Non-Venomous : ‘కామన్‌ శాండ్‌ బో’ పాము

• పట్టుకొని అడవిలో విడిచిపెట్టిన స్నేక్‌ క్యాచర్‌

పలాస, డిసెంబరు 29 (ఆంధ్రజ్యోతి): శ్రీకాకుళం జిల్లా పలాస-కాశీబుగ్గ మున్సిపాలిటీ పరిధి నెహ్రూ నగర్‌లో ఆదివారం స్థానికులకు ‘కామన్‌ శాండ్‌ బో’ పాము కనిపించింది. రోడ్డు పనులు చేస్తుండగా.. మూడు అడుగుల పొడవు, నాలుగు అంగుళాల మందంతో శరీరంపై మచ్చలతో ఈ సర్పం కనిపించడంతో ఆందోళన చెందారు. వెంటనే అటవీ శాఖ అధికారులకు సమాచారం అందించారు. స్నేక్‌ క్యాచర్‌ ఓంకార్‌ త్యాడి, అటవీ సిబ్బంది కృష్ణారావు, రాజు వచ్చి పరిశీలించారు. ఇది విషపూరితమైనది కాదని, కేవలం ఇసుక తిన్నెలు, అటవీ ప్రాంతాల్లో ఈ జాతి పాములు ఉంటాయని తెలిపారు. ఉత్తరాంధ్ర జిల్లాల్లో ఇలాంటి పాము తారసపడడం ఇదే మొదటిసారన్నారు. తనకు హాని జరుగుతుందని పసిగట్టిన వెంటనే.. ఆ పాము ఆత్మరక్షణకు చుట్టుకొని తలను తోక వద్ద దాచుకుంటుందన్నారు. చూసేందుకు భయంకరంగా కనిపించినా ఇది చిన్న చీమలు, కప్పలు, ఎలుకలను తింటుందని, ఎవరికీ హాని తలపెట్టదని తెలిపారు. ‘కామన్‌ శాండ్‌ బో’ పామును పట్టుకుని కోసంగిపురం అటవీ ప్రాంతంలో విడిచిపెట్టారు.