Heatwave: మండిన ఉత్తర కోస్తా

ABN , Publish Date - Mar 18 , 2025 | 05:08 AM

సోమవారం ఉదయం నుంచి వేడిగాలులు రావడంతోప్రజలు ఉక్కిరిబిక్కిరయ్యారు. విపత్తుల నిర్వహణ సంస్థ బులెటిన్‌ ప్రకారం.. సోమవారం మన్యం జిల్లా వీరఘట్టంలో 42.8, విజయనగరం జిల్లా తుమ్మికపల్లిలో 42.6, అనకాపల్లి జిల్లా నాతవరం, రావికమతం, ప్రకాశం జిల్లా పెద్దారవీడు,

వీరఘట్టంలో 42.8 డిగ్రీలు నమోదు

అమరావతి, విశాఖపట్నం, మార్చి 17(ఆంధ్రజ్యోతి): వాయవ్య భారతం నుంచి మధ్య భారతం మీదుగా పొడి గాలులు వీస్తుండడంతో రాష్ట్రంలో సోమవారం వేడి వాతావరణం కొనసాగింది. ఉత్తరకోస్తాలో ఎండ తీవ్రత పెరిగి వడగాడ్పులు వీస్తున్నాయి. సోమవారం ఉదయం నుంచి వేడిగాలులు రావడంతోప్రజలు ఉక్కిరిబిక్కిరయ్యారు. విపత్తుల నిర్వహణ సంస్థ బులెటిన్‌ ప్రకారం.. సోమవారం మన్యం జిల్లా వీరఘట్టంలో 42.8, విజయనగరం జిల్లా తుమ్మికపల్లిలో 42.6, అనకాపల్లి జిల్లా నాతవరం, రావికమతం, ప్రకాశం జిల్లా పెద్దారవీడు, నంద్యాల జిల్లా గోనవరంలో 42.1, కర్నూలు జిల్లా నన్నూరులో 41.7 డిగ్రీల గరిష్ఠ ఉష్ణోగ్రతలు నమోదయ్యాయి. రాష్ట్ర వ్యాప్తంగా 40 మండలాల్లో తీవ్రం గా, 78 మండలాల్లో మోస్తరు వడగాడ్పులు వీచాయి. రాయలసీమ, దక్షిణ కోస్తాలో పలుచోట్ల గాడ్పుల ప్రభావం కొనసాగింది. మంగళవారం మన్యం, శ్రీకాకుళం, విజయనగరం, అల్లూరి జిల్లాల్లోని 29 మండలాల్లో తీవ్రంగా, శ్రీకాకుళం నుంచి పల్నాడు జిల్లా వరకు 99 మండలాల్లో మోస్తరు వడగాడ్పులు వీస్తాయని విపత్తుల నిర్వహణ సంస్థ తెలిపింది. రెండు రోజుల తర్వాత గాడ్పుల ప్రభావం స్వల్పంగా తగ్గుతుందని వాతావరణ శాఖ తెలిపింది.