నేడు జిల్లాకు పవన్‌కల్యాణ్‌

మారిన షెడ్యూల్‌

పర్యటన ఒకరోజుకే కుదింపు

పిఠాపురం, కాకినాడ రూరల్‌ నియోజకవర్గాల్లో పర్యటన

పలు అభివృద్ధి పనులకు ప్రారంభోత్సవాలు, శంకుస్థాపనలు

పిఠాపురం/గొల్లప్రోలు, నవంబరు 3(ఆంధ్ర జ్యోతి): రాష్ట్ర ఉపముఖ్యమంత్రి పవన్‌కల్యాణ్‌ పర్యటన షెడ్యూల్‌లో మార్పులు చోటు చేసుకున్నాయి. ఆయన పర్యటనను ఒకరోజుకే కుదించారు. పిఠాపురం, కాకినాడ రూరల్‌ నియోజకవర్గాల్లో సోమవారం పర్యటించి అదే రోజు సాయం త్రం తిరిగి పయనం కానున్నారు. ఇందుకు సంబంధించి ఆదివారం సాయంత్రం అధికారికంగా సమాచారం వచ్చింది. డిప్యూటీ సీఎం పవన్‌కల్యాణ్‌ పర్యటన తొలుత ఈనెల 4,5వ తేదీల్లో ఉంటుందని ప్రకటించారు. అయితే 5వ తేదీ నాగులచవితి కావడంతో పర్యటనను ఒక్కరోజుకే పరిమితం చేశారు. మారిన షెడ్యూల్‌ ప్రకారం ఆయన 4న ఉదయం కాకినాడ జిల్లాకు వచ్చి కార్యక్రమాల్లో పాల్గొని సాయంత్రం తిరిగి వెళ్లతారు.

నేడు పర్యటన ఇలా...

సోమవారం ఉదయం 8గంటలకు మంగళగిరిలోని క్యాంపు కార్యాలయం నుంచి బయలుదేరి 8.40గంటలకు గన్నవరం ఎయిర్‌పోర్టుకు చేరుకుంటారు. అక్కడ నుంచి 9.30గంటలకు రాజమహేంద్రవరం విమానాశ్రయం చేరుకుని అక్కడ నుంచి 11.00గంటలకు గొల్లప్రోలు జిల్లాపరిషత్‌ బాలుర ఉన్నత పాఠశాలకు చేరుకుంటారు. అక్కడ పిఠాపురం నియోజకవర్గంలోని పాఠశాలలలకు మంజూరైన సైన్స్‌ ల్యాబ్‌లను, గొల్లప్రోలు పట్టణంలోని మండలపరిషత్‌ ప్రాథమిక పాఠశాల-2 నూతన భవనాలను ప్రారంభిస్తారు. గొల్లప్రోలు జగనన్న కాలనీకి మంజూరైన బ్రిడ్జి నిర్మాణంతో పాటు సూరంపేటకు మంజూరైన బ్రిడ్జి నిర్మాణానికి, గొల్లప్రోలు బాలుర ఉన్నత పాఠశాల భవనాల మరమ్మతుల పనులకు, అసంపూర్తిగా ఉన్న గొల్లప్రోలు అర్బన్‌హెల్త్‌ సెంటర్‌, తహశీల్దారు కార్యాలయ పూర్తికి చేపట్టే పనులకు, గొల్లప్రోలులోని మొగలి సూర్యుడు మంచినీరు చెరువు ఆధునీకరణ పనులకు ఆయన శంకుస్థాపన చేయనున్నారు. అక్కడే విభిన్న ప్రతిభావంతులకు ఉపకరణాలు పంపిణీ చేయనున్నారు. అక్కడ నుంచి 11.30గంటలకు బయలుదేరి 11.45గంటలకు పిఠాపురంలోని టీటీడీ కల్యాణమండపం చేరుకుంటారు. అక్కడ నుంచే నూతనంగా నిర్మించిన ప్రభుత్వ డిగ్రీ కళాశాల భవనాలను ప్రారంభిస్తారు. టీటీడీ ఆధ్వర్యంలోని వేంకటేశ్వరస్వామి మాడవీధులు, కల్యాణమండపం మరమ్మతులకు, బాదం మాధవరావు ప్రభుత్వ బాలికోన్నత పాఠశాల, ఇంటిగ్రేటెడ్‌ హాస్టల్‌ భవనాల మరమ్మతులకు ఆయన శంఖుస్థాపన చేస్తారు. పశువుల సంత ఆధునీకరణ పనులకు శ్రీకారం చుడతారు. అక్కడ నుంచి మధ్యాహ్నం 12.15గంటలకు బయలుదేరి 12.30గంటలకు కాకినాడ రూరల్‌ మండలం పి.వెంకటాపురంలో ఏపీఎస్‌డబ్లూఆర్‌ఈఐ ఇనిస్టిట్యూట్‌ను సందర్శిస్తారు. మధ్యాహ్నం ఒంటి గంటకు బయలుదేరి 1.30గంటలకు కొత్తపల్లి పీహెచ్‌సీకి చేరుకుంటారు. పీహెచ్‌సీలో అవుట్‌ పేషెంట్‌బ్లాకు నిర్మాణానికి, ఇసుకపల్లి, రవీంద్రపురం, నిదానందొడ్డి, శొంటివారిపాకలులోని మండలపరిషత్‌ పాఠశాల భవనాల నిర్మాణానికి, మూలపేట హాస్టల్‌ ఆధునీకరణ పనులకు శంకుస్థాపన చేయనున్నారు. కొత్తపల్లి మండలంలో టీటీడీ కల్యాణమండపం నిర్మాణంపై పవన్‌ ప్రకటన చేయనున్నారు. అక్క డ నుంచి 2గంటలకు చేబ్రోలు నివాసానికి చేరుకుంటారు. మధ్యాహ్నం 3.30గంటలకు బయలుదేరి రాజమహేంద్రవరం విమానాశ్రయానికి సా యంత్రం 5గంటలకు చేరుకుని అక్కడ నుంచి గన్నవరం విమానాశ్రయానికి వెళ్లతారు. పవన్‌ షెడ్యూల్‌ మారడంతో అందుకు తగ్గట్టుగా ఏర్పా ట్లు చేయడంలో అధికారులు నిమగ్నమయ్యారు.