MLA Pinnelli : పిన్నెల్లి పరార్‌!
ABN, Publish Date - May 23 , 2024 | 03:56 AM
పోలింగ్‌ రోజు, ఆ తర్వాత మాచర్లలో అరాచకం సృష్టించిన వైసీపీ అభ్యర్థి, ఎమ్మెల్యే పిన్నెల్లి రామకృష్ణా రెడ్డి పరారీలో ఉన్నారు. విదేశాలకు పారిపోయారా...
ఈవీఎం ధ్వంసం కేసుతో పలాయనం
దేశం దాటారా.. ఇక్కడే ఉన్నారా?
ప్రత్యేక బృందాలతో పోలీసుల వేట
తెలంగాణలో మకాం వేసినట్లు సమాచారం
సంగారెడ్డిలో అరెస్టు చేసినట్లు వార్తలు
పాలమూరులోని ఓ పత్తి మిల్లులో బస
పోలీసులు వెళ్లడానికి ముందే షెల్టర్ ఖాళీ!
పిన్నెల్లి వాహనం సీజ్‌.. డ్రైవరు అదుపులోకి
లుక్‌ అవుట్‌ జారీ.. ఎయిర్‌పోర్టులన్నీ అలర్ట్‌
(ఆంధ్రజ్యోతి న్యూస్‌ నెట్‌వర్క్‌)
పోలింగ్‌ రోజు, ఆ తర్వాత మాచర్లలో అరాచకం సృష్టించిన వైసీపీ అభ్యర్థి, ఎమ్మెల్యే పిన్నెల్లి రామకృష్ణా రెడ్డి (Pinnelli Ramakrishna Reddy) పరారీలో ఉన్నారు. విదేశాలకు పారిపోయారా... లేక దేశంలోనే ఎక్కడైనా అజ్ఞాతంలో ఉన్నారా అనేది తెలియడంలేదు. ‘నేను ఎక్కడికీ పారి పోలేదు. పోలీసుల సూచన మేరకే హైదరాబాద్‌ వచ్చాను’ అని సుద్దపూస కబుర్లుచెప్పిన ఆయన కోసం పోలీసు ప్రత్యేక బృందాలు వేట సాగిస్తున్నాయి. పోలింగ్‌ రోజు ఈవీఎం ధ్వంసం చేసిన దృశ్యాలు బయటపడటంతో... ఆ కేసులో పిన్నెల్లిని పోలీసులు ఏ1గా చేర్చారు. నిందితులను ఎందుకు అరెస్టు చేయలేదంటూ కేంద్ర ఎన్నికల సంఘం కూడా నిలదీసింది. డీజీపీకి గట్టి ఆదేశాలు జారీ చేసింది. దీంతో.. పిన్నెల్లి సోదరులను పట్టుకునేందుకు 4 పోలీసు బృందాలను ఏర్పాటు చేశారు. ఈ బృందాలు హైదరాబాద్‌, దాని చుట్టుపక్కల తెలంగాణ జిల్లాల్లో విస్తృతంగా గాలిస్తున్నాయి. పిన్నెల్లి సోదరులు విదేశాలకు పారిపోవాలని చూస్తున్నారని అనుమానించిన పోలీసులు.. అన్ని ఎయిర్‌పోర్టులను అప్రమత్తం చేశారు. మరోవైపు పిన్నెల్లి విదేశాలకు పరారయినట్టు కూడా వార్తలు హల్‌చల్‌ చేశాయి.
అదిగో... అక్కడ... ఇక్కడ...
బుధవారం పిన్నెల్లితో ‘ఎలుకా - పిల్లి’లాగా పోలీసుల చేజింగ్‌ సాగింది. పిన్నెల్లి సోదరులకు తెలంగాణలో కొందరు బీఆర్‌ఎస్‌ నేతలతో మంచి సంబంధాలు ఉన్నాయి. వారి ఫామ్‌హౌ్‌సలో తలదాచుకున్నారన్న ప్రచారం జరుగుతోంది. దీంతో ఏపీ పోలీసులు ఆ కోణంలోనూ విచారణ చేపట్టారు. పిన్నెల్లి సోదరులు హైదరాబాద్‌ నుంచి వాహనంలో వెళ్తున్నారన్న సమాచారంతో అప్రమత్తమై.. సంగారెడ్డి జిల్లా పోలీసుల సహకారంతో పటాన్‌చెరు మండలం రుద్రారం సమీపంలో తనిఖీలు చేపట్టారు. అదే సమయంలో పిన్నెల్లి వాహనం అటు వైపు వచ్చింది. పోలీసులను గమనించి పిన్నెల్లి సోదరులు వాహనం దిగి మరో వాహనంలో పారిపోయినట్లు తెలుస్తున్నది. పిన్నెల్లి తన సెల్‌ఫోన్‌ కూడా వాహనంలోనే వదిలేసినట్లు సమాచారం. పోలీసులు వాహనంతో పాటు డ్రైవర్‌ను, పిన్నెల్లి గన్‌మెన్‌ను, అతని అనుచరులను అదుపులోకి తీసుకొని సంగారెడ్డి సీసీఎస్‌ పోలీ్‌సస్టేషన్‌కు తరలించారు. విచారణ అనంతరం మాచర్ల పోలీసులకు అప్పగించారు. అయితే, సంగారెడ్డి జిల్లా ఇస్నాపూర్‌లో బాత్‌రూమ్‌ సింక్‌లు తయారుచేసే ఫ్యాక్టరీ ఆవరణలో ఆయన దొరికిపోయినట్టు ప్రచారం జరిగింది. కానీ తెలంగాణ పోలీసులు స్పష్టత ఇవ్వలేదు. మాచర్ల పోలీసులనే అడగాలని చెప్పారు. బాపట్ల జిల్లా పర్చూరుకు చెందిన ఓ వ్యాపారికి మహబూబ్‌నగర్‌ జిల్లా భూత్పూర్‌, జడ్చర్ల పరిసరాల్లో పత్తి విత్తనాల మిల్లు ఉండేది.
