Gajwel: మా ఎమ్మెల్యే కేసీఆర్‌ కనబడుట లేదు
ABN, Publish Date - Oct 07 , 2024 | 04:41 AM
మాజీ ముఖ్యమంత్రి, గజ్వేల్‌ ఎమ్మెల్యే కేసీఆర్‌ పది నెలలుగా కనిపించడం లేదని, వెతికి పెట్టాలని సిద్దిపేట జిల్లా గజ్వేల్‌ పోలీసులకు స్థానిక కాంగ్రెస్‌ నేతలు ఆదివారం ఫిర్యాదు చేశారు.
గజ్వేల్‌ పోలీసులకు కాంగ్రెస్‌ నేతల ఫిర్యాదు
గజ్వేల్‌, అక్టోబరు 6: మాజీ ముఖ్యమంత్రి, గజ్వేల్‌ ఎమ్మెల్యే కేసీఆర్‌ పది నెలలుగా కనిపించడం లేదని, వెతికి పెట్టాలని సిద్దిపేట జిల్లా గజ్వేల్‌ పోలీసులకు స్థానిక కాంగ్రెస్‌ నేతలు ఆదివారం ఫిర్యాదు చేశారు. కేసీఆర్‌ ఆచూకీని కనిపెట్టి నియోజకవర్గ ప్రజల ముందుకు తీసుకురావాలని కోరారు. టీపీసీసీ అధికార ప్రతినిధి బండారు శ్రీకాంత్‌రావు, పార్టీ కార్యకర్తలతో కలిసి గజ్వేల్‌ ఇన్‌స్పెక్టర్‌ సైదాకు ఫిర్యాదు పత్రాన్ని అందజేశారు. ఈ సందర్భంగా బండారు శ్రీకాంత్‌రావు మాట్లాడుతూ.. కేసీఆర్‌ మీరెక్కడా? అని ప్రశ్నించారు.
వారం రోజుల్లో కేసీఆర్‌ జాడ తెలియకపోతే తామే వెతుకుతామని తెలిపారు. ఎన్నికల్లో గెలిచి పది నెలలు కావస్తున్నా నియోజకవర్గంలో ఆయన జాడలేదని పేర్కొన్నారు. ప్రజల కాలిలో ముల్లు దిగితే పంటితో తీస్తానని చెప్పి మరిచిపోయారా? అని గుర్తుచేశారు. కేసీఆర్‌ యోగక్షేమాలు తెలుసుకోవాల్సిన బాధ్యత ఆయన్ను ఎమ్మెల్యేగా గెలిపించిన గజ్వేల్‌ ప్రజల మీద ఉందన్నారు. పోలీసులు కేసీఆర్‌ ఆచూకీ చెప్పకపోతే.. తామే కేసీఆర్‌ ఫామ్‌హౌ్‌సకి స్వయంగా వెళ్లి యోగక్షేమాలు తెలుసుకుంటామని అన్నారు.
Updated Date - Oct 07 , 2024 | 04:41 AM
