KTR: బిల్డర్లకు ఏడుపొక్కటే తక్కువ

• కుదేలవుతున్న నిర్మాణ రంగం.. అనాలోచిత నిర్ణయాల వల్లే ఈ దుస్థితి.. రియల్టర్ల తరఫున అసెంబ్లీలో ప్రశ్నిస్తాం: కేటీఆర్‌

హైదరాబాద్‌ సిటీ/కవాడీగూడ, నవంబరు 5 (ఆంధ్రజ్యోతి): ‘‘రియల్‌ ఎస్టేట్‌ రంగం గురించి నాకంటే ఎక్కువ ఎవరికి తెలియదని రేవంత్‌రెడ్డి చెప్పిండు.. సీఎం పదవంటే గుంపు మేస్త్రీ పోస్టు అన్నడు.. ఇప్పటివరకు నిర్మాణరంగానికి మేలు జరిగే ఒక్క నిర్ణయం తీసుకోలేదు. పక్కకు తీసుకెళ్లి మాట్లాడితే బిల్డర్లు, రియల్‌ ఎస్టేట్‌ ఏజెంట్లకు ఏడుపొక్కటే తక్కువ. వాళ్లు అధికారంలోకి వచ్చి 11 నెలలైంది. అభివృద్ధి ఎక్కడ..? రాష్ట్రంలో ఏంజరుగుతోంది..? 24 గంటల విద్యుత్తు సరఫరానూ అందించడంలేదు’’ అని బీఆర్‌ఎస్‌ కార్యనిర్వాహక అధ్యక్షుడు కేటీఆర్‌ అన్నారు. తెలంగాణ రియల్టర్ల ఫోరం ఆధ్వర్యంలో మంగళవారం శ్రీనగర్‌కాలనీలోని సత్యసాయినిగమాగమంలో నిర్వహించిన సమావేశంలో, ఆటో డ్రైవర్ల జేఏసీ ఆధ్వర్యంలో ఇందిరాపార్కు వద్ద నిర్వహించిన మహాధర్నాలో కేటీఆర్‌ పాల్గొని మాట్లాడారు. ‘‘తెలంగాణ మీద అవగాహన లేని వారి అనాలోచిత చర్యలతో రాష్ట్రంలోని అన్ని రంగాలపై తీవ్ర ప్రభావం పడుతోంది.

హైడ్రా ఒక బ్లాక్‌మెయిల్‌ దుకాణం. సీఎం కుర్చీ కాపాడుకోవాలంటే.. ఢిల్లీకి పైసలు పంపాలి. పంపకపోతే వాడు ఊరుకోడు. హైడ్రా పేరు చెప్పి బిల్డర్లను పిలుస్తున్నడు. బెదిరిస్తున్నడు. అందుకే మార్కెట్‌ ఆగమాగం జగన్నాథం. ఎవ్వరి దగ్గరా పైసల్లేవు.. రేవంత్‌రెడ్డి, ఆయన అన్న వద్ద ఉండొచ్చు’ అని కేటీఆర్‌ ఎద్దేవా చేశారు. శక్తికి మించి పెట్టుబడులు పెట్టామని, తమ భూములు అమ్ముడుపోవడం లేదని, పరిస్థితి ఇలానే ఉంటే చిన్న బిల్డర్లు పూర్తిగా చితికిపోతారని, ఇటీవల తనను కలిసిన ఓ బిల్డర్‌ చెప్పారన్నారు. అనుమతులు తీసుకోవడమూ ఇప్పుడు బిల్డర్లకు కష్టంగా మారిందని, ప్రజల చేతుల్లో డబ్బులు లేకుండాపోయాయని, దీనికి కారణం ప్రభుత్వ తీరే అని విమర్శించారు. రైతుబంధు వేస్తే పన్నుల రూపంలో ఆ డబ్బు ప్రభుత్వానికే వస్తుందని, మార్కెట్లో లావాదేవీలు జరుగుతాయని అభిప్రాయపడ్డారు.

