BJP: సోమువీర్రాజుపై తీవ్ర అసంతృప్తి... ఢిల్లీకి ఏపీ బీజేపీ నేతలు

న్యూఢిల్లీ: ఏపీ బీజేపీ రాష్ట్ర అధ్యక్షులు సోమువీర్రాజు (AP BJP President Somuveerraju) వ్యవహారశైలిపై పలువురు నేతలు తీవ్ర అసంతృప్తితో ఉన్నట్లు తెలుస్తోంది. ఇటీవలే ఏపీ బీజేపీ మాజీ అధ్యక్షులు కన్నా లక్ష్మీనారాయణ (Kanna Laxminarayana) పార్టీకి గుడ్‌బై చెప్పిన విషయం తెలిసిందే. రాజీనామా సమయంలో సోమువీర్రాజుపై కన్నా ఆగ్రహం వ్యక్తం చేశారు. రాష్ట్ర నాయకత్వం నచ్చకపోవడంతో పార్టీకి రాజీనామా చేసినట్లు ఆయన తెలిపారు. ఇప్పుడు కన్నా బాటలోనే పలువురు నడుస్తున్నట్లు తెలుస్తోంది. సోమువీర్రాజు తీరుపై విసుగెత్తిపోయిన పలువురు అసమ్మతి నేతలు ఢిల్లీ బాటపట్టారు.

గురువారం పలువురు ఏపీ బీజేపీ నేతలు (AP BJP Leaders) ఢిల్లీకి చేరుకున్నారు. ఈరోజు మధ్యాహ్నం 3 గంటలకు ఏపీ బీజేపీ రాష్ట్ర ఇంచార్జ్ మురళీధరన్‌ (AP BJP state in-charge Muralidharan)తో నేతలు భేటీ కానున్నారు. పలు జిల్లాల బీజేపీ మాజీ అధ్యక్షులు, వివిధ స్థాయుల్లో పార్టీకి పనిచేసిన నేతలు.. మురళీధరన్‌తో భేటీ కానున్నారు. రాష్ట్ర అధ్యక్షుడు సహా నాయకత్వాన్ని మార్చాలని అసమ్మతి నేతలు కోరనున్నారు. సుమారు 30 మంది బీజేపీ నేతలు మురళీధరన్‌తో సమావేశంకానున్నారు. రాష్ట్ర నాయకత్వంపై ఫిర్యాదు చేసేందుకు రాష్ట్ర నాయకత్వాన్ని మార్చాలని పది జిల్లాలకు చెందిన నేతలు డిమాండ్ చేయనున్నారు. జమ్ముల శ్యామ్ కిషోర్, చిగురుపాటి కుమారస్వామి, తుమ్మల అంజిబాబు, ధారా సాంబయ్య, బాలకోటేశ్వరరావు, ఉప్పలపాటి శ్రీనివాసరాజు, శ్రీమన్నారాయణ, సుబ్బయ్య, హనుమంతు ఉదయ భాస్కర్ సహా 30 మంది నేతలు ఢిల్లీకి చేరుకున్నారు.