టీటీడీ చైర్మన్‌గా బీఆర్‌నాయుడు
ABN, Publish Date - Oct 31 , 2024 | 03:32 AM
మొత్తం 24 మందితో తిరుమల తిరుపతి దేవస్థానం (టీటీడీ) బోర్డును రాష్ట్ర ప్రభుత్వం ఏర్పాటు చేసింది. మీడియా రంగానికి చెందిన బొల్లినేని రాజగోపాల నాయుడును బోర్డు చైర్మన్‌గా, వివిధ రంగాలకు చెందిన 23 మందిని సభ్యులుగా నియమించింది.
23 మంది సభ్యులతో బోర్డు ఏర్పాటు .. ముగ్గురు టీడీపీ ఎమ్మెల్యేలకు స్థానం
అమరావతి, అక్టోబరు 30 (ఆంధ్రజ్యోతి): మొత్తం 24 మందితో తిరుమల తిరుపతి దేవస్థానం (టీటీడీ) బోర్డును రాష్ట్ర ప్రభుత్వం ఏర్పాటు చేసింది. మీడియా రంగానికి చెందిన బొల్లినేని రాజగోపాల నాయుడును బోర్డు చైర్మన్‌గా, వివిధ రంగాలకు చెందిన 23 మందిని సభ్యులుగా నియమించింది. బోర్డులో ఆంధ్రప్రదేశ్ తర్వాత తెలంగాణకు ఎక్కువ ప్రాధాన్యం దక్కింది. తమిళనాడు, కర్ణాటక రాష్ట్రాలకు చెందిన వారికి బోర్టులో స్థానం లభించింది. సుప్రీంకోర్టు చీఫ్‌ జస్టి్‌సగా పని చేసిన వ్యక్తిని తొలిసారి టీటీడీ బోర్డులో నియమించారు. మాజీ సీజేఐ జస్టిస్‌ హెచ్‌ఎల్‌ దత్తును బోర్డు సభ్యుడిగా నియమించారు.
టీడీపీ నుంచి...
ముగ్గురు టీడీపీ ఎమ్మెల్యేలకు బోర్డు సభ్యులుగా అవకాశం కల్పించారు. జగ్గంపేట ఎమ్మెల్యే జ్యోతుల నెహ్రూ, కోవూరు ఎమ్మెల్యే వేమిరెడ్డి ప్రశాంతి రెడ్డి, మడకశిర ఎమ్మెల్యే ఎంఎ్‌సరాజును నియమించారు. కేంద్ర మాజీ మంత్రి పనబాక లక్ష్మికి బోర్డులో స్థానం దక్కింది. తొలి నుంచి తెలుగుదేశం పార్టీని నమ్ముకుని ఉన్న తెలంగాణకు చెందిన నన్నూరి నర్సిరెడ్డిని టీటీడీ బోర్డు సభ్యుడిగా నియమించారు. రాజమండ్రికి చెందిన సాధారణ వ్యక్తి కోటేశ్వరరావుకు అవకాశం దక్కింది. నంద్యాల జిల్లా టీడీపీ ప్రెసిడెంట్‌ రాజశేఖర్‌ గౌడ్‌, పల్నాడు జిల్లాకు చెందిన టీడీపీ నేత జంగా క్రిష్ణమూర్తికి బోర్డులో అవకాశం దక్కింది. ఎన్నికల్లో జంగా క్రిష్ణమూర్తి గురజాల ఎమ్మెల్యే టికెట్‌ ఆశించినా దక్కలేదు. ఇప్పుడు టీటీడీ బోర్డు సభ్యుడిగా అవకాశం కల్పించారు. మంగళగిరికి చెందిన టీడీపీ రాష్ట్ర అధికార ప్రతినిధి తమ్మిశెట్టి జానకీదేవిని సభ్యురాలిగా నియమించారు.
జనసేన కోటాలో...
జనసేన పార్టీ కోటాలో ముగ్గురు సభ్యులకు టీటీడీ బోర్డులో అవకాశం లభించింది. జనసేన పార్టీ ఉపాధ్యక్షుడు బి.మహేంద్రరెడ్డిని సభ్యుడిగా నియమించారు. 2009 నుంచి జనసేనాని పవన్‌ కల్యాణ్‌ వెంటే ఉన్నారు. ఎలాంటి పదవులు ఆశించకుండా పార్టీ కోసం పని చేశారు. జనసేన పార్టీ వ్యవస్థాపక సభ్యురాలు అనుగోలు రంగశ్రీకి టీటీడీలో చోటు కల్పించారు. ఆమె భర్త ఎం.సి.దాస్‌ జనసేన పార్టీ ట్రెజరర్‌గా ఉన్నారు. ఇక జనసేన పార్టీ కోటాలో డిప్యూటీ సీఎం పవన్‌ సన్నిహితుడు, ప్రముఖ కళా దర్శకుడు ఆనంద్‌సాయికి అవకాశం దక్కింది. తెలంగాణలోని యాదాద్రి ఆలయం పునర్నిర్మాణంలో ఆయన కీలకంగా వ్యవహరించారు.
వివిధ రంగాల నుంచి...
