Amaravati: కేంద్ర మంత్రికి థ్యాంక్స్ చెప్పిన టీడీపీ ఎంపీ.. ఎందుకంటే..

అమరావతి, అక్టోబర్ 16: కేంద్ర మంత్రి నితిన్ గడ్కరీతో టీడీపీ ఎంపీ లావు శ్రీకృష్ణదేవరాయలు బుధవారం నాడు భేటీ అయ్యారు. సీఆర్ఐఎఫ్ పథకం కింద ఆంధ్రప్రదేశ్ రాష్ట్రంలో 13 రాష్ట్ర రహదారుల అభివృద్ధికి రూ. 400 కోట్లు మంజూరు చేసినందుకు ధన్యావాదాలు తెలిపారు. చిలకలూరిపేట మున్సిపాలిటీ - జాతీయ రహదారి (NH-16)కి ఇరువైపులా కుప్పగంజి వాగు నుండి వోగేరు వాగు వరకు (సుమారు 8 కి.మీ) అవుట్‌ఫాల్ డ్రైన్‌ల నిర్మాణం కోసం ప్రత్యేక గ్రాంటు విడుదల చేయాలని నితిన్ గడ్కరీని ఎంపీ లావు కృష్ణదేవరాయలు కోరారు. ఈ అభ్యర్థనకు కేంద్ర మంత్రి సానుకూలంగా స్పందించారు.

కేంద్ర ప్రభుత్వం గ్రీన్ సిగ్నల్ ఇచ్చిన రోడ్లు ఇవే..

- దుర్గి నుండి వెల్దుర్తి రోడ్డు.

- పాలువాయి జంక్షన్ నుండి సత్రశాల రహదారి (వయా పాశర్లపాడు, జెట్టిపాలెం రోడ్డు).

- మాచర్ల N. కొండ, గొట్టిపాళ్ల మీదుగా VP సౌత్ రోడ్.

- కండ్లకుంట & గుడిపాటి చెరువు నుండి లోయపల్లి-లచ్చమ్మబావి తండా రోడ్డు వరకు.

- అలాగే గుంటూరు జిల్లాలోని గుంటూరు-నల్లపాడు రైల్వే సెక్షన్‌లో 4-లేన్ శంకర్ విలాస్ రోడ్ ఓవర్ బ్రిడ్జి (ROB) నిర్మాణానికి రూ. 98 కోట్లను మంజూరు చేసిన కేంద్ర మంత్రి నితిన్ గడ్కారికి కృతజ్ఞతలు తెలిపారు.

పల్నాడుకు మరో మహా రోడ్డు..

కొండమోడు - పేరేచర్ల జాతీయ రహదారికి రూ. 881.61 కోట్లు కేంద్ర ప్రభుత్వం మంజూరు చేసింది. 49.917 కిలోమీటర్లు దూరం ఉన్న ఈ జాతీయ రహాదారి 4లైన్ల పనులు త్వరలో ప్రారంభం కానున్నాయని ఎంపీ లావు కృష్ణదేవరాయలు తెలిపారు. ఈ జాతీయ రహదారికి అనుబంధంగా సత్తెనపల్లి, మేదికొందూరుల వద్ద రెండు బైపాస్‌ రోడ్లు నిర్మించనున్నట్లు ఎంపీ పేర్కొన్నారు. ఈ మేరకు ఆయన సోషల్ మీడియా వేదిక ఎక్స్‌లో ఒక పోస్ట్ చేశారు.