ఎన్నికలు ఎప్పుడు వచ్చినా గెలిచేది బీఆర్‌ఎస్‌ అని రేవంత్‌రెడ్డికీ తెలుసని, తాము అధికారంలో ఉన్నప్పుడు ప్రతికార చర్యలంటూ పిచ్చి ఆలోచనలు చేయలేదని, సంక్షేమం, అభివృద్ధిపై దృష్టి పెట్టామని చెప్పారు. గతంలో బంగారం, బ్యాంకు డిపాజిట్లు చేసే వర్గాలు భూమి మీద పెట్టుబడి పెట్టడం మొదలుపెట్టాయని, ఇప్పుడు ఆ వర్గాల వాళ్లంతా ఆందోళన చెందుతున్నారన్నారు. కాంగ్రెస్‌ ప్రభుత్వ పనితీరుపై ఆ పార్టీ నాయకులే అసంతృప్తి వ్యక్తం చేస్తున్నారని, నల్లగొండలో జరిగిన ఓ సమావేశంలో మంత్రి కోమటిరెడ్డి వెంకట్‌రెడ్డి ముందు కొందరు నాయకులు అసహనం వ్యక్తం చేశారన్నారు. రియల్టర్ల ఇబ్బందులపై అసెంబ్లీ సమావేశాల్లో బీఆర్‌ఎస్‌ తరఫున ప్రభుత్వాన్ని ప్రశ్నిస్తామని చెప్పారు. రెరాను సంప్రదిస్తూ లీగల్‌ ఓపినియన్‌ తీసుకొని రియల్టర్ల ఫోరం మరింత బలపడాలని కేటీఆర్‌ సూచించారు.

• ఆటో డ్రైవర్లకు నెలకు రూ.5 వేలివ్వండి

‘అసెంబ్లీ ఎన్నికల ముందు హైదరాబాద్‌కు ప్రచారానికి వచ్చిన రాహుల్‌గాంధీ ఆటోలో అజారుద్దీన్‌తో కలిసి ప్రయాణించి డ్రైవర్లకు రంగుల కలలు చూపించారు. ఇచ్చిన హామీలు నెరవేర్చకపోగా.. ఆటో డ్రైవర్లు ఆత్మహత్య చేసుకునే పరిస్థితి కాంగ్రెస్‌ ప్రభుత్వం తీసుకువచ్చింది’ అని కేటీఆర్‌ ఆరోపించారు. రాష్ట్రంలోని 6.5 లక్షల మంది ఆటో డ్రైవర్ల పరిస్థితి దయనీయంగా మారిందని, గతంలో ఖర్చులుపోను నిత్యం రూ.800 వరకు మిగలగా.. ఇప్పుడు రూ.200-300 గిట్టుబాటయ్యే పరిస్థితి కూడా లేదన్నారు. శాసనసభలో ఆత్మహత్యలు చేసుకున్న డ్రైవర్ల పేర్లతో సహ చెప్పామని, అయినా ప్రభుత్వం ఆదుకోలేదని మండిపడ్డారు. యేడాదికి రూ.12 వేలు ఇస్తామన్న హామీని ఇప్పటికీ నెరవేర్చలేదని, మానవీయ దృక్పథంతో ప్రతి నెలా ఆటో డ్రైవర్లకు రూ.5 వేలు ఇవ్వాలని కోరారు. ఎన్ని కేసులు పెట్టినా.. జైల్లో పెట్టినా.. ప్రధాన ప్రతిపక్షంగా ప్రజల కోసం పోరాడతామని కేటీఆర్‌ అన్నారు.

• మీరూ కంట్రోల్‌ చేయలేదు.. ఓ డ్రైవర్‌ ఆందోళన

మహాధర్నాలో కేటీఆర్‌ ప్రసంగిస్తున్న సమయంలో ఓ ఆటో డ్రైవర్‌ అభ్యంతరం వ్యక్తం చేశారు. ఓలా, ఊబర్‌ ఇతర సంస్థలు తక్కువ కమీషన్లు ఇస్తున్నాయని, ఆ సమస్యలు పరిష్కరించాలని డిమాండ్‌ చేశారు. గతంలో ఈ విషయం మీ దృష్టికి తీసుకువచ్చినా ప్రయోజనం లేకుండా పోయిందని పేర్కొన్నారు. దీనిపై కేటీఆర్‌ స్పందిస్తూ.. మేం మీ కోసం వచ్చాం.. అందరం కలిసి సమస్యలు పరిష్కరించుకుందాం.. మాతో పంచాయతీ పెట్టుకుంటే ఏం వస్తది. ఊరుకో అని సూచించారు. మరోవైపు.. తెలంగాణ రాష్ట్రం పిచ్చోడిచేతిలో రాయిలా మారిందని సీఎం రేవంత్‌రెడ్డిని ఉద్ధేశించి కేటీఆర్‌ ఎక్స్‌ వేదికగా విమర్శించారు. పాలనా దక్షతలోపం.. ఒక విజన్‌ లేకపోవడం, రియల్‌రంగంపై హైడ్రా వేటు.. ముందుచూపులేని నిర్ణయాలతో రాష్ట్ర ఆదాయానికి పోటు అని పేర్కొన్నారు.