YCP Stickers: వైసీపీ స్టిక్కర్లు ప్రతీ ఇంటికే కాకుండా.. ఇప్పుడు ఏకంగా...

అమరావతి: రాష్ట్ర వ్యాప్తంగా ‘‘మా నమ్మకం నువ్వే జగన్’’ అంటూ స్టిక్కర్లు వేయాలన్న సీఎం జగన్ ఆదేశాలతో రంగంలోకి దిగిన ఆ పార్టీ నేతలకు ఎక్కడిక్కడ నిరసనలు ఎదురయ్యాయి. ఈ స్టిక్కర్లపై ప్రతిపక్ష టీడీపీతో పాటు, ప్రజలు తీవ్ర అభ్యంతరం తెలిపారు. ఇదిలా ఉండగా ఇప్పుడు ఏకంగా ప్రభుత్వ వాహనాలపైనే స్టిక్కర్లు అంటించడం వివాదాస్పదంగా మారింది. ప్రభుత్వ వాహనాలకు వైసీపీ పార్టీ స్టిక్కర్లను చూసి ప్రజలు ముక్కున వేలేసుకుంటున్నారు.

గతంలోనూ పంచాయితీలకు, ప్రభుత్వ భవనాలకు పార్టీ రంగులద్దడంపై హైకోర్టు సీరియస్ అయిన విషయం తెలిసిందే. ఇప్పుడు తాజాగా ప్రభుత్వ వాహనం AP39UE 9 నెంబర్ ఇన్నోవా కారుకు మా నమ్మకం నువ్వే జగన్ స్టిక్కర్లు అతికించారు. ఓ వైపు ప్రభుత్వ వాహనం అని పేర్కుంటూనే మా నమ్మకం నువ్వే జగన్ అంటూ స్టిక్కర్లు వేసేస్తుండడంపై తీవ్ర అభ్యంతరాలు వెల్లువెత్తున్నాయి. పార్టీ కార్యక్రమాలను ప్రభుత్వ వాహనాలపై ప్రచారం చేయడం పట్ల విపక్షాలు అభ్యంతరం వ్యక్తం చేస్తున్నాయి. ఇప్పటికే మా నమ్మకం నువ్వే జగన్ స్టిక్కర్‌లను ఇళ్లకు అంటిస్తున్న వాలంటీర్లపై టీడీపీ నేతలు, కార్యకర్తలు ఫిర్యాదు చేస్తున్నారు.