NTR: ఎన్టీఆర్ శతజయంతి ఉత్సవాలకు జూనియర్‌ ఎన్టీఆర్‌ దూరం

హైదరాబాద్‌: హైదరాబాద్‌లోని కూకట్‌పల్లి హౌసింగ్‌ బోర్డు సమీపంలోని కైతలాపూర్‌ (Kaitalapur) మైదానంలో ఎన్టీఆర్ శత జయంతి కమిటీ ఆధ్వర్యంలో బహిరంగ సభ నిర్వహిస్తున్నారు. ఈ సభకు ముఖ్య అతిథిగా టీడీపీ అధినేత చంద్రబాబు (Chandrababu), ప్రత్యేక అతిథిగా ఎమ్మెల్యే బాలకృష్ణ (Balakrishna) హాజరువుతున్నారు. అయితే సభకు జూనియర్ ఎన్టీఆర్ (Junior NTR) వస్తారని ప్రచారం జరిగింది. కానీ ముందే నిర్ణయించుకున్న కార్యక్రమాల వల్ల ఆయన ఎన్టీఆర్ శతజయంతి ఉత్సవాలకు దూరంగా ఉన్నారు. నేడు జూనియర్ ఎన్టీఆర్ పుట్టినరోజు. పుట్టినరోజు సందర్భంగా కుటుంబానికి సమయం కేటాయించాలని ఆయన నిర్ణయం తీసుకున్నారు. షెడ్యూల్ కారణంగా జయంతి ఉత్సవాలకు హాజరుకావడం లేదని జూనియర్ తెలిపారు. ఎన్టీఆర్ శత జయంతి కమిటీకి కూడా ఇదే విషయం చెప్పినట్లు జూనియర్ ఎన్టీఆర్ వెల్లడించారు.

సుదీర్ఘ కాలం తర్వాత బీజేపీ, వామపక్ష పార్టీల ముఖ్య నేతలు కూడా ఈ సందర్భంగా ఒకే వేదికపైకి వస్తున్నారు. వీరిలో సీపీఎం, సీపీఐ జాతీయ కార్యదర్శులు సీతారాం ఏచూరి, డీ రాజా, హర్యానా గవర్నర్‌ బండారు దత్తాత్రేయ, బీజేపీ జాతీయ ప్రధాన కార్యదర్శి పురందేశ్వరి ఉన్నారు. అలాగే ఎన్టీఆర్‌ శత జయంతి సభకు అగ్రశ్రేణి సినీ హీరోలు హాజరవుతున్నారు. కైతలాపూర్‌ మైదానంలో నిర్వహించే వేడుకల్లో ప్రముఖ సినీ హీరోలు వెంకటేష్‌, ప్రభాస్‌, అల్లు అర్జున్‌, జనసేన అధ్యక్షుడు పవన్‌ కల్యాణ్‌, కల్యాణ్‌ రామ్‌ పాల్గొననున్నారు. అలాగే కన్నడ సినీ హీరో శివ రాజకుమార్‌, తెలుగు సినీ ప్రముఖులు వెంకటేశ్‌, కల్యాణ్‌రాం, జయప్రద, మురళీ మోహన్‌, రాఘవేంద్రరావు, జీ ఆదిశేషగిరిరావు, అశ్వనీదత్‌, సుమన్‌ తదితరులు హాజరుకానున్నారు. ఈ వివరాలను శత జయంతి కమిటీ కన్వీనర్‌, మాజీ ఎమ్మెల్సీ టీడీ జనార్దన్‌ తెలిపారు.

సభలో ఎన్టీఆర్‌ జీవిత విశేషాలతో ‘శక పురుషుడు’ పేరుతో ప్రచురించిన ప్రత్యేక సంచికను ఈ సభలో ఆవిష్కరిస్తున్నారు. అలాగే ఎన్టీఆర్‌ సినీ, రాజకీయ జీవితానికి సంబంధించిన ఫొటోలు, వీడియోలు, సమగ్ర విశేషాలతో రూపొందించిన ‘జై ఎన్టీఆర్‌’ వెబ్‌సైట్‌ను కూడా ప్రారంభిస్తున్నారు. ఎన్టీఆర్‌ ఉపన్యాసాలను కూడా ఇందులో జోడిస్తున్నారు. తొలి సభను శత జయంతి కమిటీ విజయవాడలో నిర్వహించింది. రెండో సభను హైదరాబాద్‌లో పెట్టారు. ఎన్టీఆర్‌ అభిమానులు పెద్దసంఖ్యలో హాజరై ఈ సభను విజయవంతం చేయాలని నిర్వాహణ కమిటీ విజ్ఞప్తి చేసింది.