ఎన్‌ఆర్‌ఐ విభాగం నుంచి జాస్తి సాంబశివరావు, ఫార్మా రంగం నుంచి నన్నపనేని సదాశివరావు, సుచిత్ర ఎల్లాకు బోర్డు సభ్యులుగా అవకాశం కల్పించారు. కేంద్ర హోం మంత్రి అమిత్‌ షాకు అత్యంత సన్నిహితుడు, తమిళనాడుకు చెందిన కృష్ణమూర్తికి నాలుగోసారి అవకాశం దక్కింది. అమిత్‌షా సతీమణి, కృష్ణమూర్తి సతీమణి చిన్ననాటి స్నేహితులని సమాచారం. కృష్ణమూర్తి మద్రాస్‌ హైకోర్టు, సుప్రీంకోర్టు న్యాయవాది. కాఫీ వ్యాపారి ఆర్‌ఎన్‌ దర్శన్‌, కుప్పం పారిశ్రామిక వేత్త శాంతరామ్‌, చెన్నైకి చెందిన పి.రామ్మూర్తిని సభ్యులుగా నియమించారు. పి.రామ్మూర్తి తమిళనాడులో పెద్ద టెక్స్‌టైల్స్‌ వ్యాపారవేత్త. తమిళనాడు ముఖ్యమంత్రి ఎంకే స్టాలిన్‌కు అత్యంత సన్నిహితుడిగా పేరున్న తిరుప్పూరు బాలుకు స్వయానా సోదరుడు. అంతేగాక మహారాష్ట్ర గవర్నర్‌ సీపీ రాధాకృష్ణన్‌కు అతి సమీప బంధువు అని తెలిసింది. తమిళనాడు రాష్ట్ర ప్రభుత్వ సిఫార్సుతో అవకాశం దక్కించుకున్నారు. కర్ణాటక రాష్ట్రం నుంచి నరే్‌షకుమార్‌కు చోటు కల్పించారు. ఆర్థిక నిపుణుడు, నిధుల సమీకరణలో అనుభవం ఉన్న సౌరబ్‌ హెచ్‌.బోరాకు బోర్డు సభ్యుడిగా స్థానం దక్కింది. గతంలో ఎంసీఐ చైర్మన్‌గా విధులు నిర్వహించిన కేతన్‌ దేశాయ్‌ కుమారుడు డాక్టర్‌ అదిత్‌ దేశాయ్‌కు బోర్డులో స్థానం లభించింది. కేతన్‌ దేశాయ్‌పై ఆరోపణలు ఉండడంతో ఆయనకు బదులుగా అదిత్‌ దేశాయ్‌కు అవకాశం కల్పించారు.
మళ్లీ అవకాశం
టీటీడీ పాలకమండలి సభ్యులుగా నియమితులైన వేమిరెడ్డి ప్రశాంతి రెడ్డి, జంగా కృష్ణమూర్తి గత వైసీపీ హయాంలోనూ బోర్డులో ఉన్నారు. వారిద్దరూ ఇప్పుడు తెలుగుదేశం పార్టీలో ఉన్న సంగతి తెలిసిందే. వైసీపీ హయాంలోనూ బోర్డులో స్థానం దక్కించుకున్న సౌరభ్‌ బోరా.. ఇప్పుడు మరోసారి టీటీడీ సభ్యుడయ్యారు. ఇక ప్రస్తుతం టీటీడీ సభ్యుడిగా నియమితులైన రామ్మూర్తి సోదరుడు తిరుప్పూర్‌ బాలు గతంలో బోర్డు సభ్యుడిగా పని చేశారు. కేతన్‌ దేశాయ్‌ వైసీపీ హయాంలో టీటీడీ బోర్డు సభ్యుడిగా ఉండగా... ఇప్పుడు ఆయన కుమారుడు అదిత్‌ దేశాయ్‌కి అవకాశం లభించింది.
టీటీడీ బోర్డు
చైర్మన్‌: బొల్లినేని రాజగోపాలనాయుడు
సభ్యులు
జ్యోతుల నెహ్రూ జగ్గంపేట ఎమ్మెల్యే
వేమిరెడ్డి ప్రశాంతి రెడ్డి కోవూరు ఎమ్మెల్యే
ఎంఎ్‌సరాజు మడకశిర ఎమ్మెల్యే
పనబాక లక్ష్మి కేంద్ర మాజీమంత్రి
నన్నూరి నర్సిరెడ్డి తెలంగాణ
సాంబశివరావు (జాస్తి శివ) ఎన్‌ఆర్‌ఐ
నన్నపనేని సదాశివరావు ఫార్మా
సుచిత్రా ఎల్లా ఫార్మా
కృష్ణమూర్తి తమిళనాడు
కోటేశ్వరరావు రాజమండ్రి
మల్లెల రాజశేఖర్‌ గౌడ్‌ టీడీపీ
జంగా కృష్ణమూర్తి టీడీపీ
దర్శన్‌ ఆర్‌ఎన్‌ కాఫీ వ్యాపారి
జస్టిస్‌ హెచ్‌ఎల్‌దత్తు మాజీ సీజేఐ
పి.రామ్మూర్తి తమిళనాడు
తమ్మిశెట్టి జానకీదేవి టీడీపీ
బి.మహేంద్రరెడ్డి జనసేన
అనుగొల్లు రంగశ్రీ జనసేన
బి.ఆనంద్‌సాయి జనసేన కోటా
నరేష్‌ కుమార్‌ కర్ణాటక
శాంతరామ్‌ కుప్పం పారిశ్రామికవేత్త
డా.అదిత్‌ దేశాయ్‌
సౌరబ్‌ హెచ్‌ బోరా ఆర్థిక నిపుణుడు
Updated Date - Oct 31 , 2024 | 03:32 AM