ఏడాది క్రితమే దానిని మూసివేశారు. సదరు వ్యాపారి 2019 ఎన్నికల్లో పర్చూరు నుంచి వైసీపీ తరఫున పోటీచేయాలనుకున్నారు. కానీ టికెట్‌ దక్కలేదు. మాచర్ల నుంచి పరారు కాగానే.. పిన్నెల్లి సోదరులు తొలుత ఆ వ్యాపారి వద్దకు చేరుకున్నట్టు తెలుస్తోంది. ఈ నేపథ్యంలో భూత్పూర్‌, జడ్చర్ల పరిసర ప్రాంతాల్లో పోలీసులు తనిఖీలు నిర్వహించారు. అయితే, అప్పటికే పిన్నెల్లి సోదరులు పారిపోయారు. పిన్నెల్లికి ఆశ్రయం ఇచ్చినవారినీ అదుపులోకి తీసుకొని ప్రశ్నిస్తునట్టు తెలుస్తోంది. రామకృష్ణారెడ్డి దుబాయ్‌ వెళ్లేందుకు ప్లాన్ వేసుకున్నారని, పోలీసుల అప్రమత్తతతో ఆయన వ్యూహం బెడిసికొట్టిందని టీడీపీ వర్గాలు చెబుతున్నాయి. ఈ వర్గాల కథనం ప్రకారం, బుధవారం మధ్యాహ్నం 1.20 గంటలకు హైదరాబాద్‌ శంషాబాద్‌ ఎయిర్‌ పోర్ట్‌ నుంచి దుబాయ్‌ వెళ్లేందుకు పిన్నెల్లి సోదరులు ప్లాన్ చేసుకున్నారు. మధ్యాహ్నం 12 గంటలకు ఎయిర్‌పోర్ట్‌కు వారు చేరుకోవాల్సి ఉంది. అయితే, అప్పటికే ఏపీ పోలీస్‌ టీమ్‌ మాటు వేసి ఉందని తెలుసుకొని ఎయిర్‌పోర్టు వద్దకు వెళ్లలేదు. ఇప్పుడు అరెస్ట్‌ అయితే చాలాకాలం బయటకు రాలేమనే విదేశాలకు పారిపోయే ఆలోచనలో వారు ఉన్నట్లు తెలుస్తోంది. పోలీసులు పిన్నెల్లిపై లుక్‌ అవుట్‌ నోటీసులు జారీ చేశారు. అన్ని విమానాశ్రయాలను అప్రమత్తం చేశారు. విదేశాలకు పరారయ్యేందుకు పిన్నెల్లి సోదరులు ఒక ప్రముఖ టీవీ చానల్‌కు చెందిన వ్యక్తుల సహకారం తీసుకున్నట్టు సమాచారం. ఆంధ్ర సరిహద్దులు దాటే సమయంలో ఆ చానల్‌ ప్రతినిధి వారితో ఉన్నట్లు తెలుస్తోంది. హైదరాబాద్‌లో ఆ చానల్‌ వాహనాల్లోనే వారు తిరుగుతున్నారని సమాచారం.
Read Latest AP News and Telugu News
ఇవి కూడా చదవండి..
వెంటాడుతున్న పోలీసులు.. పిన్నెల్లి బ్రదర్స్ ప్లాన్ ఇదేనా..?
పిన్నెల్లి బ్రదర్స్‌కు షెల్టర్ ఇచ్చింది ఎవరు..?
ఈసీకి పిన్నెల్లిపై కీలక నివేదిక పంపిన ఏపీ డీజీపీ
పిన్నెల్లి ఎక్కడున్నా ఈడ్చుకొస్తారు ..!
Updated Date - May 23 , 2024 | 08:09 AM
