Veeramani: గవర్నర్‌ వైఖరి మార్చుకోవాలి

- లేకుంటే నల్లజెండాలతో నిరసన

- ద్రావిడర్‌ కళగం అధ్యక్షుడు వీరమణి హెచ్చరిక

పెరంబూర్‌(చెన్నై), డిసెంబరు 1: రాష్ట్రప్రభుత్వాన్ని కట్టడి చేసేలా వ్యవహరించడం మానుకోకుంటే, గవర్నర్‌ ఆర్‌ఎన్‌ రవికి నల్లజెండాలతో నిరసన తెలియజేస్తామని ద్రావిడర్‌ కళగం అధ్యక్షుడు కె. వీరమణి(K. Veeramani) హెచ్చరించారు. ఆన్‌లైన్‌ జూదాన్ని నిషేధిస్తూ రాష్ట్రప్రభుత్వం ఆమోదించిన బిల్లు అనుమతించకుండా కాలయాపన చేస్తున్న గవర్నర్‌ తీరును ఖండిస్తూ స్థానిక సైదాపేటలో ద్రావిడర్‌ కళగం ఆధ్వర్యంలో నిర్వహించిన ధర్నాలో వీరమణి పాల్గొన్నారు. ఈ సందర్భంగా ఆయన మాట్లాడుతూ బీజేపీ అధ్యక్షుడు అన్నామలై(BJP President Annamalai), ప్రతిపక్ష నేత ఎడప్పాడి పళనిస్వామితో భేటీ అయ్యేందుకు సమయం కేటాయిస్తున్న గవర్నర్‌, న్యాయశాఖ మంత్రికి మాత్రం అపాయింట్‌ ఇవ్వడానికి ఎందుకింత జాప్యం చేశారని ప్రశ్నించారు. రాష్ట్రప్రభుత్వం ఆమోదించే ప్రజా సంక్షేమ బిల్లులను సకాలంలో పరిశీలించి అనుమతివ్వాల్సిన బాధ్యత రాష్ట్ర ప్రథమపౌరుడిదేనని, గవర్నర్‌ తన వైఖరి మార్చుకోకుంటే ఆయన వెళ్లే అన్ని ప్రాంతాల్లో తమ పార్టీ తరఫున నల్లజెండాలతో నిరసన తెలియజేస్తామని వీరమణి హెచ్చరించారు.