Delhi: అధికారం.. మోదీ చేజారుతోంది: రాహుల్‌
ABN, Publish Date - May 10 , 2024 | 04:26 AM
దేశంలో ప్రస్తుతం జరుగుతున్న లోక్‌సభ ఎన్నికలు మోదీ చేజారిపోతున్నాయని కాంగ్రెస్‌ అగ్రనేత రాహుల్‌ గాంధీ అన్నారు.
న్యూఢిల్లీ/రాయ్‌బరేలి, మే 9: దేశంలో ప్రస్తుతం జరుగుతున్న లోక్‌సభ ఎన్నికలు మోదీ చేజారిపోతున్నాయని కాంగ్రెస్‌ అగ్రనేత రాహుల్‌ గాంధీ అన్నారు. దాంతో ప్రజల దృష్టిని మరల్చేందుకు ఆయనకొత్త నాటకానికి తెరలేపే అవకాశాలు ఉన్నాయని, దేశ యువత ఆ మాయలో పడకుండా అప్రమత్తంగా ఉండాలని హెచ్చరించారు. గురువారం ‘ఎక్స్‌’లో రాహుల్‌ గాంధీ వీడియో సందేశం విడుదల చేశారు. జూన్‌ 4న తాము అధికారం చేపట్టబోతున్నామని, అగస్టు 15 నుంచి 30 లక్షల ఉద్యోగాల కల్పనకు శ్రీకారం చుట్టబోతున్నామని ప్రకటించారు. యువతే దేశానికి బలం అని అన్నారు.
మోదీ ‘బాబ్రీ తాళం’ వ్యాఖ్యలు పూర్తిగా అబద్ధం: ప్రియాంక
కేంద్రంలో కాంగ్రెస్‌ అధికారంలోకి వస్తే అయోధ్యలోని రామాలయానికి ‘బాబ్రీ తాళం’ వేస్తారంటూ ప్రధాని నరేంద్ర మోదీ చేసిన వ్యాఖ్యలు పూర్తిగా అబద్ధమని ఆ పార్టీ నాయకురాలు ప్రియాంకా గాంధీ వాద్రా గురువారం అన్నారు. కోర్టు తీర్పును గౌరవించనున్నట్టు కాంగ్రెస్‌ పార్టీ అనేకసార్లు పేర్కొందని, గతంలోనూ ఇది పాటించామని, భవిష్యత్తులోనూ ఇదే చేస్తామని పాత్రికేయులతో రాయ్‌బరేలిలో ఆమె అన్నారు.
Updated Date - May 10 , 2024 | 04:26 AM
