Anand Mahindra : మీ ఇంటికి ‘ఐరన్‌ డోమ్‌’!
ABN, Publish Date - Aug 25 , 2024 | 02:54 AM
దోమల బాధ భరించలేక రకరకాల పరిష్కారాలు వెతుకుతుంటాం. మార్కెట్లో మస్కిటో కాయిల్స్‌ నుంచి దోమల బ్యాట్‌లు, ఆల్‌ఔట్‌లు, జెట్‌లు వరకు బోలెడన్ని ఉపకరణాలు వచ్చేశాయి.
దోమల్ని చంపే వినూత్న యంత్రం.. చైనాలో తయారీ
రాడార్‌, లేజర్‌ టెక్నాలజీలతో పనిచేసే మెషిన్‌
ఎక్స్‌లో షేర్‌ చేసిన ఆనంద్‌ మహీంద్ర
ముంబై, ఆగస్టు 24: దోమల బాధ భరించలేక రకరకాల పరిష్కారాలు వెతుకుతుంటాం. మార్కెట్లో మస్కిటో కాయిల్స్‌ నుంచి దోమల బ్యాట్‌లు, ఆల్‌ఔట్‌లు, జెట్‌లు వరకు బోలెడన్ని ఉపకరణాలు వచ్చేశాయి.
దోమల మీద కొన్ని వేల కోట్ల రూపాయల పరిశ్రమ నడుస్తోంది. అయినా ఈ సమస్య నిర్మూలన కావటం లేదు సరికాదా.. ఎప్పటికప్పుడు డెంగీ, మలేరియా లాంటివి విజృంభిస్తూనే ఉన్నాయి. ఈ నేపథ్యంలో ప్రముఖ వ్యాపారవేత్త ఆనంద్‌ మహీంద్రా ఎక్స్‌ వేదికగా షేర్‌ చేసిన ఓ వీడియో అందరినీ ఆకర్షిస్తోంది. చైనాకు చెందిన ఓ వ్యక్తి, దోమల్ని చంపే బుజ్జి యంత్రాన్ని తయారు చేశాడని పేర్కొంటూ ఆ మెషిన్‌ వీడియోను ఆనంద్‌ మహీంద్ర షేర్‌ చేశారు.
‘ముంబైలో డెంగీ పెరుగుతున్న ప్రస్తుత సమయంలో.. ఈ సూక్ష్మ ఆయుధాన్ని ఎలా సంపాదించాలా అని ఆలోచిస్తున్నా. ఇది దోమల్ని వెదికి మరీ చంపుతుంది. మీ ఇంటికి ఐరన్‌ డోమ్‌ (ఉక్కు తెర)లాగా రక్షణ కల్పిస్తుంది’ అని కామెంట్‌ పెట్టారు.
సదరు మెషిన్‌ చంపిన దోమల్ని ప్రదర్శిస్తున్న దృశ్యాలు కూడా ఈ వీడియోలో ఉన్నాయి. యుద్ధట్యాంకును పోలి ఉండే ఈ బుజ్జి యంత్రంలో ఓ రాడార్‌ ఉంటుంది. దోమలు ఎక్కడున్నాయో గుర్తించి రాడార్‌ ఆ సమాచారాన్ని యంత్రానికి అందిస్తుంది.
దానిలోంచి లేజర్‌ కిరణాలు వెలువడి దోమల్ని చంపుతాయి. శత్రుదేశాల రాకెట్‌, క్షిపణి దాడులను తిప్పికొట్టే ఇజ్రాయెల్‌ ఐరన్‌ డోమ్‌ అంతర్జాతీయంగా పేరొందిన విషయం తెలిసిందే.
Updated Date - Aug 25 , 2024 | 02:54 AM
