద్యార్థులు మాట్లాడుతూ.. సమాజానికి ఎంతో మేలు చేసే ఈ కార్యక్రమం ద్వారా ప్రకృతి పట్ల అవగాహనతో పాటూ ప్రకృతిని, పచ్చదనాన్ని ఎలా సంరక్షించుకోవాలో నేర్చుకున్నామని తెలిపారు. తానా ఆధ్వర్యంలో విద్యార్థులలో సేవా భావం పెంపొందించేలా సమాజానికి మేలు చేసే ఇలాంటి కార్యక్రమాలు మరెన్నో చేపట్టాలని ఈ కార్యక్రమంలో పాల్గొన్న పలువురు ఆకాంక్షించారు.