Helicopter Crash: నదిలో కూలిన హెలికాప్టర్..సీఈఓ ఫ్యామిలీ సహా ఆరుగురు మృతి ..
ABN , Publish Date - Apr 11 , 2025 | 07:55 AM
సీమెన్స్ స్పెయిన్ అధ్యక్షుడు, CEO అగస్టిన్ ఎస్కోబార్, ఆయన భార్య, ముగ్గురు పిల్లలు కలిసి హెలికాప్టర్‌లో వెళ్తున్నారు. ఆ క్రమంలోనే హెలికాప్టర్ ఆకస్మాత్తుగా నదిలో కుప్పకూలింది. అందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. ఆ వివరాలేంటో ఇక్కడ చూద్దాం.
అమెరికాలోని న్యూయార్క్ నగరంలో హడ్సన్ నదిలో జరిగిన హెలికాప్టర్ ప్రమాదం విషాదాన్ని నింపింది. గురువారం మధ్యాహ్నం జరిగిన ఈ ఘటనలో ముగ్గురు పిల్లలు సహా ఆరుగురు ప్రాణాలు కోల్పోయారు. ఈ ప్రమాదంలో స్పెయిన్‌కు చెందిన ఒకే కుటుంబానికి చెందిన ఐదుగురు సభ్యులు, పైలట్ ఉన్నారు. న్యూయార్క్ పోలీస్ కమిషనర్ జెస్సికా టిష్ ప్రకారం, బెల్ 206 మోడల్ హెలికాప్టర్‌ను న్యూయార్క్ హెలికాప్టర్ టూర్స్ నడిపింది.
ప్రమాద వివరాలు
మధ్యాహ్నం 3 గంటలకు డౌన్‌టౌన్ హెలిప్యాడ్ నుంచి బయలుదేరిన ఈ హెలికాప్టర్ హడ్సన్ నది మీదుగా ఉత్తర దిశలో ప్రయాణిస్తోంది. ఆ క్రమంలో జార్జ్ వాషింగ్టన్ వంతెనను సమీపించేటప్పుడు, దక్షిణ దిశలో తిరిగి కొన్ని నిమిషాల తరువాత, అది నదిలో బోల్తా పడి నీటిలో మునిగిపోయింది. హెలికాప్టర్ గాల్లో విరిగిపోయినట్లు కనిపించిందని ప్రత్యక్ష సాక్షి అయిన బ్రూస్ వాల్ అన్నారు. దాని వెనుక భాగం, ప్రొపెల్లర్ విడిపోయి కింద పడిపోతున్నాయన్నారు. హెలికాప్టర్ నుంచి విడిపోయిన తర్వాత కూడా ప్రొపెల్లర్ తిరుగుతూనే ఉందన్నారు.
స్పందించిన డొనాల్డ్ ట్రంప్
అందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. వీడియోలో ఒక పెద్ద వస్తువు నీటిలో వచ్చి వేగంగా పడిపోయినట్లు కనిపిస్తుంది. కొన్ని సెకన్ల వ్యవధిలోనే హెలికాప్టర్ భాగం కూడా నదిలో పడిపోయినట్లు కనిపించింది. ఆ తరువాత అనేక అత్యవసర పడవలు ఘటనా స్థలానికి చేరుకుని, సహాయక చర్యలు చేపట్టాయి. ఈ ప్రమాదంపై ప్రపంచవ్యాప్తంగా దిగ్భ్రాంతి వ్యక్తమైంది. అమెరికా అధ్యక్షుడు డొనాల్డ్ ట్రంప్ కూడా ఈ ప్రమాదంపై విచారం వ్యక్తం చేశారు. మృతుల కుటుంబ సభ్యులు, సన్నిహితులకు సానుభూతి తెలియజేశారు.
మృతుల వివరాలు
నివేదికల ప్రకారం హెలికాప్టర్‌లో ఉన్న వారిలో సీమెన్స్ స్పెయిన్ అధ్యక్షుడు, CEO అగస్టిన్ ఎస్కోబార్, ఆయన భార్య ,ముగ్గురు పిల్లలు ఉన్నట్లు తెలుస్తోంది. రవాణా కార్యదర్శి సీన్ డఫీ, అతని బృందం ఈ ప్రమాదంపై దర్యాప్తు ప్రారంభించారని, త్వరలోనే వివరణాత్మక సమాచారాన్ని అందజేస్తామని తెలిపారు.
ఇవి కూడా చదవండి:
EPFO: పీఎఫ్ ఉద్యోగులకు అలర్ట్..మరింత ఈజీగా UAN నంబర్ పొందే ఛాన్స్..
Gold Price Fluctuations: అసలు గోల్డ్ రేటు ఎందుకు పెరుగుతుంది, ఎందుకు తగ్గుతుంది..కారణాలేంటి
Read More Business News and Latest Telugu News
