Manda Krishna: 7న ఎమ్మార్పీఎస్‌ ‘దండోరా’
ABN, Publish Date - Jan 10 , 2025 | 05:01 AM
రాష్ట్రంలో ఎస్సీ రిజర్వేషన్ల వర్గీకరణ తక్షణమే అమలు చేయాలనే డిమాండ్‌తో ఎమ్మార్పీఎస్‌ ఫిబ్రవరి 7న వెయ్యి గొంతులు లక్ష డప్పులతో దండోరా సాంస్కృతిక మహా ప్రదర్శన చేపట్టనుంది.
ఎస్సీ వర్గీకరణ అమలే లక్ష్యం : మందకృష్ణ మాదిగ
తార్నాక, జనవరి 9 (ఆంధ్రజ్యోతి): రాష్ట్రంలో ఎస్సీ రిజర్వేషన్ల వర్గీకరణ తక్షణమే అమలు చేయాలనే డిమాండ్‌తో ఎమ్మార్పీఎస్‌ ఫిబ్రవరి 7న వెయ్యి గొంతులు లక్ష డప్పులతో దండోరా సాంస్కృతిక మహా ప్రదర్శన చేపట్టనుంది. హైదరాబాద్‌లో ఈ కార్యక్రమం నిర్వహిస్తామని ఎమ్మార్పీఎస్‌ వ్యవస్థాపక అధ్యక్షుడు మందకృష్ణ మాదిగ తెలిపారు. ఈ సాంస్కృతిక మహా ప్రదర్శనకు మద్దతుగా ఓయూలో విద్యార్థి సంఘాల నాయకులతో గురువారం ఓ రౌండ్‌ టేబుల్‌ సమావేశం నిర్వహించారు.
ఈ సందర్భంగా మందకృష్ణ మాదిగ మాట్లాడుతూ ఎస్సీ రిజర్వేషన్ల వర్గీకరణపై సుప్రీంకోర్టు ఇచ్చిన తీర్పును వెంటనే అమలు చేయాలని అన్నారు. ఇప్పటీకీ కొందరు మాలలు వర్గీకరణకు అడ్డుపడుతున్నారని తెలిపారు. ఈ నేపథ్యంలో అంతిమ పోరాటంగా మాదిగల అస్తిత్వమైన డప్పుతో ఫిబ్రవరి 7న మాదిగల గుండె చప్పుడు వినిపిస్తామని చెప్పారు. ఈ దండోరా సాంస్కృతిక మహా ప్రదర్శనను విజయవంతం చేయాలని పిలుపునిచ్చారు.
Updated Date - Jan 10 , 2025 | 05:01 AM
