Chandrababu: చంద్రబాబు నివాసానికి రజినీకాంత్

అమరావతి: టీడీపీ అధినేత చంద్రబాబు (Chandrababu) నివాసానికి రజినీకాంత్ (Rajinikanth) వెళ్లారు. ఈ సందర్భంగా రజినీకాంత్‌, ఎన్టీఆర్‌ కుటుంబసభ్యులకు చంద్రబాబు తేనీటి విందు ఇచ్చారు. అనంతరం చంద్రబాబు నివాసం నుంచి నేరుగా అనుమోలు గార్డెన్స్‌లో నిర్వహిస్తున్న ఎన్టీఆర్‌ శతజయంతి వేడుకల్లో పాల్గొంటారు. ఎన్టీఆర్‌ శతజయంతి వేడుకల్లో చంద్రబాబు, రజినీకాంత్‌, ఎన్టీఆర్‌ కుటుంబసభ్యులు (NTR family members) పాల్గొంటారు. ఈ ఏడాది ఎన్టీఆర్‌ శతజయంతి ఉత్సవాలను పెద్ద ఎత్తున నిర్వహించాలని నిర్ణయించారు. ఎన్టీఆర్‌ స్ఫూర్తిని భవిష్యత్తు తరాలకు తెలియజేసేలా ఓ సావనీర్‌ను తీసుకురానున్నారు. ఈ మేరకు టీడీ జనార్ధన్‌ నేతృత్వంలో సావనీర్‌ కమిటీ ఏర్పడింది. ఈ కమిటీ ఆధ్వర్యంలో సావనీర్‌ను తీసుకురావడంతో పాటు ఎన్టీఆర్‌ (NTR) జీవితాన్ని సంపూర్ణంగా ఆవిష్కరించేలా ఓ వెబ్‌సైట్‌ను, యాప్‌ను కూడా తీసుకురానున్నారు. సావనీర్‌, వెబ్‌సైట్‌, యాప్‌ ఆవిష్కరణ కార్యక్రమాలను హైదరాబాద్‌లో నిర్వహించాలని నిర్ణయించారు. అదే సమయంలో ఎన్టీఆర్‌ ప్రసంగాలతో రెండు పుస్తకాలను కూడా తీసుకురానున్నారు. ఈ కార్యక్రమంలో ఎన్టీఆర్‌పై తొలి పుస్తకం రాసిన సీనియర్‌ జర్నలిస్టు ఎస్‌.వెంకటనారాయణ కూడా పాల్గొననున్నారు. ఎన్టీఆర్‌ ఔన్నత్యాన్ని భవిష్యత్‌ తరాలకు తెలియజేయడమే లక్ష్యంగా ఎన్టీఆర్‌ శతజయంతి ఉత్సవాలను నిర్వహించనున్నట్లు సావనీర్‌ కమిటీ చైర్మన్‌ టీడీ జనార్ధన్‌ తెలిపారు.