Ayodhya: రాములోరి ఆలయానికి బెదిరింపు.. భారీగా భద్రత పెంచిన ప్రభుత్వం
ABN , Publish Date - Apr 15 , 2025 | 05:30 PM
అయోధ్యలోని రామ మందిరం ఇటీవల బాంబు బెదిరింపునకు గురైంది. ఈ బెదిరింపుల నేపథ్యంలో ఆలయ భద్రత, అప్రమత్తతను పరీక్షించడానికి, భక్తుల భద్రతను నిర్ధారించడానికి ప్రభుత్వం చర్యలు తీసుకుంది. ఆ వివరాలేంటో ఇప్పుడు చూద్దాం.
అయోధ్యలోని రామాలయానికి (Ram Temple) వచ్చిన బాంబు బెదిరింపు, దేశవ్యాప్తంగా కలకలం రేపుతోంది. ఈ ఘటనతో ఆలయ ప్రాంగణంలో గందరగోళం నెలకొంది. భక్తులు, సందర్శకులు ఆందోళనలో పడిపోయారు. సైబర్ పోలీస్ స్టేషన్‌లో ఈ విషయంపై ఎఫ్‌ఐఆర్ నమోదు చేయగా, రంగంలోకి దిగిన పోలీసులు దర్యాప్తు చేస్తున్నారు. ఈ బెదిరింపు తమిళనాడుకు చెందిన ఒక వ్యక్తి రాముడి ఆలయ ట్రస్ట్‌కు పంపిన లేఖ ద్వారా వెలుగులోకి వచ్చింది. సోమవారం రాత్రి, రామ జన్మభూమి ట్రస్ట్‌కు వచ్చిన ఈ బెదిరింపు మెయిల్, ఆలయ భద్రతను పెంచాలని సూచించింది. ఈ మెయిల్ వచ్చిన వెంటనే, ఆలయ అధికారులు అత్యవసరంగా భద్రతా చర్యలను తీసుకోవాలని నిర్ణయించారు.
అప్రమత్తత, సమన్వయం
ఈ బెదిరింపుల నేపథ్యంలో అయోధ్యలో భద్రతా చర్యలు మరింత కట్టుదిట్టం చేశారు. సీఆర్పీఎఫ్, ఎటీఎస్, స్థానిక పోలీసులు సంయుక్తంగా భద్రతా చర్యలను అమలు చేస్తున్నారు. డ్రోన్ జామర్ వ్యవస్థలు, సీసీటీవీ కెమెరాలు, ఇతర ఆధునిక సాంకేతికతలను ఉపయోగించి భద్రతను పర్యవేక్షిస్తున్నారు. ఈ సమయంలో అయోధ్యతో పాటు, బారాబంకి, ఇతర పొరుగు జిల్లాలను కూడా హై అలర్ట్‌లో ఉంచారు. ఈ ఘటనపై స్పందించిన సైబర్ సెల్ ఈ బెదిరింపును తీవ్రంగా తీసుకుంటున్నామని, దర్యాప్తు కొనసాగుతోందన్నారు. బాధ్యులపై కఠిన చర్యలు తీసుకుంటామన్నారు. ఆలయ భద్రతను పెంచడం, భక్తుల భద్రతను కాపాడడం కోసం ప్రత్యేక బృందాలను నియమించినట్లు వెల్లడించారు.
పవిత్రతను దెబ్బతీయడం
బెదిరింపు మెయిల్ వచ్చిన తర్వాత, ఆలయ ప్రాంగణంలో భారీ సెర్చ్ ఆపరేషన్ నిర్వహించారు. పోలీసులు, బాంబ్ స్క్వాడ్, ఇతర భద్రతా సంస్థలు కలిసి ఆలయ పరిసరాలను పరిశీలించారు. ఇలాంటి బెదిరింపులు ఆలయ పవిత్రతను దెబ్బతీయడం మాత్రమే కాదు, భక్తి భావనను కూడా దెబ్బతీస్తాయని పలువురు భక్తులు అభిప్రాయపడ్డారు. మరికొందరు భద్రతా చర్యలను పెంచాలన్నారు. దీంతోపాటు భక్తులు కూడా అప్రమత్తంగా ఉండాలన్నారు. గతంలో కొన్ని ఆలయాలకు బెదిరింపులు వచ్చిన సందర్భాలు ఉన్నాయి. అయితే, ఈసారి రాముడి ఆలయానికి వచ్చిన బెదిరింపు చర్చనీయాంశమైంది.
భక్తులకు అలర్ట్
ఈ క్రమంలో భక్తులు, ఆలయ సందర్శనకు వెళ్లేటప్పుడు, వ్యక్తిగత భద్రతా చర్యలను పాటించాలని అధికారులు సూచిస్తున్నారు. అనవసరమైన వస్తువులను తీసుకురాకూడదని, భద్రతా సిబ్బందితో సహకరించాలని కోరారు. దీంతోపాటు అనుమానాస్పద వ్యక్తులను గుర్తిస్తే పోలీసులకు సమాచారం అందించాలని కోరారు. ప్రస్తుత డిజిటల్ యుగంలో సైబర్ బెదిరింపులు కూడా క్రమంగా పెరుగుతున్నాయి. ఇది వరకు రైల్వే స్టేషన్, ఎయిర్ పోర్ట్, స్కూల్ సహా అనేక ప్రాంతాలకు బెదిరింపులు వచ్చాయి. కానీ తర్వాత అవి ఫేక్ అని తేలాయి.
ఇవి కూడా చదవండి:
iPhone like Design: రూ.6 వేలకే ఐఫోన్ లాంటి స్మార్ట్‌ఫోన్‌.. ఫీచర్లు తెలిస్తే షాక్ అవుతారు..
Monthly Income: 50 ఏళ్ల తర్వాత నెలకు రూ.లక్ష కావాలంటే ఎంత సేవ్ చేయాలి, ఎన్నేళ్లు చేయాలి
Read More Business News and Latest Telugu News
