TDP-BJP: తెలంగాణలో టీడీపీతో పొత్తుపై బండి సంజయ్ క్లారిటీ..!

హైదరాబాద్: తెలంగాణ బీజేపీ (BJP) ముఖ్యనేతల సమావేశంలో పొత్తులపై హాట్ చర్చ జరిగినట్లు తెలుస్తోంది. ఖమ్మం (Khammam)లో టీడీపీ భారీ బహిరంగ సభ నిర్వహించింది. ఈ సభకు విశేష స్పందన వచ్చింది. ఈ సభ తెలంగాణ టీడీపీ నేతల్లో కొత్త ఉత్సాహాన్ని నింపింది. ఈ నేపథ్యంలోనే పొత్తులపై అనేక ఊహాగానాలు చక్కర్లు కొట్టాయి. వచ్చే ఎన్నికల్లో టీడీపీ, బీజేపీ కలిసి పోటీ చేస్తాయనే ప్రచారం ఊపందుకుంది. ఈ సందర్భంలోనే తెలంగాణ బీజేపీ నేతల్లో పొత్తులపై చర్చ జరిగినట్లు సమాచారం. టీడీపీతో పొత్తుపై కార్యకర్తలకు స్పష్టత ఇవ్వాలని బీజేపీ నేత విజయశాంతి (Vijayashanthi) కోరారు. టీడీపీతో‌ పొత్తు వల్ల 2018 ఎన్నికల్లో కాంగ్రెస్ నష్టపోయిందని ఆమె గుర్తుచేశారు. రాములమ్మ ప్రశ్నకు సమాధానంగా.. తెలంగాణలో టీడీపీతో పొత్తు ఉండదని రాష్ట్ర బీజేపీ అధ్యక్షుడు బండి సంజయ్ (Bandi Sanjay) క్లారిటీ ఇచ్చారు. కార్యకర్తలకు ఇదే విషయాన్ని చెప్పాలన్నారు. ఇటీవల టీడీపీ, బీజేపీ పొత్తులపై ఎంపీ లక్ష్మణ్ కూడా స్పష్టత ఇచ్చారు. టీడీపీ (TDP)తో పొత్తు అంశం వార్తలకే పరిమితమని స్పష్టం చేశారు. తెలంగాణ (Telangana)లో బీజేపీ ఒంటరిగానే పోటీ చేస్తుందని తెలిపారు. బీజేపీ, టీడీపీ పొత్తుపై ఎలాంటి చర్చలు కూడా జరగడం లేదని లక్ష్మణ్ (BJP MP) తేల్చి చెప్పిన విషయం తెలిసిందే.